2 jaska wa ninkatan Ahab uinun ika Elías kaya jabiatiandi Ahabin mai pakea inun jawen maewan Samaria anu dasibibu buni paepa tenejaidaibun, 3 Abdíasin jawen xanen ibun tsumabu yunukin jawen jiwe anu dasibi mekexunmis Jehováki mesejaidakin jawen jancha chibankin kenwankubainmis Ahabin ja jawen dayanika xanen ibu jabe janchakatsi kena junikiaki. 4 Jehován jancha yuixunikabu jau jatu tenanunbun Ahabin ain Jezabelin jatu yunukin taewaitian 100 Jehován jancha yuixunikabu Abdíasin june jatu ichawaxun paxkakin 50 tibi xuku dabe watan mai kini xui ewapa dabe anu jatu junekin aduimaxun uxe ichapa misi inun unpax besti jatu pimakin inankubainaya 5 Abdías Ahab anu jua yuikin:

—Nukun maewan Samaria chai kesukauna anu chacha tibi inun paxku debu tibi uinkubaunanwen. Nukun caballo inun nukun mula jau jiwekubainyununbun nun basi jatu bechixuntidumenkain. Nun jatu bechixunamaken nukun inabu mawai keyuaibun nun jawa inabu ana jayama ixanaii— aka

6 jawen maewan Samaria kesukauna anu kai paxka dabetan uinbaunun ika xanen ibujaida Ahab bai betsawen kaya Abdías bai betsawendi kaya 7 ma bai betsawen paxkabaini buaibun Elíasdi taxnidiakidani Abdíaski nukuai Elías unantan ja bebun di itan beti ixun yuikin:

—Min en xanen ibu Elíasdan, ¿jabia min miamen?— aka 8 kemakin Abdías yuikin:

—Jaa, jabia en eaki, Elíasdan. Kaxun min tsuma yuiditanwen, en nenu niakidan— aka

9 kemakin Abdíasin yuikin:

—¿Jawa chakabu en waimawen taexun Ahab anu min ea yunui ikai, en mikidi banabima jau ea tenanunan? 10 Jehová min mekenika Diosun ea ninkatan ea kupitiduwen taexun en mia padanmaki. Jaska Ahabin jatu amaimakidi mia yuinun ea ninkawe. Nawabu betsa betsapabu anu inun xanen ibubu midima jiwebaunabu dasibi anu mia benakin jau jatu yukakubaununbun juni midima en tsumapan jatu yunuyamaki. Jania mia bechitiduma jabun Ahab yuikin: “Nukun mekenika yushibubun nuku kupitiduwen taexun chanima en mia yuiaii: ‘Elíaski jania nukukin nun bechitidumajaidaki’, akabu jatu yuikin jatu yubakubaunyamaki. 11 Mikidi jatu jaska wabiayamaken kaxun: ‘Elías ua nia’, akin en tsuma min ea yunukin yuimai ikaii. 12 Min ea jaska wamatidu mia yuinun ninkawe. En mia jenebainaya janu en unanma anu Jehován Yushinen mia iyuaya Ahab anu kaxun mikidi en banabima nenu jua Ahab miki nukukin mia bechiama yuikin: ‘Min chanichakaii’, ixun ea tenanxanikiki. En min dayadudan, jamen bedunantun Jehová kenwankin taewanixun jawa jeneama en kenwandiakubainaii. 13 Jamen betsadan, Jehován jancha yuixunikabu jau jatu tenanunbun jawen ain Jezabelin jatu yunukin taewaya 100 Jehován jancha yuixunikabu jatu ichawaxun xuku dabe 50 tibi waxun jatu junekin mai xui ewapa dabe anu jatu mistuimaxun misi inun unpax en jatu pimakubainmis ¿min ekidi ninkadiamamen? 14 Ea kaxun: ‘Elíasdan, ua ma jua nia’, akin en tsuma en yuia ea tenanxanikiki”— aka

15 daewakin kemakin Elíasin yuikin:

—Jehová kushipatun dasibi binua en dayaxunmiswen taexun en mia yubaii. Na jabiatian chanima Ahab bebun en nia ea uinkiki— aka

16 Abdíasin Elías uinxu jawen xanen ibuki jau dateyamanun daewa benai kai jaki nukui kaxun yuia: “Jani uinun kawe”, ikain Elíaski nukui kaxun 17 bechi tushitan Ahabin yuikin:

