5
yuikin: “Jobuun, ¿jadatu nai tsuman mia medabewakinmia kemaimenkain? Jatu sai atan manawe.
2 Tsuabunda yuda betsan mabu uin jawen kemui inun
tsuabuda jawaida sinatai unainsmapai debumisbuki.
3 Juni betsa mabu paipaimayakin jatu binuai en uinmiski.
Jakia chipu ja juni unainsmapa jawenabube jiwea
jawaida dasibi jabu yamai keyuimabuki.
4 Janua jawen bakebu jiweyuabu tsuan jatu medabewatima jiweabu
xanen ibubu ichaxun jatu ichakawakin bepadantan
ana tsuan jatu nemaxuntidumawen taexun
5 jatun bai anua jatun yunu bunikin jatu biankin
muxa anu mapubiaken bixun jatu piankin keyuabu
ja inun, jatun inabu inun jatun mabu bianun ika
jawen kemui jatuki sinatakubainimabuki.
6 Mai anua chakabu jamebi kainsmaki.
Jawada bika betsa mai anua jamebi taxnismadiki.
7 Jaska kadu kuabu jawen deken sa imis keskakin
yudabun chakabu tuekin bika betsa betsapa jatu tenemakubainmisbuki.
8 Min teneai keska ean tenekinan, jau ea medabewakin pewanun
Dios anu en chintunkeanaii.
9 Jatunan, jaska tsuan atidumajaida jatu jaba imakin
jawada shadabu ichapa Diosun akubainmiski.
10 Mai anu Diosun ui imakin yunumiski,
nukun bai anu yunu cha akinan.
11 Jabu keinsbuma shinan pepabu Diosun jatu xanen ibu wamiski.
Bika teneaibu janida paxawakin
janu pe jiwetidubu anu Diosun jatu pe adumiski.
12 Unanepa janchai yubakai padananainbu
jatun shinan jamen wankin Diosun jatu chakabuwamakin
jatu itimaska wamiski.
13 Juni unanepa jawen shinan chakabuwen yubakai padanananmisbu
Diosun jatu bextemiski.
14 Juni chakabubu badidi mapubiadan, bekun kai
me me akubainaibu meshu bekin jatu achia keskabuki.
15 Juni betsa jancha kushipa nupe kenujaida keskawen
janchakin jatu nuitapa wakin jatu ichakawabiaibun
Dios jatuwen nuikin jatu nemaxunmiski.
16 Diosunan, juni babubu medabewakin jatu shinan chankanwankin
ja ichakanikabun kexa jatu janbepukin nesewamiski.
17 Jau jiwei penunbun yusinkin
tsuada Diosun jatu nemakubaina shinan chankanmisbuki.
Jaskawen taexun Dios kushipajaidatun mia nemai jawen jancha jawa dananyamawe.
18 Ja dikabi ibubis Diosun mia detexun ja min dete jabiatun mia neaxanikiki.
Jawen mekenwen mia detekin chakanxun ibubis Diosun mia xuxa watiduki.
19 Jawen yusinti jancha min ninkakin chibankubainaya
mia mese mese wakin mia bika tenemaibu
Diosun jatu mia nemaxunxanikiki.
Jawa chakabu jau miki nukuyamanun
jaska wakin Diosun mia axunkubainxanikiki.
20 Piti jayama buni mawabaunaibun
Diosun mia medabewakubaina min mawama ixanaii.
Ja inun, janu detenameaibutian nupe chaipawen mia detenun ika ibiaibun
Diosun jatu mia nemaxunxanikiki.
21 Mikidi chakabu yuikin mia yuainbu Diosun mia nemaxunxanikiki.
Mia jaska nemaxunaya mese atimapajaida jubiaya min dateama ixanaii.
22 Buni teneaibu inun jamapai chakabu taxnibiabidanaya min usan bestixanaii,
yuinaka piananbuki jawa jatuki meseamadan.
23 Min xekiwan trigo bai anu
mishki kainkin mia itimaska wama ixanikiki.
Ja dikabi yuinaka piananbudan, min ina pepa keska
ikubainxankanikiki, mia jawa mese wamadan.
24 Minabu mibe jiweabu unanuma pe jiwei mabu ichapa jayakubainxankanikiki.
Janua min inabu dasibi min mekea min pe uinkubainxanaii,
jawa betsa benuamadan.
25 Min bababudan, pai ichapajaidaxankanikiki,
bai anu basi midimajaida benei pamis keskaidan.
26 Anibujaidai min ma mawa kemabia kushipai min benimakunkainxanaii,
xekiwan trigo ma jushinjaida tsekamisbu keskaidan.
27 Nukunan, jaska nun uinkubainmis nun ma tapianki. Chanima jabiaskaki.
Na jaska ninkakin ibubis mintsidi unanti wakin tapinkubainwen”, akaya