—Min punu nukajaida en mia uiaiin. ¿Min jaskai ikai? Min isin teneamabia ¿jaskai jawa shinanjaidai min punu nukamen?— ea wa

ea jaska wakin datea dateyabi 3 en xanen ibujaida yuikin:

—¡Xanen ibuun, jiweyukunkainwen! Chanima na en punu nuka min ea uiainan, ja maewan anuxun en xenipabu maiwapaunibu jatun mishki jiwe inun kenebaunibu ma jatuki di iki keyuni inun jawen xui beputi tibi kuabidanibuwen taea en ana jatu uinsma jaska shinain en punu nukajaidaki— en wa

4 xanen ibun ea yukakin:

—¿Mia jaska waxunkin en mia medabewatidumen?— ea wa

jau ea medabewanun Dios nai anua en juintinin yukatan 5 en xanen ibu yuikin:

—Xanen ibuun, jaska en mia dayaxunai min ea bechipaiai keskadan, min en xanen ibun ekidi jaska pe shinankin min ea yunuadan, Judán mai pakea anu kaxun janu en xenipabu maiwanibu anu uinkin en jatun mae ana pewakin en jatu bena waxunkatsis ikaii— en waya

6 jawen ain xanen ibujaidadi ja dapi tsauken xanen ibun ea kemakin yuikin:

—¿Jadi kadan, jati año min chintunun ika ikai?— ea wa

ja baditian en juxanai en yuia ea nichinun ika xanen ibu benimakin:

—Katanwen— ea waya 7 januxun ean yuikin:

—Judán enabun mai pakea anu en kai jau ea nemayamaxanunbun Jene Éufrates ukedi badi kaikidi jiweabu jabun yununikabu xanen ibu bexmasbu yunukin ekidi ea jatu kenexunwen, jaska min bechipaiai keska wakinan. 8 Ja inun, min yunua betsadan, jatun ji xukua mekea jawen kena Asaf anu ea jatu kenemaxundiawe. Dios kenwanti jiwe beputi inun, mae mishkiwen kenebaunibu jikiti xui beputi en waxanai inun janu en jiwexanai anu en beputi en waxanai jau ea yunuxanun ea yuixunwen— akin en Dios nuikipajaidatun ea medabewaya shinankin en xanen ibu en yuia jaska en yukai keska ea medabewayamaki.

9 Kai Jene Éufrates ukedi badi kaikidi jiweabu yununika xanen ibu bexmasbu xanen ibujaidatun jatu kenexunshina en jatu inaniki. Ea jaska besti nichianma jau jabun ea mekebainun jawen detenamenikabu xanen ibu bexmasbu inun caballowen katsaumebainmisbu ichapaya ebe xanen ibujaidatun jatu yunuyamaki. 10 Israelin enabu medabewatanun ika en ma jikiken Horón anua Sambalat inun Amón nawa yununika bexmas Tobíasin ninkatan jawa jabun jaska bechipaiama inibuki, tsua juxun Israelin enabu medabewai uinkatsi ikamadan.

11 Janua kakunkaini atimas Jerusalén anu en jikishina janua 3 día juindukuntan 12 Jerusalén anuxun jawada en axanai Diosun ea shinanmaima jawa tsua yuiama meshu medan bututan en juni eskadabesbetan uin kai ea besti caballoki katsaumea kauani 13 jabias meshu medan napaku anu pukinibu jawen kena Dragónkidi jikiti xui anu june taxnikaini inun, janu chaka putamisbu jikiti xuikidi kawankin Jerusalén mishki kenebaunibu di akin keyunibu inun, beputi tibi kua keyunibu uinkubauni 14 janua kakunkauni unpax jabai beputi bebun kematan xanen ibun unpax aduti mai pukinxun mishkiwen kebenbaunibu anu niti itan mishki kebenibuwen taea jadakidi en caballo katimaken 15 yamenapun meshubiaken paxku debu chai dunkeatankin mishki kenebaunibu di anibu uin keyutan jabias bai nun kawen ana jawendi chintunkidani jabias paxku debu anu beputi kiniwen nun jikiniki.

16 Jaska shinain meshu medan en katanxu inun jaska yubakakatsi en uiantanshina nukunabuma nawa yununikabu xanen ibu bexmasbun ea jawa unanbumaken ja dikabi nukunabu Diosbe janchaxunikabu inun, jabu dukun nukun xanen ibubun enabu inun, nukun xanen ibu bexmas yununikabu inun, dasibi Judío junibu dayaxanaibu en jaska shinain en jatu banabimadiama iaketanshina 17 atimas jatu ichawatan yuikin:

—Jerusalén dasibi di akin keyunibu inun jikiti xui beputi dasibi kua keyukin nuku nuitapawanibu man unanjaidaii. Jau nukuki ana kaxeyamaxanunbun eki dasikanwen, Jerusalén mishki kenebaunibu di anibu ana benibaunkin bena wakin nun pewanunbunan— akin

18 jaska Diosun ea duawakin medabewashina inun jaska Persia nawa xanen ibujaidatun ea pe yuishina en jabu yuia jabun ea kemakin yuikin:

—¡Jaskakenan, dayai taedibaunankanwen!— iki dasibibundi jatu benimawakeakeaibun 19 en jatu jaska wai en jancha ninkabidan Horón anua Sambalat inun, Amón nawa yununika xanen ibu bexmas Tobías inun, Árabe nawa Guésem nukuki kaxekin nuku jancha chakabuwakin ea danankin yuikin:

—¿Man nuku jaska wanun ika ikai? ¿Persia xanen ibujaidatun jancha man daka danain ana jaki sinatakanai?— ea wabu

20 entsedi jatu kemakin:

—Dios nai anuatun nuku yunushinxun dayamakin dasibi nuku pe keyumaxanaiwen taexun nun jawen tsumabunan, maewan mishkiwen kenebaunkin nun taewaii. Jakia matudan, Jerusalén anu man ibia man nukubemaki. Man ana jawa nuku yunutidubumaki. Jawaida dasibibun matu jakimakin tsuan matu ana shinanma ixankanikiki— en jatu waniki.