4 —Min epa nun dayaxunbia nuku daya bika tenemakubainimaki. Jaskawen taexun natian mianan, ja xankamajaida mei nun jawa juindukuntiduma ishian nun juindukunyunun jaskaida nuku daya kushipamama eskadabes nuku amakin yunukubainxanwen. Min nuku jaska waya nun mia duawakin axunkubainxanaii— akabu

5 Roboamnen jatu kemakin yuikin:

—Matun jancha en shinan pewayuai buyutankanwen. 3 día binuaya ebe janchai ana betankanwen— jatu wa yudabu jatun jiwe anu buabun 6 janua jawen epa Salomón jiweatian ja anibu unanepabun medabewakubainimabu yuikin xanen ibujaida Roboamnen jatu yukakin:

—3 día binuaya ja yudabu en jatu yuixanai ¿jadakidi man ea yusinkatsis ikai?— jatu wa

7 janchanametan jabun yuikin:

—Natian min jatu yunukubainxanun Israelin enabun mia bechipaikin mia ma xanen ibu wakanikiki. Jaskawen taexun jaska shinainbu keska jatun jancha ninkakin jatu medabewanun, iwanan, daewati jancha pepawen jatu yuixanwen. Min jatu jaska wa mia chibankubainxankanikiki, xanen ibujaida wakinan— akabu

8 januxun jawen epan anibu unanepabun jancha Roboamnen jawa jatu ninkakin chibankatsi ikama jakia jabe yumenibun medabewakatsis ikaibu Roboamnen jabudi 9 yukadiakin:

—Jaska en epan jatu dayamakin bika tenemajaidakubainima en bika bexmas jatu waxanun ea yukashinabu jaska en jatu yuixanun ¿jadakidi man ea yusiain, jatu jaska yuixanunan?— jatu wa

10 ja jabe yumenibun kemakin:

—Ja yudabun jaska min epan jatu dayajaidamakubainima keskama jau ana bika tenechakayamakubainunbun mia yukashinabu eska jatu yuixanwen: “Chanima en epa kushipajaidakin matu yunuchakayamaima keska ean ja binumakin en matu yunuchakayamaxanaii. 11 Dayamakin matu bikajaida tenemabiaimaken binumakin en matu ana bika tenemachakayamakubainxanaii. Kupikin awa bichiwen en epan jatu matu kusha kusha amakubainimaki. Jakia ean matu jatu kupimakinan, bichi mane kushipa denetameyawen en jatu matu kusha kusha amakubainxanaii”, akin jatu yuixanwen— akabu

12 jaska Roboamnen ja yudabu mae anuabu ja janu bexanunbun jatu yuishina ma 3 díaken Jeroboam yudabube Roboam anu ana beabu 13 januxun anibu unanepabun jancha danankin jawa jatu ninkama jancha kushipawen jatu kemakin 14 jaska jabe yumenixun yusinchakashinabu jabias chibankin jatu yuikin:

—En epa kushipakunkaini keska eadan, kushipajaidakin en epan matu apauni en matu binumaxanaii. Jatun matu dayamakin matu bikajaida tenemabiakubainimaken binumakin en matu bika tenema chakayamakubainxanaii. Kupikin bichiwen en epan jatu matu kusha kusha amakubainimaki. Jakia eandi kupikin bichi mane kushipa denetameyawen en jatu matu kusha kusha amakubainxanaii— jatu wa

15 Siló anu Diosun jancha yuixunika Ahías Jehován janchamakin jaska bebunkidi Nabatin juni bake Jeroboam yubaimawen taea xanen ibujaida Roboam jaska Jehován shinainma keska jau inun Israelin enabu dananmaya jatun jancha Roboamnen jawa ninkamaken

16 xanen ibujaida Roboamnen jaska bechipaiaibu jatu axunkatsi ikama jawa jatu ninkama ibubis ikaya Israelin enabu xukuabu xanen ibubu inun anibu unanepabun uinkin unantan jawaida yuinamei shinan betsaibun jabias shinainbu keska juni betsan jatu kemaxunkin jui kushipawen xanen ibujaida yuikin:

jatu wa jawen jancha ninkatan jenebaini Israelin enabu 10 xukuabu nortekidi jatun mae tibi jawaida buake buakeaibun

17-18 jau jatu ana dayamakubainun kushipawen jatu dayamakubainmis xanen ibu Adoram xanen ibujaida Roboamnen ana yunukin nichian Israelin enabu 10 xukuabu anu kaxun jatu ana dayamapanan jaki sinatakin maxax tunkewen tsaka tsaka akin tenanshinabu jaska washinabu Roboamnen ninkatan jatuwen datei jawen caballon tadanbaintiki jawaida inatan Siquem anua paxai Jerusalén anu kai jikia Judán enabun mae pakekauana anu Israelin enabu jiwebaunabu besti yunui Salomónen bake Roboam jatun xanen ibu ikunkainaya 19 jaska kainimawen taea Israelin enabu 10 xukuabun danan taewabainibu Davidin enabu ana jatun xanen ibumawen taea danananantiani natian jabiaskas ikubainmisbukiaki.

