4 ea jaska wabu jaska kaka ninkatan tsaua en kaxayamaki. Janua xaba jatida punu nuka samakekin Dios nai anuabe janchakin ea akin 5 yuikin: “Dios nai anua Jehováan, min mekenika Dios kushipa meseki. Tsuabunda mia bechipaikin min yunuti jancha inun min nemati jancha chibankin akubainaibuwen nuikin jaska min jatube yubakani jeneama shinankin min akubainaii. 6 Jaskawen taexun xaba inun meshu medan tibi Israelin enabu min tsumabu en mia jatukidi yukaxunkubainmis min ninkanun ikis en mia ana ea akaii. Nukubunan, natian nun unaiin. Israelin enabu mikidi nun chakabujaidakubidanimabuki, enabu inun eadan. 7 Min nuku uinbiaya nukudan, Israelin enabu nukun xenipabu inun nukubu chakabujaidai nun jiwekubidanimabuki. Jaska wakin min tsuma Moisés min kenemani min yunuti jancha inun, min nemati jancha inun, min yusinti jancha min nuku yuini jawa ninkakin jawa chiban pewama nun jiwekunkainaii. 8-9 Bebunkidi nukun xenipabu yuikin: ‘En jancha danankin man chakabuwakubainaibu nawa betsa betsapa mai jidabi manibaunabu anu en matu sa axanaii. Jakia ekidi shinan betsa watan en yusinti jancha ana ninkakatsis ikin man ana ea pe chibankubainaya kupikin mai kesua chaijaida anu matu nichinkin matu sa abianixun jadia iwekin januxun ean en matu unantiwamakin en kena netankin en medibi wakin katuni anu en ana matu iwexun jiwemaxanaii’, akin jaska min Moisés yuini shinaindawe, jakimamadan.

10 Nuku ichakawaibu jatu nemakin min kushipawen min nuku mekekubainiwen taea nun minabuki, min tsumabudan. 11 Mibe janchakin en mia ea akai ea ninkawe. Jehováan, en xanen ibu Artajerjes ewen nuimawe. Ja en xanen ibu ewen nuikin ekidi pe shinanyan jaskawen taexun en mia duawakatsi jaskakidi en mia yukaii”, anikiaki.

Ea Nehemíasinan, xanen ibujaida Artajerjesin nuxuti pewakin jawen kenchaki juxkexun dau jayamenkain, iwanan, ean dukun metan jawa dau jayamaken en amakubainiki.