Xanen ibujaida bebun Ester kanikiaki, na janchadan
5
Xaba dabe inun besti binutan jawen xanen ibu tadi jawendua Esterin sawetan xanen ibujaidatun jiwe anu kai jemaintin kenekauna uke medan jikikain ja xanen ibujaida Asuero jawen tsauti anu tsaua ja dintu jikiti xui bepean anu Ester kakain nixun manaya 2 jemaintin anu jawen ain kayabi bechitan jaska bechipaiai uinmakin jawen xanen ibu unanti mane oro mestenti tsumabainmis Asueron jakidi sanan Ester tapikain jaki kemaxun jawen mane oro mestenti debu mekin detsuanyan 3 januxun jawen ain kayabi Asueron yukakin:—Esteriin, ¿min jaskada juamen? ¿Min jawa bechipai juamen? En xanen ibun yunumis namakis paxkatan kasmai jawada min ea yukai en mia ja inantiduki— aka
Esterin kemakin yuikin:
4 —Mia ja pimakin kenwankatsi piti inun nuxuti pepa ma en pewabidanaii. Natian ebetan pikatsis ikinan, Amándi min iyutiduki— atan taxnikainaya
januxun jawen dayadubu Asueron yunukin:
5-6 —Jaska Esterin ea yubaxu jau ebetan pi kanun Amán jawaida benatankanwen— jatu wa
buxun Amán itanabu jawen ain kayabi Esterin ma piti pewaxuna anu Asuero inun Amán bui jikixun
piaibun xanen ibujaida Asueron Ester yuikin:
—Jawada min ea yukakatsis ikai ea yukawe. En xanen ibun yunumis namakis paxkatan kasmai jawada min ea yukai en mia ja inantiduki— aka
7 Esterin kemakin yuikin:
—Ean eska besti shinankin en mia yukaii. 8 Ea bechipaikin ea uinmakin axunkinan, jawada en mia yukai min ea axunxanimenkain. Mia kenwankin piti en ma pewa meshukidi ebetan pi mia inun Amán man ana jutiduki. Jabiatiandi jaska min ea yukaxu en mia yuixanaii— aka pikin keyutan taxnibainaibun
Jakixun Mardoqueo tenexkatsi Amánen jatu pewamanikiaki, na janchadan
9 pikin yaniwatan Amán benimai pepe kainaya dasibibu jaki danti iki tininkubainaibun jakia xanen ibujaidatun jiwe jemaintin jikiti xui anu Mardoqueo tsaua jawa tukukauani beniama Amánen Mardoqueo jaskaxunai dainbainkin uinbaini jaki sinatajaidabiakin 10 jaska sinatai Amánen tsua uinmama kai jawen jiwe anu jikitan jau jawen ain Zeres inun jawen jaibuaibu jatu kenatanunbun jawen tsumabu yunua 11 buxun jatu yuiabu dasibi bei jaki nukui ichaibun ibubis kenkin jatu yuikin:
—Mabu inun pei midima en jayaki. En bakebu ichapabudi en jayaki. Xanen ibujaida medabewanikabu inun jawen xanen ibubu bexmasbu ea jatu binumakin en jabetan yunukubainxanun xanen ibujaida Asueron ea katuima ea besti en pejaidaki— itan 12 ana kenkin jatu yuikin:
—Ja dikabi kenwankin piti inun nuxuti pepa xanen ibujaida Asuero amakin en jabetan pinun jawen ain kayabi Esterin ea besti kenaxun pimaxuki. Jakia jaska bestima meshukidi nuku pimakatsis ikin ea ana yubaxuki. 13 Jakia xanen ibujaidatun jiwe jemaintin kenekauna jikiti xui anu ja Judío nawa Mardoqueo tsaua en uintantanaidan, ja dasibi jaska shadabu pepakidi en matu yuiaidan, enadan, jawamajaidaki— jatu wa
14 ninkatan jawen ain inun jawen jaibuaibu dasibibun yuikin:
—Jakixun tenexti ji keyatapa 22 metro jau anunbun ikis jatu yunuwe. Ma jaska wakin mia keyuxunabu meshukidi penama Mardoqueo min jakixun tenextidu xanen ibujaida yukaxanwen. Mia bechipaikin jawada min yuka mia amaxanikiki. Mardoqueo ma jatu tenexmatan ana jawa shinain bika teneama xanen ibujaidabetan pi min katiduki— akabu
jaska shinankin yuiaibuwen taexun Amán benimajaidakin jawen tenexti keyatapa jau anunbun jatu yunuken