—Janu badiantian jua janu juindukuin en jiwemis dapi min uva baidan, ea inanwen, nun bianananunan, en uva bai betsa pepajaida en mia inainan. En bai betsa min bikatsi ikamadan, jati jawen kadu depiati peiwen en mia pakatidu ea yuiwe. Jaska en mia yukai ea shinanwen— aka

3 jakia kemakin Nabotin Ahab yuikin:

—En ibubun bai ea jenexunbainibu Dios ea yaushixunaya en mia yunutidumaki— aka

4 Nabotin jancha wakin yuikin: “En ibubun jatun bai ea jenexunbaini en mia inantidumaki”, akin kemawen taea sinatai punu nuka jawen jiwe jawendua Samaria anu Ahab chintunkaini jikitan daka jawen keneki beti ika jawa janchama juinti nishmajaida dakaxun pikatsi ikamaken 5 ja dapi jawen ain Jezabel kaxun yukakin:

—Min pikatsi ikamadan, ¿jaskakidana min punu nuka juinti nishmajaidamen?— aka

6 kemakin Ahabin yuikin:

—Jezreel anu juni betsa jiwea Nabotbe en janchakidanxuki. Jawen uva bai nukun jiwe betsa dapike peiwen taexun jau ea yununun, iwanan, en ea axuki. Ja inun, pei bikatsis ikama nukun uva bai pepajaida betsa en inantidu jancha pepawen en yuixuki. Jakia Nabotin ea yunukatsi ikamawen taea sinatai en punu nukajaidakidana ikaii— aka

7 januxun kemakin jawen ain Jezabelin yuikin:

—Jakia mianan, Israelin enabu jatu xanen ibujaidaxunkin min jatu yunuaii. Nabotin uva bai en mia ibuwamaxanaiwen taea benitan pi ibubis daediwe, ana jawen nuiamadan— atan

8 jawen ain Jezabelin jawen bene Ahab kenawen taexun kene ichapa kenexuntan katunpakekin ja mae anu jiweabu unanepabu inun xanen ibu bexmasbu jatu bumakin yawa xeni binwen dekutan chabaiwen tuis tuis akin bepupaketan jawen meichikiti tuduwen tsaminpaketan jau buxuntanunbun jatu yunua 9 ja kenewen jatu yuikinan: “Na juniwen taea samakekin yudabu bebun Nabot tsaunxun 10 unanti wakanwen. Nabot bebun juni dabetun matu chanichakaxuntidu tsaunxankanwen. Januxun yudabu padankin jabun yuikin: ‘Dios inun nukun xanen ibujaida yuain jatukidi Nabot janchachakashinaki’, akin jau jabun matu yuinunbunan. Jaska jakidi chani yuiaibu tapintan nukun mae anua Nabot kainmabain maxax tunkewen tsaka tsaka akin tenanxankanwen”, jatu wa

11 Nabotin mae anu junibu jabube jiweabu anibu unanepabu inun xanen ibubube kene jatu anu bumashina uintan datei jaska Jezabelin jatu yunua june yubakashinxun 12 samakeakidi jatu banabimabu ma bea ichabun Nabot jatu bebun tsaunxun 13 januxun juni chakabu dabe ja padan janchawen Nabotkidi jatu yuiaibu jikia tsauxun yudabu dasibi bebunxun chanichakakin jatu yuikin:

—Nukun mekenika Dios inun nukun xanen ibujaida yuankin jatukidi Nabotin chakabujaida yuiai nun ninkashinaki— akabu jatun jancha chanibiaken ikunwankin Nabot achibainkin taxnimabain benanta iyuxun maxax tunkuwen tsaka tsaka akin tenantan 14 Jezabel anu jancha bumakin yuikin:

—Nabot mishki tunkuwen tsaka tsaka akabu ma debuaki— akin Jezabel yuiabu

15 ninkatan benimakin Jezabelin Ahab yuikin:

