Israelin enabu anu Ahab xanen ibui chakabujaida inikiaki, na janchadan
16
29 Ma 38 año kai Judán enabun mai pakea anu Asá xanen ibuxunkunkainaya nortekidi Israelin enabu 10 xukuabu anu jatun xanen ibujaida Omrí mawashinken jawen xantukun jawen bake Ahab jadi xanen ibui taeima Samaria maewan anu jiwexun 22 año jatu yunukubainikiaki.30 Jakia Jehová bebunua jawen aka tibi chakabujaidakin jawenabu xanen ibu chakabujaidabiai mawaida jaskama ipaunibuken atimapa wakin jatu binumajaidanikiaki.
31 Nabatin bake Jeroboamnen Jehová danankin chakabuwakubaini keska wakin Ahabin jawa shinanma ana atimapajaidakin Sidón nawa xanen ibu Et-baal ainbu bake Jezabel ainwantan jatun mekenika yushibu jawen kena Baal duawakin kenwankubainkin taewanikiaki. 32 Januxun jawen maewan Samaria anu ja yushibu Baal kenwanti jiwe inun jawen kenwanti chi tapu jatu wamanikiaki. 33 Ja dikabi yushibu ainbu Aserá ji dami jatu wamaxun jatu nichinmatan jaska wakin Israelin enabu mekenika Dios Jehová sinatajaidamakin Israelin enabu xanen ibu betsabu binujaidanikiaki.
34 Ahab xanen ibuaitian juni betsa Betel anua kaini jawen kena Hielin maewan xeni Jericó ana benawanikiaki. Hielin mae kenebaunun, iwanan, jatu mai pukinmaya jawen juni bake iyua dukun Abiram mawai taenikiaki. Chipu jawen mishki benibaunkin keyutan jawen jenekin jawen jikiti xui beputi jatu netanmanun, iwanan, Hielin jatu yunuaya jabiatiandi jawen bake maxkudi Segub mawanikiaki, jaska Nunen bake Josué Jehován bebunkidi yupumakin yuimakin tsuanda Jericó bena waitianan, jatun juni bake dabe mawaxanikiki, ani chanima jaskanikiaki. Jawen bakebu jaskabiaya atimas Jericó bena wakin Hielin jatu keyumanikiaki.