—Israelin enabu jatun shinan min jatu itimaska wamisdan, ¿min miamen?— aka

18 Elíasin kemakin yuikin:

—Jaskamaki. Israelin enabu ean en jatun shinan itimaska waismaki. Jakia Jehován yunuti jancha danankin jenenixun mia inun minabun yushibu Baal dami betsa betsapa duawakin man kenwankubainmiswen taexun Jehován matu kupikubainikiki, ui matu inanmadan. 19 Nukunabu Israelin enabu junibu dasibi inun ja jabu 450 Baalin jancha yuixunikabu inun 400 Aserán jancha yuixunikabu jabu min ain Jezabelin mekekin pimakubainmis Mati Carmelo anu jau jatu ichawanunbun jatu yunuditanwen, ikisdan— aka

20 Ahabin Elíasin jancha ninkatan Israelin enabu junibu dasibi inun Baal inun Aserán jancha yuixunikabu Mati Carmelo anu jau ichaxanunbun jau jatu yuibauntanunbun Ahabin jatu yunua buxun jatu yuiabu bebidan bebidani Mati Carmelo anu ma ichai keyuabun 21 Israelin enabu dasibibu ma ichabu anu Elías jatu dapi kaxun yuikin:

—¿Na shinan dabedan, jatian kaya man ana taewabainxanai? Jehovádan, jawen mekenika Yushin Kayabikenan, ja besti chibankubainkanwen. Jakia Baaldan, jawen mekenika Yushin Kayabikenan, ja bestidi man chibankubaintidubuki. Jadatuda katukanwen, ja dabe chibanmadan— jatu wa ja yudabu jawa jancha betsa taska yuimabumaken 22 Elíasin ana jatu yuikin:

—Jehován jancha yuixunika ea besti bashikuima en jiweaki. Jakia 450 Baalin jancha yuixunikabu jiweabu ja mapukana. 23 Ja man chibanunbun nun matu axunkin uinmaii. Jaskawen taexun ina awa bake bene dabe nuku inankanwen. Jabun bestichai katuxun tesenxun jawen bichiyabi mexte mexte axun kadu ichapa mania anu nami manchintidubuki, chi keti wamadan. Eandi ina awa bake bene tesenxun bichiyabi mexte mexte axun tadi kadu ichapa mania anudi en manchindiaii, chi keti wamadidan. 24 Matun yushibubu medabewati yukakanwen, jakia eanan, Jehován medabewati en yukadiaidan. Jadatutunda nuku kemakin nami inun kadu anu chi yunuaya jadan, mekenika Dios Chanima Kayabiki— jatu wa

dasibibun kemakin yuikin:

—Min shinan peki. Jaska wanankanwen— iki keyutan kadu ichapa inun ina awa bake bene dabe ma jatu bexuanbu

25 januxun Baalin jancha yuixunikabu Elíasin jatu yunukin:

—Matudan, man ichapaki. Matun dukun ina awa bake bene katukanwen. Katutan kuakin keyunun, iwanan, dasibi pewatan matun mekenika yushibubu yukabaunkanwen, jakia chi ketiwamadan— jatu wa

26 ina awa bake bene ma bexun ma jatu inanbu tesenxun bichiyabi mexte mexte akin pewaibun jabiatiandi jatiditun mishki manchinkin chi tapu waxun kadu ma beabu ja mamaki manchinkin keyuxun menunun, iwanan, nami kadu mamaki manchindiaxun penama jawen mekenika yushibu Baal yukakin taewakin:

—¡Baaliin, Baaliin, nuku kemawe, chi yunukinan!— aki penama atiabu kauani 4 hora jabias jancha yuikubaini chi tapu dunkebauni ishchu ishchu iki jeneabumabiaken jakia jui inun chiwen jawa jatu kemamajaidaken 27 ma badi manananbiken Elíasin jatu kaxewakin jui kushipawen jatu yuikin:

—Matun mekenika yushibudan, ana jui kushipawen ninkamakanwen, daya betsa akin matu ninkamamenkainan. Jaska inun, pui kamenkain. Jaskamadan, bai kamenkain. Jaskamadan, ma uxamenkain. ¡Datekin bestenwankanwen!— akin jatu kaxewakin jeneama yuikubainaya

28 sinatai jatun beya chibain sai sai iki ishchu ishchu ibauni nupewen jatumebi siku siku iki ibubis chachi chachi ikabu jimin iduma nashia keska ikaibun 29 ma badi manananbi binukainaya jawa jeneama nishi pae aka paean keska unanyamasi sai sai iki ishchu ishchu ibiakubainaibun tsuan ninkatan jawa tsuan juiwen jatu kemamaken ma janu badi kaitian Jerusalén anuxun Jehován kenwanti jiwe anuxun inabu jidabi janu jatu kuaxunmisbu kemaya Baalin jancha yuixunika dasibibun yukakin jeneaibun tsuan jawa kemama inun tsuan jawa jatu ninkamawen taexun 30 Israelin enabu dasibi Elíasin jatu yuikin:

—Ma matuna en uinxuki. Enadi ea dapi bexun uin bekanwen— jatu wa ja dapi dasibi bea jidabi mapuabun Jehová kenwanti chi tapu wanibu ma di iyama Elíasin bena wakin 31 Jacob, Jehován kena betsa wakin Israel wani, Jacobun juni bakebun enabu xukuati 12 keska mishki ewapabu katutan pewanikiaki. 32 Ja mishki biai Jehován yunua jawen kenwanti chi tapu Elíasin bena wakin keyutan ja mishki mania anu dunkemabaunkin janu jene matati wakin mai pukinbaunkin watan janu 20 litro jexe manebaunti nati akin keyuxun 33 kadu ichapa manchin pewabaunkin keyutan ina awa bake bene tesentan jawen bichiyabi mexte mexte atan kadu mamaki manchinkin keyutan 34 jatu yuikin:

—En matu padanyamanun Ianenwan anua 4 shumuwanki unpax matawatan bexun na nami inun kadu anu unpax maukakin cha akin keyukanwen, pantu tsaunkinan— jatu wa ninkatan buxun unpax bitanxun jukakin ja nami inun kadu cha akaibun Elíasin jatu ana jabiaskadi yunua ana unpax bitanxun nami inun kadu ana cha akabu Elíasin jatu ana jabiaskadi yunua jawen jancha ikunwankin ana unpax bitanxun ana nami inun kadu cha akin keyuaibun 35 januxun kenwanti chi tapu mishkidi mecha wakin mai pukinbauna anudi unpax matai keyua 36 Jerusalén anuxun Jehová kenwanti jiwe anuxun inabu jidabi kuaibu jabiatiandi Diosun jancha yuixunika Elíasin chi tapu dapi nixun jui kushipawen yuikin:

—Abraham inun, Isaac inun, Israel mekenika Jehováan, Israelin enabu dasibi mekenika Dios min mia inun en min tsuma min ea yunushinawen taexun natian dasibi en abaunxu uinkin jau unanjaidanunbun ¡ikis jatu uinmawe! 37 Min jatun mekenika Dios Kayabi anu jau mia ana chibankatsi chintununbun jatu kenawe. Na yudabu mapubaunabun jau unanunbun Jehováan, ¡ea kemawe! ¡Chiwen ea kemawe!— atan

38 benanta ka niken samama Jehován chi yunua manaundia chi xawakakidan chi tapu anu tin ikin ina awa nami inun, kadu inun, 12 mishki ewapabu inun, mai pukinbauna anu unpax matadi netsu keyuai 39 jaskai uintan datejaidai dasibibu beni keyutan main beti ixun kenwankin: “¡Jehová nukun mekenika Dios Kayabiki! ¡Jehová nukun mekenika Dios Kayabiki!” ikeakebaunaibun

40 januxun Elíasin jatu yuikin:

—Baalin jancha yuixunikabu dasibi jatu achikanwen, jau betsa paxayamanunbunan— jatu wa jawaida jatu achiabu paxku netsu Quisón anu jatu machi butemabain Elíasin jadixun jatu yunua dasibi jatu tesen keyuabun,

41 jatu jaska wamatan Elíasin Ahab yuikin:

—Ui ichapa ma kudu iki danka ikai en ninkaiwen taea kaxun pikin jawada nexutan inun kadiwe— aka

42 Elíasin jancha ninkabaini kaxun pikin nexutan Ahab kaya jakia Elías Mati Carmelo keyatapajaida anu ana mapekekaini ka nixun, Jehová ea anun ika danti itan jawen betunku shui iki beti itan 43 Elíasin jawen dayadu yuikin:

—Ianenwankidi kaxun uintanwen— aka

kaxun uinbauntani Elías anu chintunkidan yuikin:

—Naiudi jawa jayamaki— aka

jakia Elíasin ana yunukin:

—7ki katan katankin uintantanwen— aka

44 jaskabiatantankin jawa uianma atimas jawada uintan chintunkidan yuikin:

—Unu chaikea nai kuin meken tiu tsami pishta dama jukin en uinbidanaii— aka

benitan Elíasin yuikin:

—Kaxun Ahab yuiditanwen: “Janun jau ui bekin mia nemanun min caballon tadanbainti pewatan min jiwe anu kadiwe, akin mia yuikiki”, akin yuitanwen— abiatan jabia dabe butukidani

45 jawen dayadun Ahab yuia meshu meshuchakayamai niwe kushipa xunku ikaya ui midima ikaya jawen caballowen Ahab inakaini mae Jezreelkidi kaya 46 jabiatiandi Jehován Elías kushipa inanyan jawen tadi chaipa binibidan jawen chinexeketiki usuntan kushikainkin Ahab binunbaini Elías dukun Jezreel anu jikiken,