—Jezreel anu jiwekunkainshina Nabotin jawen uva bai mia ibuwamakatsi ikama ishian ana jiweama ma mawashinakiaki. Uin kaxun jawen uva bai ibuwaditanwen— aka

16 Nabot ma mawa ninkatan Ahab kaxun Nabotin uva bai ibuwaya 17-18 janua Tisbé anua Elías Jehován yuikin: “Samaria anu jiwea Israelin enabu xanen ibujaida Ahab anu jawaida kain uinditanwen, Jezreel anudan. Ikis Nabotin uva bai anu min jaki nukutiduki, ja bai ibuwanun ika ma kakidan. 19 Jaki nukutan ea yuixuntanwen: ‘Jehován jancha ninkawe. Nabot tenanxun jawen uva bai min mebianwen taexun jabianudi Nabotin jimi kamanen taxu taxu akin keyushinabuki. Jabianuxundi min jimidi kamanen taxu taxu akin keyudiaxankanikiki’ ”, akin jaska Jehován yuia ninkatan Ahab anu kaxun jabias jancha Elíasin xabakabi yuia,

20 kemakin Ahabin yuikin:

—Nun sinatai danananandabeaidan, ¿jaskakin ea benabaunkin min ea bechixumen?— aka

Elíasin kemakin yuikin:

—Jaa, en miki nukuxuki. Jehován bedubi ja bechipaiama chakabujaida min akubainmiski. 21 Jaskawen taexun Jehován mia yuikin: “Mia jawen kupikatsi chakabujaida mia anu en yunuxanaii. Minabu dasibi yamawakin en keyuxanaii, minabu junibu dayadubu inun dayadubuma yamawadiakinan. 22 En jancha jatu dananmakin Israelin enabu min jatu chakabuwamakubainmiswen taexun min ea sinatamajaidaii. Nabatin bake Jeroboamnen enabu ichakawaya en jatu yama wani keska wakin inun Ahíasin bake Baasán enabu ichakawaya en jatu yama wani keska wakin minabudi en yamawadiaxanaii”, akin Jehován mia yuikiki. 23 Ja dikabi min ain Jezabelkidi Jehován mia yuikin: “Jawen jemaintin mishki kenebaunibu dapi Jezreel uke medanxun Jezabel mawa jawen yuda kamanen pikin keyukin yama waxankanikiki. 24 Minabu mae anua mawabu kamanen jatu pikin keyuxankanikiki. Minabu bai nekia mawabu xeten jatu pikin keyudiaxankanikiki”, akin Jehován jakidi mia yuidiaikiki— akin Elíasin Ahab yuiniki.

25 Ahab jaskanikidi matu yuinun ea ninkakanwen. Ahab xanen ibukin xanen ibu tibi jaska idiabuma jawen ain Jezabelin shinan chibankin Jehová sinatamakin chakabuwakubainikiaki. 26 Israelin enabu jau janu jikinunbun Amorreo nawabu Jehován jatu nichinbianiken jawen yushibubu dami Ahabin jawen ainbetan duawakin kenwankubainaya june jawenabun jaskakidi jatu bechipaiama inibukiaki.

27 Elíasin jancha dasibi Ahabin ninkatan jawen xanen ibukin sawemis tadi manyunepa ushnikin putatan jawen nui bika tenei unanmati tadi bexa sawea, samakei, jabias tadi tubeya uxakunkaini ana kanekatsi ikama juinti nishmajaidakunkainaya 28-29 januxun Elías Jehován yuikin:

—Uinwen. Ekidi shinain Ahab ana pe peama jiwekunkainaidan, ¿min ma uinxumen? Ekidi shinain datei ana kaneamawen taea Ahab jiweyuken jawenabu kupinkin en jatu tenandiama ixanaii. Jakia jawen xantukun jawen juni bake Israelin enabu xanen ibuaya en jatu kupikin yamawaxanaii— aka