39
Mati matipa anua yuinaka cabra jatianjawen bake kainmisdan, ¿min unain?
Chaxu bake kain kamiaidan, ¿min ma uinmamen?
2 Jati uxe chaxu bakeyatan janu kainmis
¿min ma unain?
3 Chaxu yuxan jawen bake kainun ika
kami chincha daka kaintan isinjaidai mainmiski.
4 Janua kaintans jamebi benia damesteni kushipatan
ni anua ewatan chipu jawen ibu dapaxkabainmiski,
ana janu jawen ibu anu chintuanmadan.
5 Asno inabiaken ¿tsuan nichinimen,
jau yuinaka betsa keskai jamebi jiwekunkainunan,
jawen nexa pekatan tsuan mekeama
jau ibubis jiwenun taxnimakinan?
6 Janu tsua jiweabuma anu napanpa mai sauya
jau janu jiwenunbun ja asno nichinkin
uinmakin ean en jatu metuniki.
7 Mae ewapa anua yudabu janchawainbu asnon jatu bechipaiama
inun jabun asno yunukin sai amisbu ninkakatsi isbumaki.
8 Pinun ika mati inun panpa tibi anu
basi pepa benai asno nikunkaunmiski.
9 Ina awa bene ibuuma yuinaka keska jiwekunkainmis
¿mia dayaxuntidu min shinain,
min ina jiwe anu pubenbiaken uxankubainkinan?
Min jaska bichitidumajaidaki.
10 Ja ina awa min dayamakatsis ikai ji tekishkunxun ninkamas
¿min bai beden amakin jen iyamabiaya min pewamabaintidumen?
¿Kayanbis kakin dayakainkin mia kachun kaya
mia pukin pukin akin pewaxunbaintidumen?
11 Min daya jau ibubis mia axunkubainun
ina awa bene puben kushipawen taexun
mia pe dayaxunun ¿ja besti min jenetidumen?
12 Min xekiwan trigo tsekaxun
min mae anu januxun min xememis anu mia ichawaxuntidudan,
¿jaska min shinain?
Mia jaska waxuntidumajaidaki, pubenjaidawen taeadan.
13 Yuinaka peiya avestruz jawen pei bichu nanketapa keskabia
benimai pea pea ibiamis manaundi nuyakaintidumaki,
jawen pei kushipamawen taeadan.
14 Janua badi chaxakin jawen bachi jau xana wanun
jawen bachi mashi anu paketan jenebainmiski,
15 yudabu inun yuinakapan pemakin
jawen bachi chakabuwantidu jawa shinain jawa nuiamadan.
16 Jawenama keska jatun bake ibubis tushiabu
jatu jawa mekeisbumaki,
jawen bachi pakei jamen dayashina jawa ana shinanmadan.
17 Eanan, avestruz jawa unanepati en inanma iniki,
jawa pe shinantiduma wakinan.
18 Jakia benitan pea pea ikayabi kushikainkin
caballoki katsaumea buaibu
jawaida jatu binubainkin jatu usanbainmiski.
19 Caballo kushipa wakin inun
jawen texu anu bu chaipa jawendua wakinan,
¿mian min animen?
20 Yudabu datejaidamai janx janx iki
¿caballo min ishchumatidumen,
shini ishchumis keska wakinan?
21 Kanun ika jawen kushipa jatu uinmai
panpa anua taweshiki taweshiki ikin
juni katsaumea detenameaibu anu
jawa dateama caballo jikibainmisbuki.
22-23 Jawada mesejaidabiaken usain juni jaki katsaumea
jawen pia ichapa chinexekeaya bei
kushama kushama abidanaibun inun nupe chaipa inun
jashi chaipawen detenamei baka baka iki detenameaibun
jawa datei teku itan caballo chintuinsbumaki.
24-25 Chaikea detenamei sai sai ikaibu
caballon ninkakin jatun jimi xetei
janua trompeta chan chan akaibun
ana jawen dekinwen janx janx iki
jawa manai pes nitiduma
tsuan jatu nematiduma
detenameaibu anu jawaida kushibainmisbuki.
26 Jamen betsadan, jau tete nuya tapintan surkidi nuyakaintanun
¿unanepa wakin mian min yusinmismen?
27 Nawa teten jau manaundijaida jawen bachi paketi na wanun
pewamakinan, ¿jabia mian min amamismen?
28 Mati keyatapajaida mamaki mishki betsa naexpa anu
nawa tete yuxan janu badidi inun meshu medan juindukunkatsi
janu jawa jikitiduma
uxakatsi na wakin jawen iduti watan jiwemiski.
29-30 Jadi manaundijaidaxun manakin jawen piti nami jawada bechitan achixun
jawen bakebu nami jimiyabi pimakubainmiski.
Yuinaka betsa mawa inun detenamei mawabu anu
nawa teten nami pi icha mapumisbuki”, itan