Diosun unanepakidi Jobun xabakabi ana tapinikiaki, na janchadan
42
1-2 januxun Jobun Jehová kemakin yuikin:“Jamapai shadabu unan keyukin
dasibi min jaska akatsis ikai min atidu
betsan atidumadan, ma en mia unaiin.
3 En jawamajaidabia jaska min bechipaimis keska
min amis ninka pewadiama en janchashinaki,
jaska en jawa unanmajaidabiatun mia uinmaidan.
Kushipakin jaska dami betsa betsapa pepa min akubainmis
tapinkin ninkadiama en mikidi janchashinaki.
4 Diosuun, mian ea yuikin:
‘En mia jancha wai ea ninkawe.
En mia yukai ea kemadiwe’, akin
min ea yuixuki.
5 Uatian mikidi yusiainbu ninka bestikin jaska bestiwen en mia unankubainshinaki.
Jakia natian ibubis miki nukutan en beduwen en mia uiaiin.
6 Jaskawen taexun jawada mikidi en yuishina ana shinanma
en yamawakatsis ikaii, jau min ekidi jaska ana shinanyamanunan.
Na jabiatian mai kudu inun chi mapu anu tsauxun
mikidi en ana shinan betsa wakin taewaii”, akaya
Diosun Job duawakin ana jawen jamapai inanikiaki, na janchadan
7 Jobbe janchakunkaini keyutan Jehován Elifazdi yuikin: “En tsuma Jobun akubidanshina keskama ekidi chanima jancha man yuiamawen taea mia inun min jaibu dabeki en sinatajaidaii. 8 Jaskawen taexun na jabiatian 7 ina awa bene inun 7 chaxuwan bene katuxun en tsuma Job anu butankanwen. Man ja buxuan Jobun ea daewakin matun inabu tesenxun chiwen matun ina jidabi matu kuakin keyuxuntan Jobun matu medabewakin ea matu yukaxunaya en matu ichakawama ixanaii. En tsuma Jobun jancha chanima yuishina keska wama jaska man bechipaiai keska man ekidi jancha chakabubiashinken en matu kupiama ixanaii”, aka
9 janua Elifaz inun, Bildad inun, Sofar buxun jaska Jehován jatu yunua axuanbu Jobun Jehová jatu yukaxunaya Jobun yukai Jehován ninkaxunikiaki.
10 Januxun jawen jaibu dabe inun besti Jobun jatu yukaxunkin meneaya Jehován jaska Job pepawa jiwekunkainima keska ana duawakin jawen yuda xuxawatan uatian jayakunkainima keska wakin ana dabeki jawen jamapai Job inanikiaki. 11 Janua jawen betsabu dasibi inun, jawen puibu dasibi inun, jawen jaibuaibu dasibi inun, jatube janchanamekunkainima dasibibun Job ichabidan uin bexun jawen jiwe anua jabe besikin Jobbetan piti ichapa pikin jaska atimapa chakabu betsa betsapa Jehován inankin tenemakubainimawen taea jawen nuijaidakin medabewakin daewakin bestibu tibitun jatida pei jexe kadu inun oro mane meichikiti Job inanibukiaki.
12 Janua Job anibui badi ichapa jawen jenei jiwekunkainaya jaska uatian duawani binumakin dabeki keska Jehován Job ana duawakubaina jawen chaxuwan 14,000 inun, 6,000 camello inun, 1,000ti dabebainbaina ina bene jau ana pubeanma pe dayakubainunbun jawen jubu jatu mextemamis inun, 1,000 asno yuxan Job jayakunkaini 13 ja dikabi ana juni bake 14 inun ainbu bake 3 jatu ana bawadianikiaki. 14 Januxun jawen ainbu bake iyua kenakin: “Jemimáki”, atan ja kachu jawen ainbu bake kenakin: “Quesiáki”, atan jawen ainbu bake jawen jenea kenakin: “Queren-hapucki”, akin kenani 15 mai jidabi anua ainbu betsabu jawenduajaidabiabun Jobun ainbu bakebun jatu binunibukiaki. Januxun Jobun jawen mabu jaska jaya paxkaxunkin jawen ainbu bakebu inun jawen juni bakebu ma ewabuwen taexun mabu inun inabu inun jawen tsuamabu ichapa Jobun jatu inankin ibuwamatan
16-17 jatu jaska watan ana 140 año jiweyukunkainkin jawen bababu inun, jawen bababun bakebu inun, jawen bababun bababu jatu uinkubaini mestebujaidai unanuma Job mawanikiaki.