Jeroboamnen Salomón dananikiaki, na janchadan
11
26 Efraínen enabu juni betsa Nabatin juni bake Jeroboam mae betsa Seredá anua kaini chipu ma jawen epa mawaimaken jawen ewa Serúa beneumatun jawen bake Jeroboam yumewaima juni ewatan Salomón dayaxunbiai Salomón xanen ibuki sinatakin danankin ana chibanma inikiaki. 27 Jaska wakin xanen ibujaida Salomón Jeroboamnen danani matu yuinun ninkakanwen. Jerusalén anu janu Davidin ja dukun jawena wakin mae ibu wani: “Davidin Maeki”, iwanan, kenamisbu anuxun napaku mata wakin panpa waxun jawen mishki kene jatidi di ikai jau bena wakin pewaxanunbun Salomónen jatu yunua dayakin taewaibun 28 jatube dayai Jeroboam juni kushipa yunu bedu inuinda uinkin bedu mestenwanxun Israelin bake Josén enabu jau jatu dayamakin jatu yunukubainxanun Salomónen Jeroboam katuxun xanen ibu bexmas jatu waxuinmaken29 xaba betsatian Jerusalén anua kainkaini kai mae betsa Siló anua Diosun jancha yuixunika jawen kena Ahíasin yabukuti bena sawea bai puchinin Jeroboamki nukutan ja dabe besti nia tsuan uianma inun tsuan ninkabumaken, 30 jawen yabukuti bena Ahíasin pekaxun jawen meken dabewen tsumaxun tadi ushni ushni akin 12 watan 31 Jeroboam yuikin: “Na en tadi en ushnixudan, 10 ushni bixun mekeyuxanwen. Jaska min biaidan, xabakabi mia yuinun ninkawe. Israelin enabu mekenika Dios Jehován mia yuikin: ‘Jau Israelin enabu ana jatun xanen ibuyamanun Salomónen enabu anua en jatu mebinxanaii. Jaska watan Israelin enabu 10 xukuabu min jatun xanen ibu ikunkainxanun en mia yunuxanaii. 32 Jakia Israelin enabu mae tibi anua Jerusalén katuxun en kena en janu netani inun en tsuma David en bechipainiwen taexun Israelin enabu xukua bestichai Salomónen enabu en jabu jenexunxanaii. 33 Salomón inun jawen juni bakebun en jancha ninkama danankin ea jenetan Sidón nawabu mekenika yushibu Astarté inun Moab nawabu mekenika yushibu Quemós inun Amón nawa mekenika yushibu Milcom duawakin jatu kenwanmisbuki. Jaskakubainaibu uinkin: Chakabukubainkanikiki, iwanan, en jatukidi shinanmiski. Ja dikabi jaska Davidin en jancha chibani keska wama en yunuti jancha inun en nemati jancha chibanbumawen taexun en jatu kupixanaii, 10 xukuabu mebinkinan. 34 Jakia David en katuni en tsuma ikunkainkin en yunuti jancha inun en nemati jancha chibain jiwekunkainiwen taexun jau xanen ibujaidanun en mebianma Salomón jiwekunkainaya xanen ibuai en mekekubainxanaii. 35 Jakia Israelin enabu dasibi jau ana xanen ibuyamanun Salomónen bake en nemaxanaii. Mebintan en mia katuxanaii, Israelin enabu 10 xukuabu yunui min xanen ibu ikunkainxanunan. 36 Janu en kena ipaxanai Jerusalén en katuni anu meshu medan bin dekua keska en tsuma Davidin enabu juni bestichai katukubainkin ea bebunua Jerusalén anu xanen ibutidu, Israelin enabu xukua bestichai en jenekubainxanaii. 37 Jati yudabu min yunui xanen ibukin Israelin enabu xanen ibu min ikunkainxanun en mia katuxanaii. 38 Jaska en mia yunuai min akubainai inun jaska miandi bechipaikin chanima en yunuti jancha inun en nemati jancha en jatu yusini Davidin chibankin akubaini keska wadiakin min akubainai mia medabewai mibe ikunkainkin minabu en mia xanen ibu wamakubainxanaii, janua Davidin enabudi jatu xanen ibu wadiakubainkinan. Min jaska waya Israelin enabu en mia jatu ibu wamaxanaii. 39 Jatun chakabuwen taexun Davidin enabu pakubainaibu badi ichapa jatu kupikubainkin atimas jenekin en ana jatu kupiama ixanaii’ ”, anikiaki. Jaska wakin Diosun jancha yuixunika Ahías Jeroboam yuimanikiaki.
40 Jaska Ahíasin Jeroboam yuishina Salomón tapintan jau Jeroboam tenanunbun jawen tsumabu yunua achitan tenanpananbun Egipto nawabu xanen ibu Sisac anu paxai ka, Salomón mawadiamaken jadi idui paxai kaima Jeroboam jiwekunkainikiaki.
Salomón mawanikiaki, na janchadan
(2 Cr 9.29-31)
41 Salomón jawen unanepa jancha betsa betsapa inun dasibi jawen daya tibi akubaini ja miyui una medan jakidi kenenibukiaki. 42 Jerusalén anu jiwekin Israelin enabu dasibi yunui 40 año Salomón xanen ibukunkaini 43 atimas mawa mae mishki kenebaunibu jawen epa Davidin ja dukun mae ibu wani anu maiwabu janua Salomón xantukun jawen juni bake Roboam xanen ibui taenikiaki.