Jobun shinan betsa betsapa Diosun unanti wamanikiaki, na janchadan
38
Janua niwe kushipa shubi shubi ikai anuxun jancha wakin Jehován Job yukakin:2 “En mia axunmis jawa pe ekidi tapinkin
min unandiamabia ekidi jatu yuikin
xabakabi wama junei min janchakunkainaidan,
jabia min miaki”, atan,
3 “Min kushipawen jawa dateama
min ea ikunjaidawamisdan, ea uinmawe,
na yukati tibi en mia yukai ea kemakinan.
4 Min chanima unanepajaidadan,
ja mai dami wakin en taewayadan,
miadan, min jani inimenkain ea yuiwe.
5 Mai dami wakin taewakin tana keyukin
¿jatixun jawen kesu wakea tsuan ani min unain?
¿Tsua inimen, ja mai dami wai dayaidan?
6-7 En nai tsumabu benimajaidakin ea kenwainbun
penamajaida bishi jatidi chaxai taekidani
jabe benimai kantaibun
ja mishkipawan kushipajaida jawen mai mestenwankin
ja dukun janakinan, ¿tsuan animen?
8 Mai uke medanua dasibi ianenwan tuebidanaidan,
¿tsuan jene nemakin mainwen bepukin
kexa wakin metu wabaunimen?
9-10 Ianenwan nemakin jawen kexa jatixun
kesu kawanawakin ean en aniki.
Dasibi bepu pewakinan, nai kuin jawen tadi keska wakin inun
basnundi jawen bakeishta yabukuti keska wakin
ianenwan en axuniki.
11 Jaska watan ianenwan yuikin:
‘Janu besti kesua tunkax ikin tsakabidanbidanxanwen,
ana unudi binuamadan’, akin en nemaniki.
12 Penai jau badi chaxai pekidanunan, jiwekunkainkinan,
¿min ma jaska yunuimamen,
ean en amis keska wakinan?
13 Mai jidabi jau xaba wanun yunukin
inun juni chakabubu jau datei paxanunbun
mai taka taka akin jatu putakin
¿min kushipawen min ma yunuimamen?
14 Badi chaxakidanaya mai besu betsai mati matipa
tadi jawenduai keskai tashi midin itiduki.
15 Badi chaxakin juni chakabubu achibiatan junekainmis keskai
juni sinatamisbu keyuxanikiki.
16 Ja ianenwan uke medan junea
janua jabai uinan, ¿min ma katanimamen?
17 Janu mawabu bumisbu meshujaida anu
jawen jikiti beputi xuidan, ¿min ma uintanimamen?
18 Mai jidabi jatixun kesuakea jawen jaxpa inun jawen chaipadan,
¿min unain?
Jaska en mia yukakubainaidan,
chanima dasibi min unan keyuimenkain, ea yuiwe.
19 ¿Xaba inun meshu janu idumisdan, min unain?
20 Jawen kati baiwen mai jidabi chaijaida dunkemabaunkin
badi inun meshu ana chintunwanbidankinan,
¿min jatu yunutidumen?
21 Min jaska yunutidumajaidaki.
Mai bawakin dasibi en dami waitian
min kaini badi ichapa min jayabia
dasibi en dami wani min unantidumajaidaki.
22-23 Janu detenamei nuitapaibutian
juni chakabubu jawen jatu kupixanun, iwanan,
ja ui matsijaida inun badux ui janu en adua
jadi kaxun ¿min ma uintanimamen?
24 ¿Jadatu baiwen xaba jui
ibubis chaxakidani pabidanmismen?
Niwe badi juaikidia xunku ibidani
¿jaskatan pua iki pabainmismen?
25-27 Ja mai tsusinjaida anu janu tsua jiweabuma anu
cha akin jau basi benemanun
tin ikainkaini kana baka baka ikai yunukin
¿tsuan ui bepenkin ui ima chakayamamismen?
28 Ui inun basnunan,
¿jatun dami wanidan, ibu junidan, tsuamen?
29-30 Mati keyatapajaida anua
matsijaida wakin paxku inun, jene inun,
ianenwan batapa tankimamisdan,
¿tsuamen, jaki banidan?
31 Bishi xukua jawen kena Pléyades
¿mian min jatu meketidumen, jawa paxkamadan?
Ja inun, bishi xukua betsa Oriónan,
¿mian min paxkatidumen, maewakinan?
32 Bishi xukua tibidan, janu kaiaintianan,
¿mian min jatu taxnimamismen?
Bishi xukua dabe Osa Ewa inun Osan Bakedan,
¿janu dakai anu mian min jatu maewakubainmismen?
33 Nai anua xanen ibukin jaska dayakin en yunukubainaidan,
¿min unain?
Jaska en yunumis mai anuxundi jabias keskadi
¿min yunudiamismen?
34 Jau miki ui ichakayamanun
¿min jancha bestiwen nai kuin min yunutidumen?
35 Min yunua janiada kana baka baka itan mia yuikin:
‘Nun nenuki, min nuku yunua nun ikaidan’, ikin mia yuibainaibudan,
¿min jaska ninkamismen?
36 ¿Tsuan yudabu unanepa wakubainmismen?
Junibun yushin ninkanikaya wakinan,
¿tsuan jatu jaska wakubainmismen?
37-38 Unanepajaidakin nai kuin jati jaya
¿tsuan tanatidumen?
Mai mishpu tanki keyua dasibi tsusin anu
¿tsuan ui imatidumen,
nai kuinki unpax mata main juka keska wakinan?
39-40 Inu betsa león yuxanen jawen bakebu pimakin
jatu yani wamanun ika
jatun kini uke medan kasmai
chaka medanxun manaibu
yuinaka ¿mian detexun min jatu bexunmismen?
41 Tete meshupan bakebu jawa pitima
insh insh ikin ea medabe yukakubainaibun
¿tsuan ibu medabewa jatu piti bixunmismen?