20 Egipto anua Jeroboam ma chintuinmaken Israel enabu dasibibun unantan ja xanen ibujaida wakatsi ikin Jeroboam kenabu jua Israelin enabu dasibi ichabu anuxun xanen ibujaida wakatsi katukin jatun xanen ibujaida wabu Davidin enabu xanen ibujaida Roboam tsuan ana ninkakin chibanbumajaidaken jakia Judán enabun Davidin baba Roboam ninkakin jabun besti chibankubainaibun

21 Israelin enabu anu ana jatun xanen ibujaidakatsis ikin 10 xukuabube detenamekin binutan jatun xanen ibunun ika Jerusalén anu ana jikixun Judán enabu mae tibi anua inun Benjamínen enabu mae tibi anua detenamea unanjaidaibu katukin 180,000 detenamenikabu Roboamnen jatu ichawakin keyuken 22 jaskaibu Diosun uinkin juni betsa jawen kena Semaíasin Dios chibanjaidamis ja Diosun yunukin yuikin:

23 —Salomón bake Roboam Judá xanen ibu inun, Judán enabu dasibi inun, Benjamínen enabu dasibi inun, jatidi Israelin enabu min mai pakea anu jiweabu jatu ea nemaxunkin yuikin: 24 “Jehován matu yunuikiki. Matun betsabu Israelbubedan, ana jatube detenameyamakanwen. Jaska shinankin en matu paxkaimawen taea matun mae tibi anu chintunbainkanwen”, akin jatu ea yuixuntanwen— aka Semaías kaxun ja detenamenikabu jatun xanen ibubube Jehován jancha jatu yui keyua jaska Jehován ma jatu yunua ninkatan Roboam jenebaini Jehován jancha ikunwain jatun mae tibi chintuainbun

25 Efraínen enabu mai pakea mati matipa anu jawen maewan Siquem anu jiwexun Jeroboam xanen ibujaidai taekin jawen mishki kenebaunibu ana jatu bena wamakin maewan jidabi jau pewanunbun jatu yunuxun jatu uinkubaina jawen yunua chibankin akin keyuabun janua Jene Jordán kexa betsaudi Penuel anu ja maedi jau pewanunbun Jeroboamnen jatu yunua pewakin keyudianibukiaki. 26-27 Januxun Jeroboam datekin shinankin: “Jehová kenwanti jiwe Jerusalén anu buxun Jehová kenwankin chaxuwan tesenxun jawen xeni inankin kua keyukin jawen nami bawaxun Jehová bebunxun pi año tibi Jerusalén anu butan butankin ana Judán enabu xanen ibujaida Roboam bechipaimakin taewatidubuki. Jaska wakin ea jatu tenanmatan januxun Roboam ana chintuin jatun xanen ibujaida itiduki”, ikin

28 jaska shinantan chipu jawen unanepabube janchanamei menetan oro ina awa bake bene dami dabe Moisin betsa Aarónen ani keska jau anunbun jatu yunua akin keyuxun jatun xanen ibubu inun yuda ichapabu bebun nichianbu metukin Jeroboamnen jatu yuikin: “Jerusalén anu kaxun Jehová kenwain ma chai butan butanmisbu bikawen taexun na mekenika yushibu dami dabetun Egipto anua nukun xenipabu jatun jatu paxawanidan, naki”, jatu watan 29 Betel janu jawen Dioski nukuti tadi jiwe puntenibu anu ina awa dami bestichai jatu bumaxun nichinmaxun januxun ina awa dami betsa nortejaidakidi mae betsa jawen kena Dan anu jatu buma jatube kaxun jatu nichinmadiaken 30 ja oro ina awa bake bene dami dabe Betel inun Dan anuxun kenwain Jehová Dioskidi Israelin enabu chakabui taeaibun 31 ja dikabi mati keyatapa betsa betsapa anu jatun yushibu kenwanti jiwe ichapa Jeroboamnen jatu wamatan jau jawenabu jatun dios benabe janchaxunikabu ikubainxanunbun Levín enabuma jatu katutan 32-33 januxun Judán enabu Jerusalén anua janu besimisbutian jabias xabatiandi Jeroboamnen jawenabu jabianudi jatun besiti bena waxunkin ja jabias octavo uxe xaba 15tian Betel anuxun jatu amashinxun taewakin jawenabu oro ina awa bake dami wamashinxun janu jatu mestenwanmakin jatun yushibu dami kenwankin inabu menukin jau kuakubainxanunbun ibubis shinankin Jeroboamnen jatu yunuima jawenabu jatun dios benabe janchaxunikabubetan jau apakexanunbun Betel anuxun jawen kenwanti chi tapu waimabu anuxun Jeroboamnen inabu nami inun jawen ininti xeniyabi menu keyukin jatu taemanikiaki.