Judán enabuki sinatai jatuki kaxenibukiaki, na janchadan
4
Jerusalén mishkiwen kenebaunibu di anibu nun ana bena wakin pewakin taewaya Sambalatin ninkatan pubein nukuki sinatajaidakin Judíobuki kaxei taekin 2 nukukidi jawen jaibuaibu inun Samaria anu detenamenikabu Sambalatin jatu yuikin: “Ja Judán enabu pitiuma mawabiaidan, ¿jaskada shinain dayai ikanimenkain? ¿Jawen mekenika Dios kenwankin inabu nami ana menuxunaibu nun jatu nematiduma dabanen jaska shinain ikanimenkain? ¿Jawen kene benawakin xaba bestichai keyutidubu shinankanimenkain? ¿Mishki datsa kene pewanibu menunibu anua jawen mishpu bena watidubumen?” jatu waya 3 ja dapi nixun Amón nawa Tobíasin kaxewakin jatu yuikin: “Benawakin keyubiabu mishki kene babui kaman inu jaki inakaina di ixanikiki”, ikin usankin jatu yuia,Nehemíasin Dios ea anikiaki, na janchadan
4 jabu nukuki kaxeaibu ninkatan ean Dios ea akin: “Nukun mekenika Diosuun, jaska nukuki kaxeaibu jatu ninkakubainwen. Nukukidi jancha chakabubiaibun jatun chakabu ana jatuki chintunmawe. Ja jatuki sinataibun jau jatu maemakin achixun jatun mae chaijaida anu jau jatu iyuxanunbunwen. 5 Jerusalén mishki kene benawakin pewabaunaibu jatuki enjen ikaibuwen taexun jatun chakabu buaxunama mia bebunua jatu jakimayamaxanwen”, aka
Ja jatuki sinataibu Judán enabuki yubakanibukiaki, na janchadan
6 mishki kene dayai jeneama akubaini nukunabu benimai shinan chankain dayajaidakin ma benibaunkin jawen keyatapa namakis wabainaibun 7 Jerusalén mishki kenebaunibu di anibu ana benawakin akubainkin xui wanibu bepukin ma taewaibun ninkatan Sambalat inun, Tobías inun, Árabe nawabu inun, Amónen enabu inun, maewan betsa Asdod anu jiweabu nukuki sinatajaidakin 8 jatun detenamenikabu jatu yunukin Jerusalén achikin detekin chakabuwaxanun ika dasibi icha yubakashinabuwen 9 taea jau Diosun nuku medabewanun Dios ea atan xaba inun meshu medan tibi jau jabun nuku uinkin nuku mekekubainunbun nun jatu nichinbauna 10 janua Judán enabun datekin ea yuikin: “Mishki di akin tude tude anibu ichapajaidawen taea nukun dayadu jin iki unanyamasaibuwen taea mishki kenebaunkin nun keyutidumaki”, ikaibun,
11 jabiatiandi nukuki sinataibu nukun mae medan jikibidan nun jawa uianma inun nun jawa unanma jabun nuku detebaunkin nukun daya nuku jenematidubuki. 12 Jakia nukunabu Judán enabu jatu dapi jiweabun jatun jancha ninkakin nuku yuinun ika jabu bebidan bebidankin nuku yuikin: “Matun mae kebauntan jikibidankin matu detexankanikiki. Uindakanwen”, nuku abidan abidanaibuwen 13 taexun jau jabun nuku uinxununbun mishki kene uke medan jiwe ibu tibi jawenabu junibuyabi jatun machatu chaipa kenujaida inun, jatun jashi chaipa inun, jatun pia ichapaya janu kene chanpa anu inun bexpa anu jau mapubaununbun en jatu yunua 14 jakia jabu buabuma dateaibu uin benitan xanen ibumisbun enabu inun, yununikabu inun, juni betsabu ean jatu yuikin: “Jawa dateyamakanwen. Nukun mekenika Jehová kushipapaida ja besti meseki shinankanwen. Jaska shinankubainkin matun betsabu inun, matun juni bakebu inun, matun ainbu bakebu inun, matun ainbuaibu inun, matun jiwe dasibi mekei nukuki sinataibu jatu detexunkubainkanwen”, en jatu wa, date maintan jaska en jatu yunua ikaibun
15 jatu nemanun ika ma dasibi nun pei keyuabun ja inun jabu jaska nukuki sinataibu yubakaibu Diosun jatu itimaska wakin keyua jabun nuku ninkatan jatun mae anua beabumawen taea nukubun mae mishki kenebauni janu bestibu tibi nun dayashinabu anu nun ana taeaibun 16 en jatu jaska wa en junibu namakis betsabu ana dayakubainaibun jabiatidi jatun detenameti mabuya jatun jashi inun jatun yuda nemati mane tuduakea inun, pia inun, jatun mane tadi sawexun dayaibu mekea mapubaunabun Judán enabu xanen ibu bexmasbun jatu medabewakubainaibun 17 janua jabu dayakin mishki benibaunaibu jabun mabu jatu iaxunaibu meken betsawen jatun machatu chaipa tsumatan janua meken betsaudi mishki inun mabu betsa jatu bixuntantanaibun 18 jabun mishki kenebauni dasibi dayaibudan, jatun machatu chinexeketiki usuan dayakubainaibun janua ja jatun trompeta nuku chan axuntidu ebe nikunkainaya 19 dayai nun paxkadiamaken xanen ibumisbun enabu inun, yununikabu inun, juni betsabu ean jatu yuikin: “Nukun daya ichapa chaipaki. Nukun mae kenebauni benanta paxkatan xukua tibi nun dayakanaii. 20 Jaskawen taexun nukuki sinataibu ma kemaibun ninkatan trompeta chan chan akaya nukuki dasi bukin matun detenametiya buxankanwen. Nukun mekenika Dios nukube detenamexanikiki”, en jatu wayamaki.
21 Nuku jaska wabiabu xaba tibi badi chaitanai mishki bebidan bebidankin manchinkubainaibu junibu jatidi dayaibun jatidi betsabun jatu kexexun jashi tsumaxun uinbauni mapui badi jikikainaya dayai jenekubainaibun 22 nun jaskaitian dasibibu nun dayakapabu inun nukun medabewanikabu junibu jatu yuikin: “Jerusalén jidabi nun dayai anudan, uke medan mekebauni meshu medan kexea jadi uxai inun badidi nun dayaitian nuku mekei jau mapukubainunbunwen”, akin jatu yunutan 23 jatu yunu bestiama eadi bika tenenun ika enabuya inun, en medabewanikabu inun, jabun ea kexea detenamenikabu ebe bumisbu jabubetan nukun tadi pekama bestibu tibi nukun chachitiya nun uxakunkainiki.
***************