Bika tenebiakin Jehová Dios kenwantikiaki, na nawati janchadan
Davidin kanta kenenikiaki
22
En Diosuun, en Diosuun,¿jaskakin min ea jeneamen?
En bika teneaya eki kematan
¿jaskai juxun min ea paxawamamen?
Bika tenei en kaxaya
¿jaskakin daewakin min ea medabewamamen?
2 En Diosuun, badidi inun meshu medan en mia kenabia
min ea ninkatan axuanmawen taea
en jani juindukunti pe jayamaki.
3 Jakia miadan, medibi jawa chakabu min jayamaki.
Min jatu xanen ibuxuna
Israelin enabun mia kenwankubainkanikiki.
4 Nukun xenipabu miki chiti ikin
mia ikunwainbu mian min jatu taxnimaniki.
5 Jabiabundi min jatu medabewanun mia ea akaibu
min jatu taxnimaniki.
Mia ninkakin chibainbu
jatuki dakeama min jatu medabewaniki.
6 Jakia eadan, en juni jawamajaida en xena keska bestiki.
Yudabun ea usainbudan, tsuanda ea uin eki kaxekanikiki.
7 Jabun ea uintan ea usain
xechua eki budi budi imisbuki,
8 ekidi yuikin: “Ja juninan, Jehová ikunwankin chibanmiski.
Jau ja juxun medabewayununwen,
ja bechipaijaidaiwen taexunan”, imisbuki.
9 Chanima en ewan bake nanti anua ea kainmatan
en ewan chuchu amakin janu min ea juindukunmakubainiki.
10 En ibu anua en kaindiamatian ea mekekin min taewaniki.
En ibuan pustu medanua min en Dios ini jeneama mia besti min ipakeaii.
11 Natian jawanda ea bika tenemaitun detekin ea kexeken
tsua betsan ea medabewatidu en jayamaki.
Jaskawen taea chai ea dapaxkabainyamawe.
12 Ina awa bene puben keskakin
eki sinataibun ea kenebaunabuki,
mae Basán anua ina awa bene puben kexenameabu keskadan.
13 Inu betsa león puben tekeden tekeden iki
pintsi keskai jaxpabidan eki nidi ikaibu keskabuki,
ea achinun ika eki sinataibudan.
14 Bika tenei kushipa jayama en unpax jukua keskaki.
Paxati jayama en xau tseke tsekepa keska en jani katidumaki.
Jawa benimawati jayama en juinti nishma en bin menui tuis tuis ikai keskaki.
15 En jiwea babui en kushipa bexmasi en jaxpa mai kenti tuax keska tsusianki.
Unpax manui en jana taxkai en jaxakaki tsamiaki.
En ma mawa ea akawakin mai kudu anu min ea putabainaki.
16 Juni chakabubun ma ea kexe keyuabuki,
kaman eki xuku dakabidanai keskakinan.
Jabun en meken inun en tae ma ea xui kextuabuki.
17 En xau tibi uinkin en tanatiduki.
Eki sinataibun bedi ikama ea uin jeneisbumaki.
18 En tadi jabun besti paxkakin jawen jamapai unanti xau mexte númeroya dabewen maemamanantan bikanikiki.
19 Jakia miadan, Jehováan, min en kushipaki.
Ea jenebainama jawaidakidan ea medabewai judiwe.
20 Machatu chaipa kenu dabewen en mawayamanun jatu nemawe.
Ja kamanbun jau ea tenanyamanunbun jatu ea nemaxundiawe.
21 Ja inun, ja inu betsa león jaxpa keskabun jau ea piyamanunbun ea nemaxunkin ea paxawawe.
Awa bene puben maxunyan keskabu ea jatu nemaxundiawe.
22 Min kushipakidi en betsabu en jatu jancha waxanaii.
Ichabu anuxun duawakin en mia kenwanxanaii.
23 Dasibibun man Jehová duawamisbuun, matun juiwen kenwankanwen.
Dasibi Jacobun enabuun, Jehová pepawakin ewapawakanwen.
Dasibi Israelin enabuun, Jehováki mesekin kenwankanwen.
24 Jehovánan, nuitapaibu jatuki dakekin jatu danainsmaki.
Janua ea akabu jawa juneama jatuki dakei jatuki pechismaki.
Jawada yukabu ninkatan jatu medabewamiski.
25 Min nuku putaismawen taexun
minabu ichapabun bedubi en mia kenwain jeneama ikunkainxanaii.
Tsuabunda mia duawamisbu bebunxun
jaska en yubakai en mia menexunkubainxanaii.
26 Jabu nuitapabiai keinsbuman pikin yaniwai pepexankanikiki.
Matubun man Jehová benaidan, jaki nukutan man kenwanxanaii,
badi ichapa jiwekunkainkinan.
27-28 Jehovádan, ja nukun xanen ibu kayabiki.
Mae pakea tibi jatu xanen ibuxunmiski.
Jaskawen taexun mai jidabi anu jiwebaunabu
yuda betsa betsapa xukuabun
Jehová shinantan ja bebun danti ixun
jau kenwain bexanunbunwen.
29 Dasibi xanen ibu kushipabu jatun jamapai midima jaya jawen jiwekanikiki.
Jakia dasibibu mawai ana mai mishpuxanaibuwen taexun
dasibibun danti ixun jau Jehová besti kenwanxanunbunwen,
jabu ibubis jiwea jayatidubumakidan.
30 Enabu pakubainkin Jehováki mesekin kenwanxankanikiki.
Jakidi janchakin yuibaunxankanikiki, pakubainkin jakidi yui jeneamadan.
31 Jabu kaindiabumadi chipu kaintan jawen ichakanikatima inun jawen dayakidi
jaska akubainmis jatuki chanidiakubainxankanikiki.