—Betel anu Jehován ea jadi yunuaiwen taea na jabianu bashikuyuwe— aka

jakia Eliseon kemakin yuikin:

—Jehová jiwea inun min jiweawen taexun en mia yubaii. Mimesti min kai en mia jeneamaki— aka

janua ja dabe Betel anu buaibun 3 janua Betel anua Diosun jancha yuixunikabu betsabu jiweabu kainbaini Eliseoki nukuxun yuikin:

—Jehován min juni yusinan mia ikis mebiainan, ¿min ma unain?— akabu

jatu kemakin yuikin:

—Jaa. Ma jabiaska en unaiin. Jakia matunan, jawa jatu yuiyamakanwen— jatu wa

4 januxun Elíasin Eliseo ana yuikin:

—Jericó anu Jehován ea jadi yunuaiwen taea na jabianu bashikuyuwe— aka

jawa ninkama Eliseon kemakin ana yuikin:

—Jehová jiwea inun min jiweawen taexun en mia yubaii. Mimesti min kai en mia jeneamaki— atan Jericó anu ja dabe ana buaibun

5 janua Jericó anua Diosun jancha yuixunikabu betsabu jiweabu kainbaini Eliseoki nukuxun yuikin:

—Jehován min juni yusinan mia ikis mebiainan, ¿min ma unain?— akabu

Eliseon jatu kemakin yuikin:

—Jaa. Ma jabiaska en unaiin. Jakia matunan, jawa jatu yuiyamakanwen— jatu wa

6 januxun Elíasin Eliseo ana yuikin:

—Jene Jordán anu ukedi Jehován jaudi ea yunuaiwen taea na jabianu bashikuyuwe— aka

jakia Eliseon ana kemakin yuikin:

—Jehová jiwea inun min jiweawen taexun en mia yubaii. Mimesti min kai en mia jeneamaki— aka

janua ja dabe Jene Jordán anu buaibun 7 50 Diosun jancha yuixunikabun jatu chibain jatu ichun buaibun ja dabe jabu bebun benanta mapuxun uiainbun Jene Jordán kexa anu Elías inun Eliseo nitan 8 januxun jawen yabukuti Elíasin pekatan sebikin chaipa watan jawen jene bekusha, jene dami jamebi tuax iki niti iken ja dabe mai tsusin anu pukebaini 9 kexa betsaudi kapukexun Elíasin Eliseo yuikin:

—En mia jenebaindiama jaska min bechipaiai en mia axuntidu ea yukawe— aka

Eliseon kemakin:

—Jehován mia medabewakin jawen yushin kushipa mia achimakubainmis keska jabias kushipa dabeki jau ea inankubainxanun jaska en mia ea akaii— aka

10 Elíasin shinantan yuikin:

—Jawama ea yukama itimaska min ea yukaii. En mia jenebainai min ea uianyan jaska min yukaxu Jehován mia medabewakin dabeki keska mia amakubainxanikiki. Jakia en mia jenebainai min uianmaken jaska min ea yukaxu Jehován mia inanma ixanikiki— aka

11 bai tanabaini jabe jancha dabekubainaibun jawaida jawen tadanbainti chi inun caballo dabeya chiya taxnibidankin jatu paxkadabebaini niwe kushipa shubi shubi ibainkin Elías nai anu ainibainaya 12 jaskakainai Eliseon uinkin jui kushipawen kenakin:

—Epaan, epaan, Israelin enabu mekenika caballon tadanbainti inun jawen katsaubaunti caballo detenamenikabu ichapabu en uiaiin— atan

janua Elías jaska kainima ana chintunkidanai uianma inikiaki.

Eliseon Elías ana uintidumawen taea nuijaidakin jawen tadi ushnikin namakis dis atan 13 januxun Elíasin yabukuti manaundi inakainkin tin abaina bitan tsumabaini Jene Jordán anu chintunkidan jene kexa nixun 14 ja kushipa jayawen Elíasin yabukutiwen jene bekushtan jamebi yuka ikin yuikin: “Elíasin mekenika Dios Jehovádan, ¿janimen?” ikaya jene dami jamebi tuax iki niti iken Eliseo ana pukebainaya 15 kexa betsaudi Diosun jancha yuixunikabu Jericó anu jiweabu jaska jene tuax atan pukebidani Eliseo juai uinkin yuikin: “¡Uinkanwen! Elíasin yushin Eliseo mamaki ma butuaki”, iake iaketan

jaki nukunun ika bui Eliseo bebun main di iki beutan 16 jabu Diosun jancha yuixunika betsan yuikin:

—¡Uinwen! Min dayadu nukubudan, 50 juni kushipabu nun jayaki. Jehován Yushinen Elías ainibiabainkin mati betsa anu jenebaina kasmai, paxku napaku anu pakebainamenkain. Min juni yusinan jau benatanunbun ¿betsabu jatu yunupa?— akabu

jakia Eliseon jatu yuikin:

—Jaskamajaidaki. Jatu yunuyamakanwen— jatu wa

17 jaska jatu yuibia jawa ninkama jawenchains yukakubainkin bikawabu atimas jatun jancha ana ninkakatsi ikama jatu yunukin:

—Peki. Jamen jaskatanun ika man ikanimenkain, jatu yunukanwen— jatu wa 50 junibu jatu yunuabu buxun Elíasin yuda bechinun ika xaba dabe inun besti benabiabaunabu jawa bechiabuma 18 Jericó anu Eliseo bashikushina anu chintunbidani jaki nukuabu Eliseon jatu yuikin:

—Eanan, ¿bebunkidi en matu yuiama ishianmen? man buyamanunbunan— jatu wanikiaki.

19 Jericó anu jiweabun Eliseo yuikin:

—Jaska na mae anu nun jiwea min uiainan, jiwea peki. Jaskabia nukun unpax chacha jabai chakabuki. Unpax chakabuwen taea nukun yunu benebiai jawen bimi mawaida ismaki, mai chakabuwen taeadan. ¿Jaska watan min nuku medabewatidumen?— akabu,

20 Eliseon jatu kemakin yuikin:

—Kencha benaki sau mata ea bexunkanwen— jatu wa, bexun inanbu 21 unpax chacha anu kaxun Eliseon sau ja unpax medan di akin yuikin:

—Eska Jehován yuikiki: “Ana matu tenanma inun matun bai anu jau yunu bimi ana chakabuyamaxanun matun unpax pewakin en matu jawama waxunxuki”, akin Jehován matu axunxuki— jatu wa

22 jaska Eliseon jatu yuima keska Jericó anua jatun unpax pejaida ikunkainikiaki.