Mardoqueo inun Amán eskanibukiaki, na janchadan
3
Uxe betsatian Agagin enabu Hamedatan juni bake Asueron Amán xanen ibu bexmasbiaken ana jawen xanen ibu xekakin katukin xanen ibujaida medabewai yununikabu dasibi janu yunubaunai anu jatun xanen ibu waxun 2 Amán juaya xanen ibujaidatun jiwe ewapa anu dayamisbu danti itan tininxun jau kenwankubainxanunbun xanen ibujaidatun jatu yunushinawen taexun jawenabun jaska wabiakubainaya jakia Amán juaya Mardoqueon kenwain jaki dateama jawa ja bebun jaki danti iki tinianma ikunkainaya3 januxun xanen ibujaida dayaxunmisbun Mardoqueo yukakin: “Amán kenwanma ¿jaskakin xanen ibujaidatun jancha chibankin min ixuanmamen?” ikin 4 xaba tibi jabias yukakubainabu jakia Mardoqueon jatu ninkama ikunkainaiwen taexun Mardoqueo jabun yunumis jaskai ikunkainai tapintan jawen shinan betsa wamanun ika Amán anu buxun yuikin: “Judío nawa Mardoqueon mia kenwain danti ikamaki”, akabu 5 ninkatan shinankin: “Chanima en dainbaina eki danti iki Mardoqueo tininxun ea kenwainsmaki”, iki Amán sinatajaidakin: 6 “Mardoqueo Judío nawakiaki”, iwanan, ma yuiabuwen taexun Mardoqueo besti kupikatsi ikama jakia janu Asueron jatu yunubaunmis anu jiweabu Judío nawabu dasibi tenankin jatu keyuxanun, iwanan, Amánen jatukidi shinankin taewaya
Judío nawabu dasibi jau yamawaxanunbun Amánen jatu yununikiaki, na janchadan
7 Asuero xanen ibukunkaini ma 12 año taekainaya ja dukun uxe jawen kena Nisán anuxun Amánen mukayabu ichawaxun Judío nawabu dete keyukin jau jatu yamawaxanunbun jadatuda uxe inun xaba jadatuda atidubu unanun, iwanan, mukayabun jawen jamapai unanti xau mexte númeroya dabe jau putanunbun jatu yunua jawen unanti putabu uxe 12 jawen kena Adar jawen xaba 13 jatu unanti wamai taxnia uintan katuabuwen taexun 8 Asuero anu kai jikixun Amánen yuikin:
—Provincia tibi janu min jatu yunukubainai anu jiweabube jusia yuda xuku betsa jiwekubainmisbu jatun beya betsabun beya keskama ja dikabi jaska min yunua ninkakin aisbumaki. Janu min yunumis anu jiwekubainaibu minadan, jaska pemaki. 9 Jaskawen taexun jau jatu yamawaxanunbun mian jaska pe min shinainan, yunukin provincia tibi anu min jatu banabima keyubauntiduki. Min jaska yunuaya janu min mabu inun min pei mekemisbu jiwe anu 330,000 kilo mane plata jas buxun en jatu mia adumaxunxanaii, inankuinkinan— aka
10 jaska wa ninkatan jawen meichikiti kena neya metsekexun Judío nawabuki sinatai Amán inankin 11 yuikin:
—Peki. Mane plata min ea inanun ika ikaidan, en biamaki. Minaki. Jakia ja nawa betsa xukuabukidi min ea yuixu jaska min jatu akatsis ikai keska axanwen— aka
12 kainkain ja jabias xabatian uxe ja dukun Nisán xaba 13tian xanen ibujaidatun kenexunika ichapa kenakin Amánen jatu ichawaxun maewan yununika tibi inun, provincia yununika tibi inun, yuda xukuabu xanen ibubu tibi jawen yunuti jancha jau jatu kenenunbun Amánen jatu yunua provincia tibi inun, yuda xukuabu tibitun jancha inun, jaska kenemisbuwen Amánen yunuti jancha keneabu xanen ibujaida Asuero jawen kena kenexunkin xanen ibujaidatun meichikiti kenayawen kene tibi Amánen netankin tsaminpakekin keyutan 13 janu Asueron yunuai anu jiweabu tibi anu kene bunikabu yunuti jancha bumakeakekin uxe 12 jawen kena Adar xaba 13tian janu Judío nawabu bedunanbu inun, chipashbu inun, anibu inun, yuxabu inun, bake mishtinbu inun, ainbuaibu dasibi jabias xabatian jatu detekin yamawatan jatun mabu shadabu jayabu jau bixanunbun Amánen jatu yununikiaki.
14-15 Xanen ibujaidatun jatu yunuawen taea kene bunikabu jawaida kainbaini buxun yununika tibi inun xanen ibubu tibi jawen yunuti jancha jatu inanbaunabu ja xabatian Judíobu dasibi detekatsi jau pewanunbun provincia tibi anu inun yuda xukuabu dasibi tibi anu jatu banabimakin keyutan januxun janubi xanen ibujaidatun mae ewapa Susa anu jabias yunuti jancha jatu banabimadiabaunabu, yuda ichapa jaskatima itimaskabaunaibun jakia unanuma xanen ibujaida Asuero inun Amánen uva vino akaibun,