—Jawen ain kayabi bena nukun xanen ibujaida bixunkin chipash jawendua jawa chutanamediama nun jaska benaxunbauna peki. 3 Chipash jawenduabu katuxun na maewan Susa anu ja ainbuaibun jiwe ewapa jawendua nukun xanen ibujaida jaya anu jau jatu iwenunbun provincia tibi janu yunumis anua juni pepabu Asueron jau jatu katununwen. Januxun jabun chipash jawenduabu katuxunimaxun ma jatu iweabun ainbuaibu mekenika Hegai jubu binibutun jau jatu mekekubainxanun nun yunutiduki. Jawen jawendua wati dauwen Hegain jatu pewakubainkin 4 chipash jawendua betsabu binua bechipaijaidakin Vastin xantukun jawen ain kayabi wakin Asueron katutiduki— itan Asuero anu buxun jabias jancha yuiabu Asueron jatun shinan bechipaikin:

—Man ea jaska waxuntidubuki— jatu wa

5 maewan Susa anu juni betsa Judío nawa jawen kena Mardoqueo jiwea jawen epan kena Jaír inun, jawen juchin kena Simí inun, jawen juchin epan kena Quis na dasibi Israelin juni bake Benjamínen xenipabu inibukiaki. 6 Jerusalén anua Judán xanen ibu Jeconías inun jawenabu Babilonia anu xanen ibujaida Nabucodonosorin jatu iweaitian Mardoqueon xenipabu jatube bedianibukiaki.

7 Mardoqueon jawen pui nantakeatun ainbu bake jawen ibubu ma mawanibu Mardoqueon jawen bake keska wakin yume waima chipash jawenduajaida jawen Judíon janchawen kenadan, Hadasábiaken Persia nawan janchawen kenakin: “Esterki”, akubainibukiaki.

8 Maewan Susa anuxun xanen ibujaidatun jancha banabimakin keyuabu chipash jawenduabu katukin Esterdi jatube katuxun xanen ibujaidatun jiwe betsa betsapa mishki kenebaunibu anu chipashbu jatu iyuxun ainbuaibun jiwe anu jau jatu medabewakubainxanun ainbuaibu mekenika Hegai inankin chipashbu mekemabu 9 Ester pepa jawendua besti ikunkainkin Hegai bechipaimakubainaiwen taexun jawen jawenduawati dau shadabuwen jawaida daunkin taewakin januxun piti pepasdi pimakubainkin ja dikabi jau Ester medabewakubainunbun 7 dayadu ainbu pepabu xanen ibujaidatun jiwe anua katuxun jatu yunuxun ainbuaibun jiwe dintu pepa anu Ester inun jawen 7 dayadubu jatu maewaxun Hegain jatu jiwemakubainaya

10 jau xabakabi janchai: “En Judío nawaki”, ikin jau yuiyamaxanun Mardoqueon Ester yunushinawen taea jawenabu inun jawen ibubukidi Ester janchakin jawa yui taskamaken 11 janua jaska Ester pewakubainkanimenkain, ninkanun ika xaba tibi ainbuaibun jiwe jemaintin anu Mardoqueon jatu dainbainkin uintantanaya

12 12 uxe jawen jawendua wati dau chipash jawendua tibi jatu daunkubainkin ja dukun 6 uxe jatun yuda tibi xeni jawen kena mirrawen jatu dapuxkubainkin keyuxun ana 6 uxe jatun yuda tibi xeni ininipa inun xeni teipa jaska ainbu jawen imiswen ana jatu dapuxkubainkin ma keyuken chipash jawendua bestibu tibi xanen ibujaida Asuero bebun butan butankin 13 ainbuaibun jiwe anua xanen ibujaida anu kakin jawadawen chipash tibi daukainkatsi ikin jawada jatu yuka jawa jatu nemama ikaibun 14 xanen ibujaidatun jiwe anu ka meshu medan Asuerobe chutanametan penama butukaini ainbuaibun jiwe ewapa teke betsa anu chipash tibi iyutantankin Asueron ainbuaibu jawen ain kayabima mekenika Saasgaz jubu binibun jau jatu mekekubainxanun janu nichianbu chipu xanen ibujaida anu ana butidubuma jakia chipash betsawen Asuero benimakin jawen kenawen ana jatu kena chipashbu ana butidubu ipaunibukiaki.

15 Mardoqueon epa betsa Abihailin ainbu bake Ester jau jadi Asuero anu katanun jawen medabewanikabun Ester pewakubainaibun Esterin dasibibu jatu pe shinanmakubainaiwen taexun ainbuaibu bebunkidi jaska iki kai jatun mekenika Hegain yunua besti Ester jabe iki kaya 16 Asuero xanen ibui 7 año kai 10 uxe jawen kena Tébet keyudiamatian xanen ibujaida Asuero anu jau jawen yuda uinmai kanun jabun Ester iyuabu 17 Ester jawendua Asueron uinkin chutaxu jaska ainbuaibu jatidi bechipaibiakubainkin jatu binumakin Ester bechipaijaidaya chipash jawenduabun Asuero benimawakubainimabu jatu binukin Esterin Asuero benimajaidawa xanen ibun oro maiti sawemaxun Vastin xantukun Ester katukin jawen ain kayabi wanikiaki. 18 Chipu jadatuda uxe anu jau Ester kenwankubainxanunbun jabun medabewai dayaxunmisbu inun jabe yununikabu xanen ibubu bexmasbu Asueron jatu chanima beabu jatu besimakin Asueron jatu pimakubainkin uxe tibi provincia xanen ibubu tibibun Susa anu ja pei pakamisbu ana ichapa jatu pakamama jatu eskadabes waxunyua pakayukubainaibun januxun xanen ibu pepakin jawa yaushiama tsuabuda jawada jamen inankuinkatsis ikin inankuinti ichapa Asueron jatu paxkaxunbaunikiaki.

19 Ainbuaibun jiwe jawendua betsa anu chipash jawenduabu iyutantanaibutian xanen ibujaidatun jiwe mishki kenebaunibu jikiti xui beputi anu Mardoqueo tsauken 20 Ester katudiama Mardoqueobe jiwexun jawen jancha ninkakubaini Mardoqueon yusinkubainima chibain jawenabukidi inun jawen ibubukidi Esterin jawa yuidiamaken 21 xanen ibujaidatun jiwe jikiti betsa betsapa mekekubainmisbu detenamenika yununika dabe Bigtán inun Teres Asueroki sinatajaidakin detenun ika yubakaibu xanen ibujaidatun jiwe jemaintin jikiti xui dapi Mardoqueo tsauxun jatun yubakati jancha june ninkakin 22 tapintan jaska wakin detekatsis ikaibukidi Mardoqueon Ester yuia jawen bene Asuero anu kaxun jabun detenun ika yubakaibu Mardoqueon ninkaxu Esterin banabima 23 ninkatan jawen xanen ibu bexmasbun: “¿Jaska chanimamenkain?” ikain jau ninka pewanunbun Asueron jatu yunua buxun kushipawen yuka ibaunkin: “Chanimaki”, iwanan, tapinxun Asuero yuiabu detenamenika yununika dabe Bigtán inun Teres jabia dabe tenexxun jau duntanunbun jatu yunua jawen jancha ninkakin jawa kaneama axuanbu xanen ibujaidatun uianyan jaska xanen ibun akubainmis una anu jau jawenabun jatukidi tapinkubainxanunbun ja juni dabe inun jaska Mardoqueon medabewashinakidi jawen kenexunikatun jatu kenexunikiaki.