31
Ainbu chipash en ainma uin jawen kemukinchutakatsi ikama Diosbe en yubakaniki.
2 ¿Dasibi kushipajaidatun nai anua
ana jawa jatu inanxanimenkain,
jabun kanekin jawen ainma chutakubainaibu
dasibi jatu uinmistunan?
3 Juni chakabubu inun tsuabuda yubakabiatan
jawa akabuma jabu ixankanikiki, nuitapaidan,
jabu ana jawa pe jiweamadan.
4 Jamapai shadabu en akubainmis tibi
Diosun chanima ea uinkubainmiski.
5 Chanima emebi shinan chakabuakin
en jatu jancha chakabuwaismajaida inun
tsuada padanun, iwanan, en shinankubainsmadan,
xabakabi chanima en matu yuiaii.
6 En pepajaida wamis ea unanti wakin
Diosun besti jawen pisatiwen tana keska wakin
ea tanakin pewaxanikiki.
Jaska ea tanatan en pepaken ea unanxanikiki.
7 En jiwea pepa jenetan jawada uin kemukin chibain kasmai
en mekenwen jawada chakabu shadabu en meimaken
8 jawada banakin en chachima jau betsabun pikasmakin
jawada en banaima jau betse betse anunbunwen.
9 Chanima kemukin ea dapi jiweatun ain uin kasmai
jawen bene janumaken padantan en chutaimakenan,
10 jawen taexun en ain ea mebintan
juni betsan tsumawakin esclava wabaina
jau juni betsabun ati wakin chutakubainunbunwen.
11 Jaska en jiwei atimapamiswen taexun
jau Diosun ea kupijaidaxanunwen.
12 En kena pepa ana shinantima wakin
en mabu ea menun keyuntidubuki.
Jakia en kaneismawen taea en jawa dateamaki.
13 En dayadubu juni inun ainbun
jawada jawama bikatsis iki eki ja ikin
jaska ea yukaibu jatu dananma
inankin en jatu medabewaimaki.
14 ¿Ana jadatu jaska Diosun bechipaiai axunkin
en uinmatidumen?
Jamen en kanemisdan,
¿jaskada en Dioski chanitidumen, ea yukadan?
15 En dayadubu inun eadi jabias Diosun
nukun ewan xankin anu nuku dasibi dami wakin
jiwemaniwen taexun en jatu ninkakubainimaki.
16 Jaska inun, tsuada jawada jayama nuitapaibu
jatu medabewakin en jeneama ikunkainimaki.
Ainbuaibu jawen bene mawanibu jatu yubanixun
jatun piti inankin en jatu medabewakubainimaki.
17-18 Ainbu beneuma nuitapai
jau tsuan jatu ichakawayamanun mekekin
bakeishta ibu juni jayabuma
jatun epa keskakin en jatu medabewakubainimaki,
piti eskadabes jayabia enmesti piama
jatu paxkaxunkubainkinan.
19-20 Matsitian tsuada yabukuti jayama nuitapai inun
tadiuma matsi tenei mawakatsis ikai uinkin
en chaxuwan dani tadi tima en jatu inan
jawen yabukui xanakubainkin benimakin ea yuikin:
‘Min juni pepaki’, ea wakubainimabuki.
21 Xanen ibu kushipa betsabun bakeishta ibu jayama
ichakawaibu jatubetans ichakawakatsi ikama
jaska en chakabu ekidi yuikin shinantidubu unain
en pepa besti ikunkainimaki.
22 Na jancha en dama yuiai en chanichakayadan,
en punyan ibubis teketan
en punti anua tsekei jau paninunwen.
23 Diosun ea kupikin tenemaya
jaskatan jawen kushipa en nematiduma
jawen en datejaidaii.
24 Unanuma jiwenun ixun oro mane ichapa ichawatan
jaki chiti inun ika en jawen kemukin shinanma ikunkainimaki.
25 Dayakunkaini inabu ichapa inun, mabu ichapa inun,
dayadubu ichapa inun, pei ichapa en jayabia
jaska shadabu ja shinain en jawen jawa keinsmajaidaki.
26 Badi jawen chaxa jawenduajaida kainkidanai inun
uxe babekei ewapai jawenduajaidadi uinkin
27 jawa june inun xabakabi en jatu kenwan taskaismaki,
en meken jatu meshanxunkinan.
28 Jakia Dios danankin badi inun uxe en kenwanmiswen taexun
Dios nai anua eki sinata chakayamakin
ea kupitiduki, unanbiai en jaki pechiadan.
29 Jabu eki sinataibu chakabun jatu achia bika teneaibu
jatu uin jatukidi shinan chakama en jatuwen nui bestimiski.
30 Eki sinataibu jau mawanunbun
jatukidi jancha chakabukin en jatu yupuismajaidaki.
31 Tsuada ebe jiweabun nawa betsa chaikea beaibu
jatuwen kemukin jatu ichakawanun ikaibu
32 ja nawabuwen nuikin jiwemanu jau uxayamanunbun
jatu mekekin en jiwe anu ixun en jatu uxanmiski.
33-34 Juni betsabun kanetan yudabuki datejaidakin
jatun chakabu junekubainmisbu keska wakin
eandi jawada june kanekin chakabuwatan en juneismaki,
tsua padanmadan.
Jamen en chakabuwen taea
enabu eki dakekin ea danantidubuwen taea
en jiwe bepu keyutan
en nishma dakaismaki.
35 Na eska en yuikubainai tsuanda jau ea ninkaxanun
jawen matu unanti wamati en kena ibubis netankin
en keneaii, bisha bisha akinan.
Jaska en kanekubainimakidi juni betsan jau kenetan
xanen ibubu inanunwen, jawen ea yuankin chitetidan.
Ea jaska waibun Dios kushipajaida dasibi binuatun
ea ninkamisxun ea medabewakin
jau ea kemanunwen.
36 Jaska ea chitebiaibu en kaneismawen taea ma keneabu
maiti keska ja kene sawetan dakeama en nikaunxanaii.
37 Xanen ibujaidatun bake keskai pepai
jawa chakabuma Dioski kematan
dasibi en akubidanai ja bebun nixun en yui keyuxanaii,
jawa dakeamadan.
38 Janu en yunumis mai udu pewakin
dasibi pe mekekubainkin
badi betsatian banayuama en juindukunmamiski,
jau ana mai pepayunun manakinan,
jau ea juni mawayamaxanunan.
39 Jamen tsuanda yunu en yumetsuima kasmai
en dayadubu padankin en jatu pe pakamaken
40 en bai anu xekiwan trigo ana jukuanma
jakia muxa besti benei inun
xekiwan cebadadi ana jukuanma
basi chakabu benekin
jau dasibi en yunu bai achikubainxanunwen”,
akin jawenabu nemai jawen janchawen Jobun yuinikiaki.
Capítulo 32-37 anu juni betsa Elihú jatu keska juni ewama bedunanwen taea jatun jancha ninkai pes tsauxun jatun jancha dasibi ninkatan ja juni dabe inun dabeki jatuki sinatakin jaska Jobun kaneima shinanmakin pewakatsis ikin jawa medabewatidumabia jancha jawenduawen yuikubainaya capítulo 38 anu Dios janchakin nemanikiaki.