Mati Horeb anu Elías paxanikiaki, na janchadan
19
jaska Elíasin axu inun jaska Baalin jancha yuixunikabu dasibi jatu tesenmaxu Ahabin jawen ain Jezabel banabimawen 2 taexun Jezabelin ninkatan jawen jancha bunika yunukin yuikin: “Eska Elías ea yuixuntanwen: ‘Miadan, min juni Elíaski. Eadan, en ainbu Jezabelki. ¡Jaska enabu Baalin jancha yuixunikabu dasibi min tesen keyuxu keska wakin meshukidi na jabia baditiandi en mia jabiaskadi wadiama yushibubun jau ea kupichakayaxanunbunwen!’ iwanan, ‘mia yuixuki’, akin ea yuixuntanwen”, aka kaxun jawen jancha Elías yuia,3 ninkatan jaki datejaidai jawen jiwea mekei jawen dayadu iyui Judán enabun mai pakea surkidi chaijaida Beerseba anu kai jikixun jawen dayadu bashibaini 4 ana surkidi ja mesti bai tanabaini jadi tsua jiweabuma anu xaba bestichai badi chaitanabaini ka punu nuka ji chanpa jawen pei tupan utapan anu tsaua punu nukai jin iki mawakatsis ikin Jehová yuikin: “Jehováan, jatiski. En ana bika tenetidumaki. En xenipabu en jawa jatu binuamaki. Menan ea tenankin en jiwea ea bidiwe”, atan
5 jabianu ji tupan utapan naman daka uxajaidaken nai tsuma juxun datekin bestenwanxun yuikin: “Benitan pidiwe”, aka
6 bestentan uinbaunkin jawen buxkakidi mishki mamaki chi kujaidaiwen misi dama bawaxu inun unpax shumuki mata bechitan benikauan misi pikin unpax nexutan ana jabianudi dakatan uxaya 7 ana ja kachu Jehován nai tsuma juxun ana datekin yuikin: “Ana benitan pidiwe. Min jadi kaidan, chaijaida nenumaki. Ichapa min piama chaijaida kai min ana punu nukatiduki”, aka
8 Elías benitan misi ichapa pikin unpax ichapadi akin yaniwa ma ana kushipawen taea bai tanabaini 40 día inun 40 meshu kai Diosun Mati Horeb anu jikia, 9 mawa puchinin mapekea mishki kini xui betsa anu jikia meshu medan uxashini bestenkainaya Jehová jabe ana janchakin yuikin: “Elíasiin, ¿nenu juidan, min jawa shinain min jushianmen?” aka
10 Elíasin kemakin yuikin: “Jehováan, en mia yaushijaidaii, miwen nuijaidaidan. Min nukun mekenika Dios kushipajaida dasibi binuawen taeadan. Jaska en xenipabube min jatube yubakabiani Israelin enabun mia jenetan mia januxun kenwanti chi tapu di akin keyutan jatun machatu chaipa kenujaidawen min jancha yuixunikabu jatu tenankin ma keyuyamabuki. Ea besti en jiwea eadi tenanun ikin ea benakanikiki”, aka
11 Jehován ana yuikin: “Nedi xabakan kainwen. Mati puchinin anu ea bebun niwe”, atan Jehován dainbainaya jakimamadi besuudia niwe kushipajaida bekin mati pudekin mishki tuax akaya jakia niwe medan Jehová jayamaken, niwe mainbainaya janua pacha sakudiaya pacha sakuai medan Jehová jayamadiken 12 pacha sakui maianyan chi jede ji ji ikaya jakia ja chi jede medan Jehová jayamaken chi jede nukai mainkainaya unanxubida jui xa ikai ninkaya 13 jaskai ninkatan jawen datei Elías jawen yabukutiwen jawen besu beyabukutan taxnikidan kini kexa niken, jancha taxnikin yuikin: “Elíasiin, ¿min jawa shinanbidanshina janu nia ikai?” aka
14 Elíasin kemakin yuikin: “Jehováan, en mia yaushijaidaii, miwen nuijaidaidan. Min nukun mekenika Dios kushipajaida dasibi binuawen taeadan. Jaska en xenipabube min jatube yubakabiani Israelin enabun mia jenetan mia januxun kenwanti chi tapu di akin keyutan jatun machatu chaipa kenujaidawen min jancha yuixunikabu jatu tenankin ma keyuimabuki. Ea besti en jiwea eadi tenanun ixun ea benakanikiki”, aka
15 januxun Jehován yuikin: “Jabiaskabiaken jadidi ana kama min jushiankidi ana jawendi chintunkaini Damasco dapi janu tsua jiweabuma anu kaxun juni betsa Hazaelki nukuxun jau Siria nawabun xanen ibujaidaxanun xeni ininti maukakin katutanwen. 16 Ana kai Nimsín baba Jehúki nukuxun Ahabin xantukun jau Israelin enabu xanen ibujaidaxanun xeni ininipa maukakin katudiatanwen. Ana kai mae betsa Abel-meholá anu Safatin juni bake Eliseoki nukuxun min xantukun jau en jancha jatu yuixunika ixanun xeni ininipa maukakin ea katuxundiatanwen. 17 Jabu eskaxankanikiki. Israelin enabun jabun ea danankubainaibu Hazaelin detenamenikabun jatu tenankin taewaibun jatu anua paxaibu Jehún detenamenikabun jatu detediakin taewadiaibun jatu anua paxaibu Eliseon jawen jenekin jatu tenandiaxanikiki. 18 Jabiaskabiaken enabu Israelin enabudan, Ahab xanen ibuaitianan, jabun yushibu Baal dami kenwain ja bebun danti ika dakaxun jawen tae jutsu jutsu akama ikubainimabu 7,000 yudabu en jatu jenexanaii, jawa jatu tenan keyuamadan”, aka
Eliseo kenakin jau jabe dayanun Elíasin katunikiaki, na janchadan
19 Jehován jancha ninkabidani janua Elías kai januxun Eliseon jawen bai anu jawen miban banakatsis ikin ketaxamebainbaina 12 ina awa dabe ji tekishkundabea jabiaskas chichibaina jawen tsumabu mai xexati awa xadamabainkin jatu yunubainkin Eliseon jatundi jawen jenekin mai mishpu wakin ana pewabainaya Elíasin bechibidani jaki nukunun ika kakin dainbainkin Eliseoki jawen yabukuti jaki puenkin peyabubaini kaya 20 jawaida Eliseon jawen ina awa jenebaini kushikaini Elías chibain kakin yuikin:
—En ibubu jatu yuikin nukun beya chibankin jatu tantsu ayutanun ea manayuwe. Jatu jaska watani juxun en mia chibankubainxanaii— aka
Elíasin yuikin:
—Peki. Jaska min jatu wakatsis ikai jatu aditanwen. Jakia jaska en mia katubidanxu jakimama shinaindatanwen— aka
21 Elías jenebaini Eliseo kaxun ina awa bene dabe katuxun tesendabetan jawen bichi dashpexun jawen nami inun jawen xau mexte mexte atan awa ji tekishkunmisbu betsa kadu waxun jawen nami bawaxun jatu xunubainkin unanti wamakin jawenabu pima keyutan dayakin tapinun ika Eliseon Elías chibanbainikiaki, jawen dayaduidan.
***************