2 Reyes 1

2 REYES

Ocozías jaskatan mawanikiaki, na janchadan

Ahab ma mawaimaken jawen bake Ocozías xanen ibuaya Moab nawabu Israelin enabuki sinataibun 2 janua xaba betsatian Samaria anu Ocozías jawen jiwe jawendua anu manaundi tapa betsa anua janu niwe jikiti xui uinbaunti anu tsaua jawa shinanma kauani main tin iki chakamana chakayama isin tenei dakaxun jancha bunikabu jatu kena beabu jatu yunukin: “Ecrón anuxun jatun mekenika yushibu Baal-zebub en chakamana en isin teneai en xuxaimenkain, ea yukaxuntankanwen”, jatu wa buaibun, 3 jabiatiandi Jehován nai tsuman Tisbé anu jiwemis Elías yuikin: “Samaria anua jancha bunikabu xanen ibujaida Ocozíasin ma jatu yunua bekanikiki. Jatuki nukutanwen. Jatuki nukutan jatu yukatanwen: ‘¿Israelin enabu mekenika Dios jayamamen, ja mae Ecrón anu nawabun yushibu Baal-zebub anu man yuka ixuin kaidan? 4 Man jaskabiakidanaya Jehován ea yuikin: Eska Ocozíaskidi yuikiki: Ja min dakati anua min isin teneaidan, jabianua ana beniama min mawaii, mia waikiki’, akin ea yuixuntanwen”, aka

jaska Jehován nai tsuman yunua Elías ka jatuki nukuxun jaska Jehován yuixu jatu yuia 5 jawen jancha ninkatan jatun xanen ibu anu jawaida chintunbain ja bebun mapuabu Ocozíasin jatu yukakin:

—¿Jaskatan man jawaida chintunkidanai?— jatu wa

6 jabun kemakin yuikin:

—Nun kai bebun juni betsa nukuki nukuxun nuku yuikin: “Jadixun xanen ibun matu yunuxu anu ana chintundibainkanwen. Jaska Jehován ea yuixu matun xanen ibu yuiditankanwen: ‘Israelin enabu mekenika Dios jayamawen taexun Ecrón anu nawabun yushibu Baal-zebub anu jau min tsumabun mia yukaxununbun min jatu yunuxuwen taea min dakati anua beniama min mawaii’, akin Jehován eska yuikiki”, akin nuku yuiawen taea nun chintunxuki— akabu

7 xanen ibujaida Ocozíasin jatu yukakin:

—Ja juni taxnikidan matuki nukuxun jaska jancha matu yuixudan, ¿jaskada ixumen?— jatu wa

8 jabun kemakin yuikin:

—Ja juninan, chaxuwan bichi tadi inun bichi nanexeketi sawea nun uinxuki— akabu

xanen ibu Ocozíasin unankin jatu yuikin:

—Jadan, Tisbé anu jiwemis Elías matuki nukuxuki— jatu watan 9 janua Elías uinkanxu anu jau butanunbun Capitán betsabe 50 detenamenikabu yunua bui mati janu Elías tsaua anu kemaxun Capitánen yuikin:

—Diosun juniin, xanen ibujaidatun mia kenaikiki. Bututan xanen ibu anu ebe kayuwe— aka

10 Elíasin kemakin yuikin:

—En Diosun jancha yuixunikadan, na jabiatian man uiaiin. Nai anua chi jede ji ibidan matu kuakin yamawaikiki— akaya

jawaida nai anua jatuki chi jede ji ibidan jatu kuakin yamawaya

11 jatu jaska waxu juni betsan uinbain xanen ibu Ocozías banabima jau jabundi itanunbun Capitán betsadi 50 detenamenikabube xanen ibun jatu yunudia bui kemaxun Capitánen yuikin:

—Diosun juniin, xanen ibujaidatun mia kenaikiki. Manama jawaida bututan ebe kayuwe— aka

12 Elíasin kemakin yuikin:

—En Diosun jancha yuixunikadan, na jabiatian man uiaiin. Nai anua chi jede ji ibidan matu kuakin yamawaikiki— akaya

jawaida nai anua jatuki chi jede ji ibidan jatu kuakin yamawadiaya

13 jatu jaska waxu juni betsan ana uinbain xanen ibu banabima jau jabundi itanunbun Capitán betsa 50 detenamenikabube xanen ibun jatu yunudia bui ja mati anu kema jawa yuiama jawen 50 detenamenikabu jatu bashitan Elías tsaua anu mapekekain ja bebun danti ixun ea akin:

—Diosun juniin, nukuwen nuiwe. En jiwea inun na min 50 tsumabu jiwea shinain nukuwen nuiwe. 14 Jabu dukun nai anua chi jede ji ibidanaiwen Capitán dabe jatun detenamenikabube menui yamakanxuwen taexun min medabewati en mia ea akaii, jau min nukudi jaska wayamanunan— aka

15 januxun Jehován nai tsuma kushipatun Elías yunukin:

—Dateama jabe kaxun uintanwen— aka

Elías benitan Capitánbe butukaini xanen ibujaida Ocozías uin kaxun 16 yuikin:

—Jehován eska mia yuikiki. Ecrón anu nawabun yushibu Baal-zebub anu jau mia yukaxuntanunbun jabun min jancha yuinikabu min jatu yunukin Israelin enabu mekenika Dios tsuan mia yukaxuntidumaken min jaska shinanshinawen taea min dakati anua ana beniama chanima min mawaii— atan Elías kaken

17 jaska Jehován Elías yuimashina keskai Ocozías mawanikiaki. Jaskaitian Judán enabu yunui Josafatin juni bake Joram xanen ibui 2 año jatu ixuanyan janua ja Ocozías jawa juni bake jayamaken Ocozías xantukun jawen betsa Joram Israelin enabun xanen ibujaidai taenikiaki.

18 Israelin enabu xanen ibujaidabu ikubainaikidi una betsa medan jatuki kenemisbu jawen daya betsa betsapa Ocozías jiwexun akubainikidi jakidi kenenibu jayaki.