40
1-2 Jehován Job ana yuikubainkin:“Mianan, en Dios kushipajaida dasibi binuatun
jaska ean bechipaikin en amis ¿ninkamas ana ea pewakin
min ea ana chitekatsis ikai?” aka
3-4 Jobun jawa yuitiduma unanxubida yuikin:
“En jawamajaidawen taexun
en mia jawa ana jancha watidumajaidaki.
5 En jaibuaibu ma en jatu dabeki yuikubainshinaki.
Ana jancha betsa yuikin en mia jawa yuitidumaki”, aka
Jawen kushipa Diosun Job xabakabi ana unanmanikiaki, na janchadan
6 janua niwe kushipa shubi shubi ikai anuxun jancha wakin Jehován Job ana yuikin:
7 “Natian jaska min kushipamis
ea uinmadiwe,
na yukati tibi en mia yukai ea kemakinan.
8 ¿Mian ea chitekinan,
kanekin en chakabuwaima mian min ea yuiai?
Janua mia ikidan, ¿dasibibu bebun
jawa chakabuwaisma min kainkatsis ikai?
9 ¿Miadan, min kushipa jayamen,
ea en Dios kushipa jaya keskadan?
¿Min juidan, ena keskamen,
kana tin ikainkainai denke ikainai keskadan?
10 Xanen ibukin kushipa sawea keskai kushipai jawenduai
chaxa chaxa iki keskawen yabukuwe.
11 Ja ibubis kenkubainaibu dasibi jatu uin
jatuki sinatakin babu wakin jatu dake wawe.
12 Tsuabuda ibubis kein janchamisbu
jatu uin bestikin di akawakin
jatu bextewe.
Janida junibu chakabu min jatuki nukuaidan,
jatu chusha keska wakin dake wakin jatu bextewe.
13 Mai anu maiwati uke medanjaida anu jatu bichikin bepuwe,
ja mawabudan.
14 Min jaska waya,
‘Min kushipawen min ibubis maematan meketiduki’,
akin ean en mia unanxanaii”, atan
15 ana Diosun yuikin:
“Yuinaka itamamajaida Behemotkidi shinanwen.
Yuinaka Behemot inun mia en matu dami waniki.
Jabunan, ina awa keskakin basi besti pikubainmisbuki.
16 Kushipajaida jawen kati nami inun
jawen pubi namidan, babumajaidaki.
17 Jawen kate jinadan, chadishki, kuxa ji keskadan.
Jawen kishi punu jawen taeki tsamiakeakea kushipajaidaki.
18 Jawen xau tibi mane bronce xankian keska inun
jawen kishi inun jawen punyan
mane kushipa hierro keska kushipajaidaki.
19 Ja yuinaka Behemot dami wakin
dasibi yuinaka betsa en jatu binumakin keyuniki.
Ean en dami waniwen taexun
ean besti tenankin en yamawatiduki.
20 Mati matipa anu janu yuinaka betsa piananbu jiwea beyusbiamisbuken
jabianuxundi basi jukuain yuinaka Behemot bexun pikubainmisbuki.
21 Ja inun, ji betsa loto utapan naman dakai inun
ian kexa tawa anu junea manimisbuki.
22 Paxku kexa ji loto inun ji betsa álamo
xukua mapubauna anu utamisbuki.
23 Jene bai matai kushibidanaya jawa dateisbumaki.
Jatun dekin anu jene kesubiaken unanuma mapumisbuki.
24 Jatun bedu tsekanun, iwanan,
¿tsuan jatu achitidumen?
¿Jatun dekin anu tsuan jatu deuwatidumen?
Tsuan jaska watidumajaidaki.