—Jawada min ea yukakatsis ikai menan jawaida ea yukadiwe. En xanen ibun yunumis namakis paxkatan kasmai jawada min ea yukai en mia inantiduki— aka

3 kemakin Esterin yuikin:

—Min en xanen ibuki. Ewen benimakin jaska min ekidi pe shinain inun min ea bechipaiai eska en mia yuiai ea ninkawe. Ea inun enabu nuku detekin tenanxanun ika ma yubakashinabuki. Ea inun enabu nun mawayamaxanun jatu nuku nemaxunxanwen. 4 Ea inun enabu yamawakin keyukatsis ikin pei mia inanun, ixun mia padanshinaki. Dayadu esclavobu nuku wakin peiwen nuku mia jatu inainmabunan, eanan, en mia yuiama ikeanaii, na nukuki sinataitun jaska bechipaiaiwen jawen xanen ibu nuku chakabuwamaidan— aka

5 januxun Asueron yukakin:

—¿Tsuamen, jani ja jatun matukidi jaska shinankin yuima min ea yuiaidan?— aka

6 kemakin Esterin yuikin:

—Chakabuwai nukuki sinatajaidakunkaini juni chakabudan, na jabia tsaua Amánki— akai

ninkatan xanen ibujaida inun jawen ain kayabi bebunua datejaidai Amán jawa tukuama baxti ika dakaken 7 Asuero sinatajaidai benikaini januxun piai anua taxnikaini ainbuaibun jiwe jemaintin jua midima anu kaken janua: “Asueron ea tenankatsis ikai en unaiin”, ikin teke naxabakan anu Amán baxti ika dakaxun jau jawen bene nemaxunun jiwekatsis ikin Ester medabe ea akaya 8-9 janua jemaintin jua midima anu iaketantani chintunkidan jiwe naxabakan Asuero jikikidankin janu baxti ixun piaibu anu Ester dakaken ja dapijaida Amán danti ika uinkin ana jaki sinatajaidakin jui kushipawen Asueron yuikin:

—Ana ea bebunua inun en jiwe anuxun en ain kayabi ¿min chutanun ika ikimenkain?— aka

jawen jancha ninkatan xanen ibu mekenika betsan tadi tuaxwen Amánen buxka bepua jaska waya ja xanen ibu mekenika betsa jawen kena Harbonán xanen ibujaida yuikin:

—Amánen jiwe jemaintin anu januxun tsuada tenextidubu keyatapa 22 metro jaska Amánen jatu yunua ashianbu niaki. Mia medabewakin mia detekatsis ikaibu Mardoqueon mia banabimaima Amánen januxun tenankatsi jatu amashinaki— akaya

januxun Asueron jatu yunukin:

—Peki. Jaskakenan, janu jaki Amán tenextankanwen— jatu wa

10 Mardoqueo tenexnun ixun jatu yunua ashianbu anu Amán tenexabu jaska waibu unantan xanen ibujaida sinatajaidabiai maintan,