—Epaan, epaan, min Israelin enabu mekenika kushipajaidaki, juni detenamenikabu ichapa keskadan— aka

15 ninkatan Eliseon xanen ibu yunukin:

—Kanun inun pia jatida bitan tsumawe— aka

kanun inun pia bitan ma tsumaken 16-17 Eliseon ana yunukin:

—Badi juaikidi janu uinti xui bepenwen— aka

ma bepenken Eliseon ana yunukin:

—Bishkukatsi kanun inun pia pewawe— aka

kanun inun pia xanen ibun pewaya Eliseo jawen pechiudia benikain nixun xanen ibun meken dabeki mepixun ana yunukin:

—Ikis bishkuwe— aka

pia bishkuaya jancha kushipawen Eliseon yuikin:

—Jehován mekenikan piaki, Siria nawabu maemati piadan. Afec anuxun jatu detekubainkin Siria nawabu min jatu tenan keyuxanaii— itan

18 chipu xanen ibu Eliseon ana yuikin:

—Pia ana tsumawe— aka

ana biken Eliseon ana yunukin:

—Ikis piawen mai bekush bekush awe— aka

xanen ibun dabe inun bestiki piawen mai bekush bekush akin jeneaya 19 jaska waiwen taea Eliseo jaki sinatakin yuikin:

—Jatu detekubainkin Siria nawabu maemakin keyukin yamawaxanun, iwanan, 5 kasmai 6ki piawen min mai bekush bekush ati shadaxuki. Jakia dabe inun bestiki mai min bekush bekush axuwen taexun dabe inun bestiki Siria nawabu min jatu maemaxanaii, jatu tenankin keyuamadan— atan

20 ana jancha wama Eliseo mawa januxun maiwanibukiaki. Año tibi Israelin enabun mai pakea anu Moab nawabun jatu ichakawai yumetsubu yumetsui bebidan bebidanaibun 21 uxe betsatian jatun jaibu ma mawa Israelin enabu junibun maiwanun, iwanan, mai pukinkin Moab nawa yumetsubu beaibu bechitan Eliseo mai wanibu anu jatun jaibu mawa datanbaini datei paxaibun, jakia ja juni mawatun yuda Eliseon xau mamaki janakin jawen xau metsamabu ana jiwei benitan inun kanikiaki.

22 Israelin enabu xanen ibu Joacaz jiweyuken Siria nawa xanen ibujaida Hazaelin Israelin enabu dasibi ichakawakin jatu tenankin yamawapanan 23 Abraham inun, Isaac inun, Jacobube Dios jatube yubakaniwen taea Israelin enabuwen nuikin jatu shinankin Jehován jatu medabewakin Siria nawabu jatu nemaxunkubainikiaki. Jatu chakabuwakin yamawakatsi ikama inun ja bebunua jatu putakatsi ikama ikunkainikiaki. Na jabiatian Jehován jatu mekediakubainikiki.

24 Janua Siria nawa xanen ibu Hazael mawaya jawen juni bake jawen xantukun Ben-hadad xanen ibunikiaki. 25 Janua Joacazin juni bake Joás xanen ibudiatan jawen epa mae mebinibu Ben-hadad kushipai anua Joás dabe inun bestiki jabe detenamekunkainkin ana jatu putamanikiaki. Jaska wakinan, Israelin enabun mae Joásin Ben-hadad detenamekunkainkin jatun mae ana jatu bixunkin jatu ibuwamanikiaki.