—Baa, ea ninkawe. Ja juni jawenchains jukidan jukidani nukuki bamisdan, Diosun jancha yuixunika medibiki. En unaiin. 10 Nukun jiwe sapa xeni mamaki jawen dintu betsa jawena waxunanwen. Dintu waxuntan jawen dakati inun, jawen tapu inun, jawen tsauti inun, jawen bin nun pewaxuntiduki. Janu nukuki ana bai jua janu uxakunkaintiduki— aka jawen ainin jancha chibankin jaska yuia jau axununbun jawen benen jawen dayadubu jatu yunua jawaida axunshinabun

11 betsatian jua janu uxakin Eliseon 12 jawen medabewanika Guehazí yuikin:

—Ja ainbu ea yuixuntanwen— aka

kenaxuntana Eliseo bebun niken jawen medabewanika yunukin:

13 —Nukuwen nuikin nuku duajaidawamis nun jawa axunkin medabewatidumenkain, yukawe, medabewai Samaria xanen ibujaidabe jakidi nun janchaxuntidu inun detenamenikabu xanen ibube jakidi nun janchaxuntidumenkainan— aka

jabias jancha Eliseon jawen medabewanikan ainbu yuixuna ainbun kemakin yuikin:

—Nenu enabube jiwea en jawa jatube chakabumaki— abaini kaya

14 Eliseon jawen medabewanika ana yukakin:

—Ja ainbu jaskakenkain, ¿nun jawa axuntidumen?— aka

jawen medabewanika Guehazín kemakin yuikin:

—En unanmaki. Jakia ja ainbu jawa bakeuma inun jawen bene ma mestebuki— aka

15 Eliseon ana yunukin:

—Ana kenatanwen— aka

kaxun kenatana ainbu jua beputi kexa niken 16 Eliseon ainbu yuikin:

—Na año betsa juaiki na jabia uxeki juni bake kaintan min ikuxanaii— akaya

datekin kemakin yuikin:

—En xanen ibuun, min Diosun juniwen taea eki padanayamawe, min tsumakididan— aka

17 jakia jaska Eliseon yuikin banabimabainima ma bake bima tuyaken año betsaki juni bake kainma 18 xaba betsatian bai anuxun xekiwan trigo tsekaibu anu ja bake ewai keyatapadiamabia jawen epa uin ka 19 jadixun bakeishtan jawen epa yuikin:

—¡Adii, adii! ¡En buxka en isinjaidaii!— ikai

januxun jawen epan jawen tsuma betsa yuikin:

—¡Jawen ewa anu ea iyuxuntanwen!— aka

20 bakebainkin jawen ewa anu iyua jawen ewa xanchudamea tsaua isin tenei pikujaidatan badi manananbi bakeishta mawaya 21 Diosun jancha yuixunikatun dintu anu bakebain manaundi iyuxun jawen dakati anu janatan kainkainkin jawen beputi bepubaini 22 datejaidakain jawen bene kena jawaida jua yuikin:

—Diosun jancha yuixunika anu en jawaida kushikainkatsis ikai jadatuda nukun dayadu betsabe asna kushipa ea yunuwe, en jawaidakidankatsis ikaidan— aka

23 jawen benen yukakin:

—¿Jaskakin ikis min uin kakatsis ikai, uxe benatian inun juindukuntitian nun janu jabe ichamis ikis idiamabiakenan?— aka

kemakin yuikin:

—Ea jaska shinanxunyamawe— aka

24 jaska shinain keska jawen benen yunua jawen tsauti dabe kabekanti dabe kabekanxuna ainbu jaki katsaumea, jawen dayadu jachun kai ainbun yunukin:

—Jau asna jawaida kushikainun kusha kusha akubainwen, jau niti iyamanunan. En mia yuidiama niti imayamawe. En mia yunuaya besti niti imaxanwen— aka

25 asna kushikaini Mati Carmelo anu Diosun jancha yuixunika jiwea anu kemaibun janua Eliseon chai beiaibu uinkin jawen medabewanika Guehazí yuikin:

—¡Uinwen! Sunem anu jiwea ainbu juikiki. 26 Kushikain jaki nukuxun: “¿Min jaskadamen? ¿Min bene inun min bakedan, jaskadamen?” akin yukatanwen— aka

kushikain jaska yukabia yui pewama:

—En peki— abestibidani niti ikama 27 mati anu mapekea Eliseoki nukutan danti itan jawen bikedan dabe ikua, Guehazín mepamanun ikai Eliseon nemakin:

—Jawen juinti nishmajaidaki. Jaskakidana ikimenkain, meyamawe. Jaskaxu Jehován ea yuidiamaki— aka

28 januxun ainbun Eliseo yuikin:

—Xanen ibuun, bakeyakatsi en mia yukama iniki. Jaska mia yukama eki padanayamawe, iwanan, en mia yuiniki— aka

29 jawen shinan unantan jawen medabewanika Guehazí Eliseon yunukin yuikin:

—Jawaida petan kushikainkin en mestenti bibaini jawen jiwe anu katanwen. Tsuadakida min nukua jabe janchakin yukayamabaintanwen. Tsuanda mia yukai jabe janchakin kemayamawe. Jawen jiwe anu jikitan jawen bake daka anu en mestenti jawen besu anu janatanwen— aka Guehazí jawaidakaini kaya

30 jakia ja bakeishtan ewan Eliseo yuikin:

—Jehová jiwea inun min jiweawen taexun miauma nenua en kamaki, iwanan, en mia yubaii. Ea ninkawe— aka

jaska wa ninkatan Eliseo ainbube kaya 31 jaskaitian ja dukun bebuxun Eliseon mestenti Guehazín bakeishtan besuki janabia jatun jiwea inanma jawen bake jawa tukuamajaidaken chintunkaini Eliseoki nukuxun Guehazín yuikin:

—Jaska min ea yunua en abiaxu jawen bake jawa tukui besteanmajaidaki— aka

32 Eliseodi manaundi jawen dintu anu mapeketan jawen dakatiki bakeishta mawa meshan daka 33 Eliseo bakeishta daka anu jikikain jawen beputi beputan jau medabewanun Jehová dayuikin yukatan 34 jabe ma janchaxunwen taea ja daka anu jaki inai bakeishta mamaki beuxun bakeishtan kexa inun jawen bedu inun jawen meken mekin xeyuakeakea bakeishtan yuda xanai taeaya 35 Eliseon chibututan benitan Jehovábe ana janchai jawen dintu medan nikukui jenetan jawen dakati anu ana jaki inai beutan bakeishta ikua dakaken jawaida bakeishta bestein 7ti ashkin ashkin iki bepexeaya 36 Eliseon Guehazí kena, jawen dintu anu jikia yuikin:

—Jawen ewa Sunem anua ea kenaxuntanwen— aka

Guehazí kainkaini kaxun jawen ewa kena dateyabi ka, Eliseo anu jikia yuikin:

—Na ma ana jiweaki, min bakedan— aka

37 ainbu benimajaidakin Eliseo anu danti ixun yuitan jawen bake itan kainkainikiaki.