Amánen yunuti jancha ninkatan Judío nawabu punu nukatan kaxakubainibukiaki, na janchadan
4
jaska dasibi Amánen ashian Mardoqueon ninkatan juinti nishmai keyuxun jatu uinmakin jawen tadi ushni ushni akin putatan jawen nui bika tenei unanmati tadi bexa sawetan chi mapu bitan jawen buxka anu mapu tukutan maewan Susa namakis anu kai taekaini nuijaidai kaxai in in ikunkaini 2 xanen ibujaidatun jiwe jemaintin kenebaunibu jikiti xuiki kematan tsuada tadi bexa sawea jikitidumawen taexun Mardoqueo jau jikiyamanun mekenikabun nemabu 3 ja dikabi provincia tibi anu xanen ibujaidatun jancha buabu jau Judío nawabu dete keyuxananunbun jatu banabimaibu Judío nawabun ninkatan datei juinti nishmajaidai samakei kaxa chakayamakin jatun beya chibankin midimabun jawen nui bika tenei unanmati tadi bexa sawe keyutan chi mapu mamaki dakayukubainaibunKaka chakabu ninkatan Esterin jawenabu medabewanikiaki, na janchadan
4 Esterin dayadu ainbuaibu inun jawen mekenikabu jubu mextenibun jaskabaunaibu tapintan Ester anu buxun banabimakin yuiabu Ester Mardoqueowen nuijaidakin jau tadi bexa pekatan tadi betsa sawenun Mardoqueo anu tadi pepa jau buxuntanunbun bumakin yunua buxuanbu jakia Mardoqueon jawa jatu mebinkatsi ikama dananxunwen taexun 5 juni jubu binibu Ester dayaxunkunkainmis jawen kena Hatac Esterin kena jua Mardoqueo jaskai ikai jau uinkin yukatanun Esterin yunua 6 xanen ibujaidatun jiwe jemaintin jikiti xui bebun maewan kushipa Susa namakis janu icha janchanamemisbu xaba ewapa anu Hatac kai Mardoqueoki nukuxun jaska Esterin yunuxu keska jabe janchakin yuka: 7 “Eskawen taea en ikaii. Asueron jaska jatu yunubaunshina inun Amánen jati jawen mane plata pei mekenikabu jatu inantan jawen taexun Judío nawabu dasibibu jau jatu tenankin yamawaxanunbun xanen ibujaida yubashinakiaki. 8 Jaska bestima eskadi en jayaki. Na jaska jatu yunushinabu inun Susa anu yunukin jatu banabimabaunshinabu naki. Na Ester ea inanxuntanwen”, iwanan, inankin dasibi yuitan januxun Mardoqueon Hatac yuikin: “Jamen betsadan, ibubis jawen bene Asuero anu jabi kaxun jabe janchakin ja xanen ibujaidatun nukunabu jau nuku medabewamanun Ester ea yuixunditanwen”, aka
9 Hatac chintunkain jaska Mardoqueon yuixu Ester yui keyua 10-11 Esterin kemakin Hatac yuikin: “Xanen ibujaidatun jatu kenama juni kasmai ainbun xanen ibujaida uinun ika jemaintin uke medan janu Asuero tsaumis anu ibubis jikiaibu jawen yunuti jancha jayaki, jawen taexun jatu detetidan. Janu Asueron jatu yunubaunai provincia tibi anu jiweabu inun xanen ibujaida dayaxunmisbu ja yunutikidi jabun unankanikiki. Jakia ja juni kenamabia jawen nuikin jawen xanen ibu unanti mane oro mestenti jaki Asueron sananbainaya jiwetiduki, jawa mekenikabun deteamadan. Jamen eadan, ma 30 xaba kaya ea kenamawen taea en jadi kai en jawen dateaii”, iwanan, “Na jabias jancha Mardoqueo ea ana yuixuntanwen”, akin ana Hatac yunua
12-14 Mardoqueo anu Hatac ana kaxun Esterin jancha yuiai ninkatan ana jau yuixuntanun ja juni yuimakin: “Nukunabu Judíobu dasibi tenanbaunxanaibu xanen ibujaidatun jiwe anu min june jiwea mia besti mekekin tenanma ixankanikiki. Jaska shinanwen. Natian min bene min jawa yuiama inun, nukukidi janchakin min nemamakenan, janiada mae betsa anua Judío nawabu medabewanun ika nawa betsa bexankanikiki. Jakia mia inun min epan enabu nun mawai keyuxanaii. Jaskawen taea min nuku medabewaxanun jawen ain kayabi mia wamakin Asuero mia katumaimabumenkain. Jaska en mia yunuxu janchatanwen, jawa dateamadan”, iwanan, “Na jabias jancha Ester ea ana yuixuntanwen”, akin Mardoqueon Hatac yunua
15 Ester anu Hatac ana kaxun Mardoqueon jancha yuia ninkatan Esterin ana jawen jancha yunukin: 16 “Jau ea samakexununbun kaxun nukunabu Judíobu Susa anu jiweabu jatu ichawatanwen. Xaba dabe inun besti inun meshu dabe inun bestidi jawa piama jawa nuxuama samakeaibun en dayadu ainbuaibu inun eadi nun jabiaskadiaidan. Samakei jenetan xanen ibujaidabe matu janchaxuni en kaxanaii. Jawen nemati jancha pemabiaken, ea detekatsis ikin jau ea jatu detemaxanunwen. Mawaki en dateamaki”, iwanan, “Na jabias jancha Mardoqueo ea yuixuntanwen”, akin ana Hatac yunua 17 Mardoqueo anu Hatac ana kaxun Esterin jancha yuia ninkatan jaska Esterin yunuxu keska Mardoqueon jawenabu jatu ichawatan yunua dasibi samakexunibukiaki.