Jawen jaibu betsa Bildadin jaska shinain Job yusindianikiaki, na janchadan
8
1-2 Elifazin janchaxunkin medabewakatsi ibiajawen jancha ikun kayabimaken Jobun danankin ninkaxunama inikiaki.
Januxun Bildadin Job yuikin:
“Na jaska janchakin min yuikubainaidan,
¿jatian min nesexanai?
Min janchadan, niwewan kushipa xunku ikai keska besti min waii.
3 Dios kushipajaida dasibi binuatun jawada jaska bechipaimisdan, betsa waismaki.
Jawen yunuti kushipa yununi kanekin jawa betsa waismadiki.
4 Ean en unanan, chanima min bakebun Dioskidi chakabuwaimabuwen taexun
Diosun jaska bechipaiama jatu kupimaki.
5-6 Jaskawen taexun Dios kushipajaida dasibi binua benadiwe,
jau miwen nuinun jaskakidi yukakubainkinan.
Min jaska jiwei pepakin uinmaya jawen pepawen mia medabewakin
jawada shadabu min ma benuima mia ana inanxanikiki.
7 Ja mabu min jayaimadan, jawama keska min jayaimaki.
Jakia ja binumakin chipu midima ana mia inantiduki.
8-9 Nukudan, nun dama kainshinaki,
jawa unanmadan.
Nukun xenipabu uatian jiwekubidanibu miyui ninkakin
nukun juchibudi yukakin
jabias en miki chaniai miandi min tapintiduki.
10 Nukun xenipabu ma mawabianibun
jatun jancha ninkakin ichapa min tapinkubaintiduki.
11 Janida jene kexa anu ja basi betsa xachiwan inun
papiro ja una wati jukuin ewamiski.
12 Jakia kanidiama tsuan mexteamabia
jene netsuaya jawaida xanamiski.
13 Jaska keskai juni chakabubun Dioskidi ana shinanma
ja basi betsa xachiwan inun papiro jene jayamaken
xanamis keskai jatun shinan benumisbuki.
14 Jadakidida shinankin mestenwankatsis ibiamisbudan, babujaidabuki,
basnen pudun jawen yumen babujaida bexemis keskabudan.
15 Tsuabuda unanuma jiwekin mestenwankatsis ibiai
jawa kushipa jayabumaki,
basnen pudun yumen bexea kushipama keskabudan.
16-17 Juni chakabubudan, basi jemaintin anu jukuin bexekaini
badin yume wa jawen tapun chaipa mishkiki bexebiaibun
18 tsuada juxun ja basi janua mexashina tsuan unantidumaki.
19 Jaska keskai juni chakabubu
jamapai dasibi jayabiashina keyumiski.
Jakia jawen xantukun basi
betsa ana benemis keskai
juni chakabu betsabudi ana jiwetiduki.
20 Diosunan, yudabun jawa chakabuwaisbuma
medabewakin jawa jatu jeneismaki.
Jakia junibu chakabudan, jawa jatu medabewakin benimawaismaki.
21 Jamen miadan, Diosun ana mia benima inankin
mia usanmakin sai sai imaxanikiki.
22 Jakia miki sinatamisbu Diosun jatu dakewakin
ja juni chakabu jawenabube jiwea yamawaxanikiki”, akaya
Capítulo 9 inun 10 anu Job juinti nishmaxun jaska Dioskidi Bildadin yusinkin yuia danankin Jobun nemaniki.