30
Na jaska betsa betsapa en teneayadan,ikis juni bedunan
eki kaxetan ea usankanikiki.
Na jabu eki kaxeaibun
ibubu chikishbuwen taexun
uatian en jatu danankubainiki,
kaman keskabuwen taexun en chaxuwan midima
jau ea mekexunyamanunbunan.
2-3 Jatun epabu chikishi dayaisbumawen taea
jatun mekenen ea jawa dayaxunama ipaunibuki.
Jawa piti jayama bunijaidai jabu mapukubaini
janu tsua jiweabuma anuxun meshu medan
ji tapun xanabiaken pikin xedu xedu aki inun
4 ji pusi mukabiaken betsexun tapun betsa betsapa pukinkin
betsetan pikubainibuki.
5 Jabudan, juni yumetsubu keska wakin
jatuki sinatakin jatu danankin jau chai bununbun
jatu chibain sai sai ikubainkin
mae tibi anuxun jatu putakubainabu paxai
6 mananan maxax kini anu inun
maxax ewapabu mania anu jiwekubainibuki.
7 Jabu jaskai nuitapajaidai chaka muxa naman janus
icha mania kaxakubainibuki.
8 Ja yudabu jamenbudan, tsuan bakeki, iwanan, jatu unanbuma
dasibibun danankin chai jatu nichinkubainibuki.
9 Jakia ikis jatun bakebun ea dapixun ea yuain eki kaxekanikiki.
10 En besuki kemu michukin ea dananjaidakin
ana eki kemakatsi ikama benantaxun ea dainbainkanikiki.
11 Diosun en kushipa mebinkin ea dakewaya
tsuan jawa ea ana ninkakatsi ikama
eki ana meseabumaki.
12 Jabun ea danainbu ichapa bexun
ea jawen tin akatsi bidunwantan
chakabuwakin ea tenankatsis ikanikiki.
13 En xuxakatsis ibiaya ea yamawanun, iwanan,
en janu kai anu eki bai kebeanbuki,
tsuan ea jatu nemaxunamadan.
14 Maewan mishki kenebaunibu namakis
pudekin xui wanibu anu jikibidan
eanu butui ishchubidani mesebidan ea datekanikiki.
15 Mesejaidai en datekunkainaii.
Ekidi ibubis pe en shinankubainima ana en jaskamaki.
Unanuma en pe jiwebiakunkainima
nai kuin dunua yamakainmis keskai en ana jaskatan jiweamaki.
16 Isinin ea aka tenei nuitapai en ana jiwekatsi ikamaki.
17 Isin tenechakayamai en xauki dikabis jikixun
ea isinwankin jeneama meshu tibi en bika tenekunkainaii.
18 Diosun jawen kushipawen en tadiyabi ea tetsunxun
19 chi mapu inun mai mishpu keska ea wakin pupus anu ea putaimaki.
20 Diosuun, en mia medabewati yukabia
ea medabewakin min ea jawa kemamaki.
En mia ea a chakayamabia min ea jawa ninkamaki.
21 Ja dukun min ea bechipaibiakubainima
jakia ikis ea ana bechipaiama
min ea ichakawakubainaii.
22 Niwe kushipa keskawen ea benikin
min kushipawen ea bini bini akin min ea taaii.
23 Janu mawa buxanaibu anu min ea iyukatsis ikai en unaiin,
dasibi mawabu janu jatu mekekin min iyumis anudan.
24 Ja nuitapai jawa jayabumadan, eanan,
¿en jatu medabewama ikimamen?
25 Nuitapai jawada bika teneaibu inun
jabu jawa jayabumawen taea jatu uin
¿en jatuya kaxama ikimamen?
26 En jaska jatu medabewakubainimawen taea
en benimati manakabiaya
natian jaskawen min ea kupia en nuitapakunkainaii.
27 En juintinin bika tenei jawa juindukuanma
xaba tibi bika betsa betsapa besti en mekubainaii.
28 Badi chaxama anu en ana jiweama
isin chakabun ea achia
ana unanumama punu nuka bestia dasibibu bebunxun
‘Ea medabewakanwen’, iwanan, en jatu yukakubainaii.
29 Ea nuitapaidan, yuinaka kaman inu inun avestruzdan,
en jaibu inun en betsabu keska en jatu shinaiin.
30 En bichi ana meshui yuna tenei
en yuda xana bakakunkainaya
31 ja mimawati arpa inun tepedewewen ana benimama
isin pae tenekin en kaxa besti kaiain en ninkakubainaii.