Sofarin jaska shinain keska Job yusindianikiaki, na janchadan
11
1-2 Job juinti nishmaxun jaska Dioskidi Bildadin yusinkinyuia danankin Jobun ninkama iniki.
Jawen jaibu betsa Sofarin Job ninkatan yuikin:
“Min janchajaidakunkainxuwen taexun
jau tsuanda unankin mia kemanunwen.
Jaska shinain min jancha chaipajaidaxu keska,
chanima jancha jayamaki.
3 Jamapaikidi nuku yuikin jancha chakayamakin
min nuku pes tsaumaidan, ¿min jaskada shinain ikai?
¿Min jancha chakabuai tsuabunda mia ninkakin
kematidubuma daka min shinan ikai?
4 Jobuun, mian min shinanan,
ibubis min pepakatsis ikai min yusianwen min nuku yuixuki.
5-6 Jaskadada Diosun jau mia kemanunwen,
iwanan, en mikidi shinaiin.
Jawen unanepa jancha juneawen mia yusintidumenkain,
jaska mia tapinmadan, bikajaidaki.
Ninkawe. Jaska mia wakin min chakabu jayawen taexun
mia kupichakayamatidubia,
jaska mia bechipaiaiwen mia kupi bexmas waikiki.
7 Dios kushipajaida dasibi binuatun jawen shinan junejaidadan,
¿mianan, xabakabi min ninkatidu min shinain?
8 Diosun shinanan, nai binua keyatapajaida keskaki.
Kini uke medanjaida xankinjaida keskadiki, jawen shinanan.
9 Mai jidabi kesua keskaki.
Ianenwan kesuakea jaxpajaida binua keskaki.
10 Dios juxun tsuada achitan bichixun jawen kushipawen kupiaya
tsuan nematidubumajaidaki.
11 Tsuada padananain chanichakamisbu Diosun unanmiski.
Chakabu meaibu uinmiski.
Jaska jatu uintan jatu kupitiduma ¿min shinain?
12 Mae chaijaida ni medan asno jiwemis dami juni itidumaki.
Jabiaska keskadiai juni unainsmapa betsai damitan badikis unanepatidumadiki.
13 Min unanepajaida jiwekatsis ikaidan,
menan min shinan pe katutan Dios ea akin yuidiwe.
14 Jamapai chakabu shadabu mia inun minabun memisdan,
jawaida jenekin putadiwe.
ana jatubetan mekin bechipaiamadan.
15-16 Jaska puta keyutan ana jawa chakabu jayama
min besu xunpin xabakabi nia ana dakeama jiwei min dateama ixanaii.
Janua jaska ikis min teneai dasibi jakimatan
ana jaska shinanma unanuma min ikunkainxanaii,
ana jawa jawen nuiamadan.
17 Badi manananbi badi chaxajaidamis binumai
min benimajaidakunkainxanaii,
jawada min bika tenebiai
penakidani xaba jawenduakidanmis keskai jiwekunkainidan.
18 Diosun mia mekea mia jiweidan,
ja ikunwain unanuma min jiwekunkainxanaii,
unanuma uxai peidan.
19 Min jatu medabewatidu mia benai
mia anu bebidan bebidanbiakin
min juindukuin daka tsuan mia dateama ixankanikiki.
20 Jakia juni chakabubun tsuanda jatu medabewatidu
jamen benabaunkin
jani unanuma jiwetidubu jawa bechiama ixankanikiki,
jatun mawa besti manaidan”, anikiaki.
Capítulos 12 inun, 13 inun, 14 anu Sofarin jancha Jobun bechipaiama kaxe wakin yuikin: “Eandi en unandiaii. Jamapai shadabuwen man ea binuamaki”, akin Jobun Sofar nemanikiaki.
Capítulos 29 inun, 30 inun, 31 anu Sofarin jancha ikun kayabimaken Jobun bechipaiama yuikin: “Eandi en unandiaii. Jamapai shadabuwen man ea binuamaki”, akin Jobun Sofar ninkama inikiaki.