41
Ja kape puben itamamajaida jawen kena tsatsakapetanwankidi shinanjaidawe.¿Xeamati ewapawen xeamakin min bitidumen?
¿Dispiwen jawen jana min nexatidumen?
2 Jawen dekin xui dabe anu dispi mistubain
¿min nexatidumen?
Mane betantiwen jawen kui ¿min betantidumen?
3 Jawen daewati janchawen jau min jawen nuinun
tsatsakapetanwanen mia ea akin
yukatidu ¿min shinain?
4 Jawen jiwea dasibi min dayadu esclavo jau ikunkainxanun
¿min jabe yubakatidu min shinain? ¡Jaskatimajaidaki!
5 ¿Isa pishtabe min beyusmis keskai
ja tsatsakapetanwanbe min beyusxanai?
Min ainbu bakebube jau jabe beyusnunbun
¿min jatu nexaxunxanai?
¡Min jaska watidumajaidaki!
6 Piti inananain bianananmisbu jiwe anu tsatsakapetanwan iyua
¿jati jawen kaduwen taea binun ika ibube ja itidubumen?
¿Jatu inankin jawen yuda min mexte mexte atidumen?
¡Pubenjaidaken min jaska watidumajaidaki!
7 Pia kuin ichapawen jawen bichi pesakin
¿ukedi kainmakin min texun wantidumen?
¿Jawen buxkaki jashiwen min chachitidumen?
¡Min atidumajaidaki!
8 Achinun, iwanan, min mamepia jawen kushipawen mia binukin
maemaxanikiki, mia isin tenemakinan.
Januxun min ana metidumajaidaki.
9 Tsuabunda tsatsakapetanwan jawen yuda uin besti
date paepai shinanentidubuki.
10 Tsuanda tsatsakapetanwan besten wankin
bechima sinatajaidaya
tsua ja bebun katidumajaidaki, binubaunidan.
Ea Dios kushipajaida dasibi binuatun
besti en binutiduki.
11 Dasibi nai naman jaya enaski.
Jaskawen taexun jaska bechipaikin en amiskidi
tsuanda ea chitetidumaki.
12 Tsatsakapetanwan jawen pabu tibi inun
jawen yuda kushipajaida yuinaka betsan binuamawen taea
en jakidi yui jenetidumaki.
13 Jawen bichi xaka kextujaida chachikin
¿tsuan pesatidumen?
Jawen bichi kushipajaida babuma ¿tsuan dashpetidumen?
14 Jawen deta chaipa xeta ichapa mapubaina mesejaida
¿tsuan jaxpa watidumen?
15 Jawen yuda xaka tsami keku dakabaina
kushijaida mishki keskaki.
16 Jawen xaka tsamiadan,
janus kekubaina niwe jikikaintidumaki.
17 Ja jawen xaka tsami mestenjaidabainawen taexun
tsuan besha wakin paxkatidumaki.
18 Jawen jui aun aun iki kana bakai keskamiski.
Jawen bedu chaxajaida tashipa badi taxnikidani
chaxamis keskaki.
19 Jawen dekin anua chi jede kain
deken bishi bishi imiski.
20 Jawen dekin anua kuin kainmiski,
kenti pichan kukatsa iki kuin puamis keskaidan.
21 Jawen jaxpa anua chi jede xun akin
tsiste keti wamiski.
22 Jawen texu kushipajaidawen taea
dasibi ja bebun mapua datejaidamisbuki.
23 Jawen yuda nami tibi jawa babu jayama dasibi kushijaidaki,
mane hierro payua keska tsuan chachikin pesatiduma keskadan.
24 Jawen juinti mankan keska kushijaidaki,
mishki deneti keskadan.
25 Tsatsakapetanwan benikin jatu datea
jaki mesei yushibubu date paepai paxamisbuki.
26 Nupe chaipa kenujaida inun, jashi kenujaida inun,
pia kuin jawen debu mane kenujaida denetamea inun,
detenameti betsa dardo jabu shadabuwen
tsuan tenantidumaki.
27 Jatun shinanan, mane hierrodan, tawa xana keska inun
mane bronce ji chapui keskaken
tsatsakapetanwan jatiki dateismajaidaki.
28 Pia kuinwen tsakabiabu jawen datei paxatidumaki.
Mankan tunku jaki puta puta abiabu jawen dateama
basi xana puta puta akaibu keska shinanmiski.
29 Binu ewapa kushipawen jatu makush makush aka
tawa xanawen jatu kusha kusha aka keska inun
chachiti jaki putabu jawen jui ninkai
jawa dateama usanmiski.
30 Jawen nuta xakawen pupus anu xadakainkin
bai tapinbainkin tsispubainmiski.
31 Jawen yuda itamamawen taea
ianenwan nua medan jikikainkinan,
kenti kukatsa ikai keskai inun
dau xeniya kapamana buspuai keska wabainmiski.
32 Janua jene xatebaina
jachun jene bechunkaini
jawen bechun juxupajaida jenebaina
bu juxupa niwe xunku ikainkin
pesha wabaina keskamiski.
33 Mai jidabi anua tsatsakapetanwan keska
yuinaka betsa jayamaki.
Jau tsuaki date taskayamaxanun en dami waniki.
34 Yuinaka betsa pianan mesebia dasibi jau jaki datexanunbun
jatun xanen ibu wakin yuinaka dasibi en binumaniki”, aka