2 Año betsatian Siria nawabu yumetsui buxun Israelin enabu mai pakea anuxun jatu mese mese watan jatun mabu inun ainbu chipash yumetsubainkin iyuyamabu ja chipash Naamánen ainen dayadu esclava wayama 3 xaba betsatian ja Israelin enabu chipashan Naamánen ain yuikin:

—En tsuma min benedan, Samaria anu kaxun Diosun jancha yuixunika Eliseobe janchakin ea aka ja bichiki chamima xuxa watiduki— aka ninkatan jawen bene jabias yuia ninkadiatan

4 jawen xanen ibujaida anu Naamán kaxun jabias jancha ja chipash janchashinakidi banabimakin yuia 5 Siria nawabu xanen ibujaidatun kemakin yuikin:

—Peki. Ikis jatun xanen ibujaida en mia kenexunaii. En kene bui katanwen, jau mia xuxawanunan— aka

kakin 30,000 plata pei jexe inun 6,000 oro pei jexe inun 10 jaya besiti tadi pepa jawendua bui Samaria anu jawen tsumabube Naamán kaxun 6 jawen xanen ibun kene buma Israel xanen ibujaida inan bitan dintu betsa anu kaxun kene bepenxun uinkin jawen jancha keneshina yuikin: —En jancha uinkin jawen bichiki chamima jau min xuxawanun en xanen ibu bexmas Naamán mianu en nichiaiin, min uinunan. Ea xuxawaxunwen— akin

7 keneshina Israelin enabu xanen ibujaidatun ja kene uin keyutan jawen datekin jawen tadi ushnitan jawen anibu unanepabu jatu yuikin:

—Eadan, ¿en Dios keskamen? Jatun besti jiwea jatu inantan jatu mebinmisken en jaska keskadi watidu shinankin ja xanen ibun jawen juni betsa bichiki chamima en xuxawaxuntidu ea yunushinaki. Shinankin uindakanwen. Nuku jaska wakin nuku unanti waikiki, nukuki ana sinatakatsidan— jatu wa

8 xanen ibun kene uintan datekin jawen tadi ushnishina chanibaunaibu Diosun jancha yuixunika Eliseon ninkatan Israelin enabu xanen ibujaida anu jau jancha bununbun: “¿Jaskakin min tadi min ushnishinamen? Ja juni ea anu yunuwe, jau ea uinyununan. Jatun en Diosun jancha yuixunika Israel anu en jiwea jau tapinyununan”, jatu wa buxun xanen ibujaida yuiabu,

9 ninkatan Eliseo anu Naamán yunua jawen tsumabu caballo katsaumeabube jawen caballon tadanbaintiki mapua bui Naamán kai Eliseon jiwe bebun niti ika niken 10 ibubis kama jancha bunika Eliseon yunua kaxun Naamán Eliseon jancha yuixunkin: “Jordán Jene anu ka bututan 7ki nashi pukutantani chukitanwen. Min jaskaya min bichiki chamima xuxai min yuda sakada iki min xunpinxanaii”, aka

11 jaska wa ninkatan Naamán sinatajaidakin jawenabu yuikin:

—Taxnikidan eki nukutan ea dapi nixun jawen mekenika Dios Jehová ea yukaxunkin en bichiki chamima jawen mekenen ea mebaunkin ea xuxawaxanimenkain, iwanan, en shinanbiabidanshina jaska wakinan, ea mainwainmenkain. 12 Damasco anu nukun jene dabe Abaná inun Farfar Israelin enabun mai pakea anua keskamaki. Nukuna pejaidaki, dasibi jatuna binuadan. ¿Xuxanun ika nukun jene dabe anu en nashitidumamen?— ikaini

sinatajaidatan janua kaya 13 jakia jawen dayadubu ja dapi buxun yuikin:

—Xanen ibuun, ¿Diosun jancha yuixunikatun mia medabewakin: “Jawada bikajaidawen ea yunuwe”, ixun min jaskakidi shinain? Jawen jancha chibain min ikatsi ikamaki. Jakia: “Jene Jordán anu nashitanwen”, akin mia yunua nashitan min xuxatiduki, iwanan, mia yuixudan, jawa bikamaki. Iki kawe— akabu pes nibiabai

14 jabun pe shinain jatu ninkatan Jene Jordán kexa anu butua jaska Diosun jancha yuixunika Eliseon yunuxu keskai 7ki nashi pukutantani nexekeaya jawen bichiki chamima xuxai jawen yuda bedunan bichi keskai xunpin ana detsis mese neamaken 15 jawen yuda ma xuxa uintan Naamán inun jabe beshianbu Eliseo anu ana chintunbaini jaki nukunun ibaini Eliseo taxnia nia Naamán jaki kematan yuikin:

