—Uian. Mibe jiwea janu nun uxamis dintu jashujaidaki. 2 Ana jiwe bena ewapa wakin jaxpa duakabi wanun ika Jene Jordán kexakea nuku tibitun ji bestichai chaipa nun mextei kai ¿min nuku yunutidumen?— akabu

Eliseon jatu yunukin:

—Butankanwen— jatu waya

3 betsan Eliseo yuikin:

—Jamaki. Nuku banawakaini nukube kawe— aka

kemakin:

—Peki. En matube katiduki— ikaini

4 Jene Jordán anu jatube Eliseo butua januxun ji mextekin taewaibun 5 juni bestichaitun ji mextekin taewaya due jawen bake anua jantsekekaini jenen pukuai uin sai ikin yuikin:

—¡Je ee. Pemaki! Yusinaan, na duedan, juni betsana en beanxuki. ¿En jaska waxanai?— aka

6 Eliseon yukakin:

—¿Jani kaya pukuxumen?— aka

janu pukuxu anu metua januxun Eliseon ji chaipa mextexun janu due pukuxu anu putakin udenxun dami wakin due nuntantan 7 yunukin:

—¡Nexewe!— aka mexunkain due tsumatan nexebaini benimabainkin ji buaibun

8 Siria nawa xanen ibujaidatun Israelin enabu maemanun ika ana jatube datenameaibu jawen detenamenikabu xanen ibubube icha jatube yubakai Siria nawa xanen ibujaidatun jatu yuikin: “June jadi buxun Israelin enabu detenamenikabu e imatan maemakin nun jatu keyuxanaii”, jatu wakin jadi janu junexanaibu jatu yui yubakai 9 jatun shinan jaskaibu Eliseon unantan Israelin enabu xanen ibujaida anu Eliseon jawen jancha bumakin yuikin: “Siria nawa detenamenikabu jadi junexun matu detekatsis iki manaibuwen taea jadi buyamaxankanwen”, jatu wa 10 Israelin enabu xanen ibujaida Eliseon yuia jawen jancha ninkatan Siria nawa detenamenika juneabu dunkekubainibukiaki.

11 Janua Siria nawa xanen ibujaida jaska shinantiduma jawen xanen ibu bexmasbu jatu kena ichabu jatu yuikin:

—Ea yuikanwen, jaska nun yubakamis tsua nukunabu kaxun Israelin enabu xanen ibujaida bebunkidi yuitantanmismenkainan— jatu wa

12 jabu bestichaitun kemakin yuikin:

—Xanen ibuun, nukun nun yuismaki. Jakia Diosun jancha yuixunika Eliseo Israelin enabube jiwexun jaska min june nuku yuimis inun jaska min uxatianua min janchai unantan Israelin enabu xanen ibujaida unanmakin jawen xanen ibujaida yuimiski— aka

13 ninkatan jatu yunukin:

—Jau Eliseo achinunbun en janu jatu yunutidu yuka ikaunkin unanti watankanwen— jatu waya juni betsan ninkatan jawen xanen ibujaida yuikin:

—Israelin enabu mai pakea anu mae betsa jawen kena Dotán anu ikis jiweakiaki— aka 14 janua jawen detenamenikabu ichapa caballoki katsaumebainaibu inun, caballon tadanbaintiki mapubainaibu inun, jatidi main buaibu Siria nawa xanen ibujaidatun jatu yunua june meshu medan bui Dotán anu jikitan mae jidabi kebauni nati ikabun 15 uxashini bestenkauan penamajaida Eliseon dayadu betsa butukainkin caballoki katsaumeabu inun caballon tadanbaintiki mapuabu ichapabu mae jidabi kebauni nati ikabu uin datekaini ana jiwe medan jikixun Eliseo yuikin:

—Yusinaan, nukun mae jidabi kexebaunabuki. ¿Ikisdan, nun jaskai?— aka

16 Eliseon yuikin:

—Nukun medabenanikatunadan, jatuna binuaki, jabutimadan. Jawa dateyamawe— iwanan,

17 Eliseon Jehová ea akin yuikin: “Jau jatu uinun en dayadun bedu betsa watan uinmawe”, atan “Jehováan, jaska en mia ea akaii”, aka Jehován jawen bedu bepexkin pewaxuna, chi keska katsaumeabu ichapajaida inun chi keska caballon tadanbaintiki mapuabu ichapajaidadi mati anu Eliseon jiwe kexekin keyubaunabu jawen dayadun uinbaunaya

18 achinun ika Siria nawabu chaima bei taeaibun Eliseon Jehová ea akin yuikin: “Siria nawabu beaibu min jatu bexux wakin betsa wanun en mia ea akaii”, aka

jaska Eliseon ea akai keska jabun shinan jaikaimas wakin Jehován jatu bedu betsa waken 19 jatu unantimaska wakin Eliseon jatu yuikin:

—Nadan, ja baimaki. Ja maewan man benaidan, nenumaki. Ja juni man benai anu matu iyunun ea chibanbainkanwen— jatu watan Samaria maewan anu jatu iyua 20 jikitan Eliseon ana dayuikin: “Jehováan, jau shinankin uin pewanunbun ikis jabun bedu pewakin betsa wawe”, aka januxun Jehován jatun bedu betsa waya bepexeai keskatan uinbaunkin: “¡Jabaa! ¡Nun Samaria medanki!” ikin uin dateaibun 21 Israelin enabu xanen ibujaidatun jatu uintan Eliseo yukakin:

—Epaan, dete keyukin ¿jatu tenanpa?— aka

22 jakia Eliseon kemakin:

—Jaskamaki. Jatu tenanyamawe. Pia inun machatu chaipawen detenamekin juni betsabu achitan ¿chipu man jatu tenanmismen? Nun jaska beyatidumaki. Jakia jatun detenameti dasibi jatu mebin keyutan piti inun mabex jatu pimakanwen. Jau yaniwatan jatun xanen ibujaida anu jau unanuma bununbun jatu nichinkanwen— aka

23 piti pepa inun mabex pepa ichapa ainbuaibun bawabu jatu inankubaunabu, pikin mabex akin keyuabu, Israelin enabu xanen ibujaidatun unanuma jatu nichian, jatun mae Siria nawa xanen ibujaida anu chintunbainaibun jaska wakin Israelin enabu Siria nawabun jatu date date atan jatun mai pakea ibuwakubainmisbu jatu jeneyubainibukiaki.