2-3 jaskawen taea Jehován ana Elías yuikin: “Badi juaikidi paxai nenua kadiwe. Jene Jordán pukebaini ukedi paxku Querit anu juneditanwen. 4 Januxun paxku unpax min akubaintiduki. Jau mia piti buxunkubainxanunbun isa meshupa peiyabu ma en mia jatu katuxun yunuxunxuki”, aka

5 jaska Jehován yunua badi juaikidi Jordán pukebaini kai paxku Querit anu bashikua jiwei kaken 6 penama inun badi kaya tibi misi inun nami ba bixun isa meshupabun buxuntantanabu pikin paxku unpax akubainaya 7 jakia ja mai pakea anua xaba eskadabes ui ana ikamaken paxku netsui taxkai keyuaya

8-9 januxun Jehován Elías ana yunukin:

—Benitan Sidón mai pakea anu mae betsa Sarepta anu katanwen. Jadi niti ika jiweyutanwen. Ainbu betsa jawen bene ma mawani jiwea anu jau jatun mia pimakubainxanun mia pewaxunkin ma en mia yunuxunshinaki— aka

10 ninkatan Elías kakunkaini Sarepta anu jikitan jawen jikiti xui dapi niti itan ainbu jawen bene ma mawaniken kadu metax bi kaxun ichawai Elíasin uinkin yuikin:

—Ainbuun, unpax en manuai kenchaki bitanxun menan ea amadiyuwe— aka

11 bixuntanun ika kai dabekekainaya Elíasin ana kenakin yuikin:

—Ja dikabi misi tude betsa ea bexundiatanwen— aka

12 niti itan kemakin yuikin:

—Jaska min mekenika Dios Jehová jiweken en mia padanmaki. Jawa misi ba en jayamaki. Xekiwan dudu mespu besti shumu medan en mekea inun piti xeni eskadabes shumu betsa medan ja besti en jayaki. En juni bakena inun ena na jabiatian keyu jawen bawakatsi en kadu benayuaki. Jatis besti bawaxun pitan chipu buni tenei nun mawaxanaii— aka

13-14 Elíasin kemakin yuikin:

—Dateama en jancha ninkawe. “Israelbun Diosun ma nuku pewashinaki. Mai anu Jehován ui ana imadiamaken min xekiwan dudu shumu medan inun min piti xeni shumu betsa medan min jayadan, netsuama ikunkainxanikiki.” Jaskawen taexun dateama ea bawaxuntanwen. Ja dukun min jaya misi jatiuma waxun ea bexunwen. Jaska watan chipu mina inun min bakena misi betsa min bawatiduki— aka

15-16 ninkatan ikunwanbain jaska Elíasin yunua kaxun misi jatuna inun jawena inun jawen bakena jatu bawaxuna piabu janua xekiwan dudu shumu medan jawa keyuama inun piti xeni shumu betsa medan jaya jawa netsuama jaska Jehován Elías yuima keska uxe ichapa ja ainbu inun jawen bake inun Elíasin misi pikubainibukiaki, ui ikamabiakenan.

17 Jatianda ja ainbun juni bake isin tenei taeshina pikukunkaini ana jadakidi juinsinatima tsusabaina dakaken 18 jawen ewa datejaidakin Elías yuikin:

—Dios anua juniin, ¿jaskada nun uinanain? mia inun eadan. En chakabukunkaini ea shinanmakin ¿en bake debuwanun ika min ebe jiwei juimamen?— aka

19 Elíasin kemakin yuikin:

—Min bake ea inanwen— atan jawen bake xankishkumea bitan dintu manaundi janu uxamis anu mapemaxun jawen dakati anu datanxun 20 nuijaidakin jui kushipawen Jehová yukakin:

—Jehová en mekenika Diosuun, na ainbu beneuma bika tenemakin min nuitapawai en jawen jiwetan ikadan, ¿jaskakin jawen bake min tenanain?— atan

21 ja bakeishta mamaki beuxun Elías nuijaidakin Jehová yunukin:

—Jehová en mekenika Diosuun, bakeishta jawen yushin ana iwexun jaki nanewe, jau ana jiwenunan— atan benitan ana dabeki jaki beuxun jabias Jehová dabeki yukaya

22 Elíasin jui Jehován ninkatan bakeishtan yushin ana jaki nanea juinsinai ana jiweaya 23 Elías jawaida benitan bakeishta ikubidani tapa manaundia butuxun ibuan dintu anu jikitan jawen ewa inankin yuikin:

—Uinwen. Na min bakedan, ma ana jiweaki— aka

24 ainbun kemakin yuikin:

—Jaska min ea axunxuwen taexun chanima min Dios anua juniki. Jehován jancha chanima min yuimis ikis en mia unanjaidaii— anikiaki.