Mardoqueon Amán binunikiaki, na janchadan
6
jabias meshu medan xanen ibujaida Asuero jaskatan uxatidumawen taexun jaska xanen ibubun akubainmisbu miyui unaki kenekubainmisbu bitanxun jui kushipawen jau yuixununbun jatu yunua kaxun bitanxun miyui kene yui taewakin 2 xanen ibujaida Asuero detenun ika xanen ibu mekenikabu yununika dabe Bigtán inun Teres yubakaibu jatun jancha Mardoqueon june ninkatan xanen ibujaida banabimaima ja jakidi keneimabu yuixunabu 3 ninkatan xanen ibujaida Asueron jatu yukakin:—Mardoqueon ea medabewakin mekeimawen taexunan, ¿jawa manakukin duawakin man inainmamen?— jatu wa
jawen medabewanikabun kemakin yuikin:
—Tsuan nun jawa waxuanmajaida ikimaki— akabu
4 januxun Mardoqueo tenexkatsi jau anunbun jatu yunushina anu tenextidu Asuero yukanun ika jawen jiwe jemaintin kenekauna anu Amán dama jikiaya Mardoqueo duawakatsis ikin Asueron jatu yukakin:
—En jiwe jemaintin anu ¿tsua juxun ea manaimenkain?— jatu wa
5 uintani bexun jawen medabewanikabun banabimakin yuikin:
—Amánen mia manaikiki— akabu
jatu yunukin:
—Jau jikinun itankanwen— jatu wa
6 buxun iwekin Amán bichiabu xanen ibujaidatun Amán yukakin:
—¿Tsuada xanen ibujaidatun bechipaikin duawayadan, jaska waxuntidubumen? Jaska min shinain ea yuiwe— aka
Amánen jamebi shinankin: “Tsua xanen ibujaidatun duawakatsi ikimenkain. En ea bestiki”, iwanan, 7 kemakin yuikin:
—Ja juni duawakin 8 xanen ibun tadi min sawemis jau benunbunwen. Min jaki katsaumekunkainmis caballo xanen ibun oro maiti sawea jau bedianunbunwen. 9 Tsuada duawakin min kenwankatsis ikai min tadi sawematan min caballoki jau katsaumenun min xanen ibubu bexmasbu jadatuda pepa katuxun min tadi inun min caballo jau inanunbun jatu yunuwe. Min tadi sawematan min caballoki katsauntan maewan Susa namakis janu icha janchanamemisbu xaba ewapa anu caballo dispi xewexekeawen iyubaunkin jui kushipawen: “Ja juni xanen ibujaidatun bechipaikin duawaidan, naki”, akin jawenchains jabias jau yuikubaununwen— aka
10 ninkatan jawen jancha bechipaikin Asueron Amán yunukin:
—Jawaida kainkaini kaxun en tadi inun en caballo beabu jatu mebintan Judío nawa Mardoqueo en jiwe jemaintin kenekauana jikiti xui anu ma tsaua iyukin jabias min yuixu keska wakin ea duawaxuntanwen. Jaska min ea yuixu keska ea axunkin jawa kane taskama akin keyuwe— aka
11 dakeyabi xanen ibun tadi inun xanen ibujaidatun caballo jatu mebinbain Mardoqueo anu kaxun tadi sawemaxun caballo katsauntan maewan Susa namakis janu icha janchanamemisbu xaba ewapa anu caballo dispi xewexekeawen iyubaunkin jui kushipawen yuikin: “Na juni xanen ibujaidatun bechipaikin duawaidan, en eska waxunkubaunaii”, akin jawenchains yuiyatankin ana iweken
12 maewan anu imabaunkin jatu uinmakin keyutan caballokia butea xanen ibujaidatun jiwe jemaintin kenekauana jikiti xui anu Mardoqueo chintunkain ana tsauaya Amán jawaida kaini punu nukajaidai dake pae tenei tadiwen bepukua jawen jiwe anu kai jikitan 13 dasibi jaska watanai jawen ain inun jawen jaibuaibu jatu yui keyua jaska jatu yuia ninkatan jabun yuikin:
—Ja Mardoqueodan, Judío nawadukain. Xanen ibujaidatun Mardoqueo bechipaiaiwen taexun min kushipa min ma benukin taewaxuki. Mardoqueo min maematidumaki. Jakia min xanen ibu babutan dasibi min benuxanaii— akaibun
14 janchai menediabumaken jabiatiandi xanen ibujaidatun dayadubu bei jikixun piti pepa Esterin ma pewa anu jau jawaidakidanun Amán yuitan iyuabu,