—Nenu Israelin enabu anu Dios Kayabi jayaki. Ikis en ikunwaiin. Chanima mai jidabi anu Dios betsa jayamaki. En min dayaduwen taexun jawada pepa mia inankuinun ixun en mia ea akaii— aka

16 Eliseon kemakin yuikin:

—Jehován ea uianyan en mia yubaii. Jaska min jawada ea inankatsis ikai en bitidumaki— aka

—¡Jaskama biwe! ¡Biwe!— akin jeneamabia jawa biama Eliseon jawa bikatsi ikama nemajaidakubainaya 17 jawa biama Naamánen unantan ana yuikin:

—Jaskawen taexun yushibubu kenwankin mabuwen duawakin inabu en ana kuakin menukin keyuama ixanaii. Min mekenika Dios Jehová besti kenwankin inabu kuakin en menukin keyukubainaiwen taexun Israelin enabun mai pakea anua saku ewapa dabe inun dabe mai mata waxun mula dabeki duntandabetan ¿en mae anu butanpa? Ji bau watan ja mai manchian anu jaki danti ika beti ixun Jehová besti en kenwankubainxanaii. 18 Jau ea kupiyamaxanun na besti Jehová ea yukaxunkubainxanwen. Yushibu Rimón kenwanti jiwe anuxun en xanen ibujaidatun kenwain kakin en punyan ea puntsunbainkin ea iyua en jabe jikikain en jabe danti ika beti ikunkainaya en chakabu Jehován jau ana shinanyamanun ea yukaxunkubainxanwen, jau ea kupiyamaxanunan— aka

19 Eliseon kemakin yuikin:

—Peki. Dios en mia yukaxunkubainxanaii. Dateama unanuma kai petanwen— aka mai bitan janua Naamán jawenabube kainkaini chaijaida kadiamaken 20 Eliseon dayadun shinankin: “Mabu pepa jamen beshianbu Eliseon jawa biama Siria nawa Naamán en tsuma Eliseon ma nichianki. Jehováwen en yubakaii. Jawaida chibain kushikaini jaki nukuxun jawada bewanaibu ean en bi kaii”, ikaini

21 kushikainkin Guehazín Naamán chibain ja ichun kushikainaya nasaukexun Naamánen uintan jawen caballon tadanbainti niti atan mananun ika butua niken ma jaki nukua Naamánen yukakin:

—¿Jawa kaya en chakabuwabidanai min chibain?— aka

22 Guehazín kemakin yuikin:

—Jawamaki. Jakia Efraínen enabun mati matipa anua Diosun jancha yuixunika bedunan dabe dama bei jikikanxu en mia yuiyunun en tsumapan ea yunuxuki. 3,000 plata pei jexe inun 2 jaya besiti tadi jawendua min jatu inankuintidukiaki. Jaska en mia yukayuxuki— aka

23 Naamánen kemakin:

—Jaska bestima menan 6,000 plata pei jexe jatu bixundiwe— akin jau binun yunujaidatan saku dabeki 6,000 plata pei jexe inun 2 jaya besiti tadi mistukin nanexun jau buxununbun jawen dayadu dabe iamaxun Guehazí bebun jatu nichian 24 kai Guehazí jatube mapeketan saku dabe jatu mebinxun nichian buaibun jiwe june anu adutan 25 chipu jawen tsuma Eliseo bebun ni tushiai yukakin:

—Guehazíin, ¿jadakidia min juai?— aka

Guehazínen kemakin yuikin:

—En jadakidi kamaki— aka

26 jakia jancha kushipawen Eliseon yuikin:

—Mia inun ika jawen caballon tadanbainti anua Naamán butuai en yushin mibe nixun dasibi en uinxuki. Pei jexe inun jaya besiti tadi jawendua min bixudan, pemaki. Yunu bai inun, uva nishi bexea bai inun, chaxuwan inun, ina awa inun, juni dayadubu inun, ainbu dayadubu ja peiwen min bikatsis ikai chakabujaidaki. 27 Jaskawen taea Naamán bichiki chamima xuxakainxudan, mikidi tekikunkainxanikiki. Mia bestimadan, min bakebu pakubainaibu ja bichiki chami ipapakexankanikiki— aka

ana dayaxunama Eliseon jiwe anua taxnikaini Guehazí jawen yuda jidabi ma chami keyua matsi tankia keska juxupajaida uinibukiaki.