Jawen jaibu Elifazin Job medabewanun ixun jancha wanikiaki, na janchadan
4
1-2 januxun Elifazin Job jaskaya kemakin yuikin:“Jobuun, chanima tsuada mibe janchanun ika juxun
mia bika watiduki.
Jakia min janchai nun mia ninkai tsuan nun ana tenetidumaki.
Mia yuinun ninkawe.
3 Jaska miki nukudiamadan, tsuabuda jatun shinan babuaibu yusinkin medabewakin
min jatu kushipa wakubainimaki.
4 Chakabu wakin kane taewaibu pewakin
benimawakin min jatu mestenwankubainimaki.
5 Uatian datema ibiamis natian miadi isin tenei jawen taea
¿datekin min kushipa min ma benuamen?
6 Jaskai Dios duawai pe besti jiwekin chakabu danankubaini
min chintuanma ikunkainmis min chanimisdan,
¿ikis ana jaskama juinti babui min ma dateai?
7 Eska keska mia yuinun ninkawe.
¿Juni pepa bestichai jawen jamapai Diosun mebinkin yamawaidan, min ma uinimen?
Shinanwen. Diosun jaska waismaki.
8 Ean eskaibu en uinmisdan,
tsuabuda pubenbun chakabu tapintan
chakabuwakubainmisbun jabias chakabuwen jatun kupiti bimisbuki.
9 Ja yudabu jaskabudan, Dios jatuki sinatajaidakin
jatu xun akin Diosun jatu yamajaidawamiski.
10 Inu pubein tekeden tekeden ikai keskakin
juni chakabubu jancha chakabumisbu
inu xeta teke teke aka keska wakin
nesewakin Diosun jatu kupimiski.
11 Inawan yuinaka jania achixun pitima mawaya
jatun bakebudi sa iki keyumiski.
Juni chakabun bakebu jabiaskadiabainxankanikiki.
12 Unanxubida jancha betsa ea anu jikiai
baxexen ea yuiaibu en ninkashinaki.
13 Meshu medan yudabu uxabu
janua ea uxadia en namachakai uin
14 en datejaidaya dasibi en yuda ea saki saki imashinaki.
15 Niwe xunku ibidankin en besu ea matsi bebe akaya
en dani tubisi keyutan en datejaidaya
16 ea bebun dami keska nia uinbiakin
jawen besu en uin pewama dasibi jawa yuiama pesjaida nia
baxexen janchai en ninkaya
17 ea yuikin: ‘Juni pepajaidakinan, Diosdan, binutidumaki.
Medibi jas pepakinan, Diosun jatu dami wani
jabun Dios binutidubumadiki.
18 Ibubis jawen tsumabun
Diosun jau jatukidi pe shinanun, iwanan, jamen ea atidubuki.
Jabiaskadi wakin jawen nai tsumabun kanetidubudi Diosun unainkiki.
19 Mai mishpu mamaki mapu jiwe wamisbu keska
yudabu babujaidaki.
Masan chusha keska wakin yudabudi tenankin
Diosun jatu yamawaxanikiki.
20 Penama jatu detetiaxun
badi kaya jatu yamawakin
tsuan ana jatu shinantimawakin yamawamisbuki.
21 Jatun jiwea keyuidan, yumen mexte mexte aka keskaki,
jawa unanepa jancha tapindiama mawaidan’,
ea wa en ninkashinaki”, atan