3-4 Ma 3 año Asuero xanen ibukunkainkin jawen mabu midima jawendua inun, jawen jiwe betsa betsapa ichapa anu jawen mae jemaintin anu miban jua jawenduaya inun, jaska dasibibu yunukubainai jawen kushipa ewakainai jatu uinmakatsis ikin jabe dayamisbu inun, xanen ibubu bexmasbu inun, Persia nawa inun Media nawa detenamenikabu xanen ibubu inun, provincia tibi anua yununikabu inun, yununikabu bexmasbu jau benunbun jatu chanima Susa anu bei ichai keyushinabun jatu duawakin jatu besimakin 180 xaba xanen ibujaida Asueron jatu pimakubainkin 5 jatu keyumatan chipu jawen jiwe betsa betsapa jawendua jemaintin anu miban juaya jawendua anu ana besi betsa wakin jawen mae Susa anu jiweabu dasibi yununika xanen ibubu inun xanen ibuma jatu chanima bei ichabu 7 xaba jatu pimakatsi pewanikiaki, eska wakinan.

6 Xanen ibun jiwe jemaintin betsa betsapa anu dau wakin jawendua wakin mankan juxupa chibu tibi anu mane juxupa plata meichikitiya jaki nexatan dispi nanke tashi midin jaki dispi meichikiti jaki kawenbainxun tadi pepa juxupa inun nanketapa puntebainabu mankan juxupa inun meshupa datsa pewanibu inun pau jawen naxpa yenkenjaida jemaintin tibi anu kekubainkin keyutan janu juindukuin oro maneki dakai baxti ika juindukunti inun plata maneki dakai baxti ika juindukuntidi jemaintin tibi anu tsaunbaunshinabu 7 bei ichabu jawen jatu amati oro kencha wanibu betsa tibiki uva vino nuxuti xanen ibu yaushiama jamen iki chakai jatu inanbaunkin jatu amakinan, 8 jakia jawen jiwe anua piti inun nuxuti jabun inanbaunmisbu jawen tsumabu yuikin: “Jabun akaibu inun akabuma ninkamas jatu inanyamakanwen”, akin jaska Asueron jatu yunushina jatu amakubainaibun 9 jawen benen jatu jaska waitian xanen ibujaida Asueron jiwe betsa anuxun jawen ain kayabi Vastin ja jatun bene beshianbun ainbuaibudi tadi jatube besikin pikubainaya

10-11 besikunkaini 7 xabatian vino akubaini xanen ibujaida Asuero paean benimajaidakin jawen ain kayabi Vasti chanima jawendua xanen ibu bexmasbu inun juni dasibibu jawen ain jawenduajaida jukin jau jatu uinmanun jawen ain kayabi Vasti xanen ibun maiti sawemabidankin jau janu tsauabu anu iwexununbun Mehumán inun, Biztá inun, Harboná inun, Bigtá inun, Abagtá inun, Zetar inun, Carcás, 7 juni jubu binibu xanen ibu dayaxunmisbu Asueron jatu yunua 12 Vasti anu buxun jaska jawen benen yunuxu yuiabu jakia xanen ibun yunuti jancha ikatsi ikama jatu danankin jawen ain kayabi Vastin jatu jawa ninkamaken chintunbidan Vastin jancha yuiabu ninkatan xanen ibujaida Asuero sinatajaidai min jaki kematiduma dakaxun 13 jaska jatun beyawen taea jatun jancha ja chibanti yunuti jancha inun, nemati jancha ja unanepabu jabu pepabun unanjaidaibube jaska jawen ainin kanexuken jabun yunuti unanjaidaibube janchanun, iwanan, jatu ichawa 14 unanepa betsabube ja xanen ibujaida jatube janchanamemisbu Asueron janu jatube tsauxun yunumis anu xanen ibujaida medabewai yununika bexmasbun Asueron jawa watidu yuimisbu jatu ichawa jabudan, juni unanepabu Persia nawabu inun Media nawabu 7 xanen ibu kayabibu Carsená inun, Setar inun, Admata inun, Tarsis inun, Meres inun, Marsená inun, Memucán bea maniabun 15 xanen ibujaida Asueron jatu yukakin:

—En jancha ea yuixunikabu en yunuti jancha buxun en ain kayabi Vasti yuibiabu ea jawa ninkama ea dananxuwen taexun nukun yunuti jancha inun nukun nemati jancha chibankin ¿tsuan jaskada man ea shinanxuntidumen?— jatu wa 16 unanepabu betsabube nixun Memucánen xanen ibujaida Asuero kemakin yuikin:

—Min ain Vastin mia besti danankin bedabinwanmaki. Mia inun, yununikabu inun, janu provincia tibi min yunumis anu jiweabudi min ain kayabitun jatube bedabinwankin mia dakewaxuki. 17 Jaska min ainen axu ainbu dasibibun ninkakin unanxun yuikin: “Jawen ain kayabi Vasti jau junun Asueron jatu yunua buxun yuibiabu jawen benen jancha danain jawa kama ishiankiaki”, ikubainaibuwen taexun ainbu dasibibun jakidi ninkakubainxankanikiki. 18 Ja dikabi Persia nawabu inun Media nawabu xanen ibubun jatun ainbuaibun jaska Vasti ixu tapinkin unantan jatun benen jancha ninkama chakabuwakin jatu akabu bechipaiama jatun bene tibi sinatakubainxankanikiki. 19 Jaskawen taexun yuikin: “Min ain kayabi Vasti udenkin min nichian ana mia bebun jupaketidumaki. Jaska watan jawen xantukun ainbu betsa ja binua katutan min ain kayabi min watiduki”, akin jaska min bechipaiai mian shinankin min ana yunu bena watiduki. Min jaska yunuaya jau maewakin betsa taskawayamaxanunbun Persia nawabu inun Media nawabun nemati jancha nukun una anu jau kenenunbun min jatu yunutiduki. 20 Janu min yunubainai anu min xanen ibun jancha jau unanunbun jatu banabimakin keyuwe. Jaskawen taexun ainbu mabuyabu inun ainbu mabu jayabuma tibitun jatun benen janchawen datekin ninkakubainxankanikiki— aka

21 Asuero inun unanepabu jabe janchanamemisbun Memucánen jancha ninkatan: “Peki”, ikaibun jaska jancha yuixu keska ja chibanbainti jau anunbun xanen ibujaida Asueron jatu yunua 22 janu Asueron yunubaunai anuxun jaska pe shinankin yuikin tsuabuda jatun jiwe anu jiweabu juni tibitun jaska bechipaiaibu jau yunukubainxanunbun jatu yunukin xukuabu tibitun jancha, jaska jatun jancha kenemisbuwen Asueron yunuti jancha jatu kenemaxuntan provincia tibi anu jawen xanen ibu bexmasbu jatu buma akeakenibukiaki.