Sabá anua nawa ainbu xanen ibujaida Salomónbe janchanun ika junikiaki, na janchadan
(2 Cr 9.1-12)
10
1-2 Jehová kenwain Salomón unanepajaidakunkainaya chanibaunaibu Sabá anua nawa ainbu xanen ibujaidatun Salomónkidi bana ninkatan jawen yukati tibi itimaskawen jawen unanepa unanti wanun ika chaijaidabiaken Jerusalén anu kai jawen mekenika kushipabu yuda jawenduabu ichapabube inun, jawen dayadubu ichapa inun, camello kamaki xeni ininti ichapaya inun, oro midima inun, jawen dauti jawendua betsa betsapa midima peumatan bekubidani atimas jikiabu Salomónen mekenikabun Sabá anua nawa ainbu xanen ibujaida iwexun Salomón bebun nichianbu ja ainbun jawen yukati itimaska inun bika jaska bebunkidi shinainma Salomón yukakubaina 3 jawen yukati tibi bestibu kemakin Salomónen yuikubainkin keyua, jawada ainbu xanen ibujaidatun yukati betsa Salomónen juneama yui keyutidu inikiaki. 4 Salomónen unanepa jancha ninkatan januxun jawen jiwe jawendua ewapajaida waima uin keyutan 5 xanen ibun tapu anuxun piti pepa betsa betsapa jatu pimakubainmis uindiakin janu jawen unanepa xanen ibu bexmasbu pe jiwemisbu uin keyubaunkin jawen dayadubun tadi jawendua sawedia jabun pe shinain dayaxunkubainmisbu uindiakin xanen ibun piti inun jawen nexuti jawen tenanti dau jayamenkain, iwanan, ja dukuntun pikin mexunmis unantan xanen ibu pimakin nexumakin akubainmisbu uindiakin, Jehová kenwanti jiwe bebun chaxuwan tesenxun chiwen jawen yuda jidabi kuakin Salomónen akubainmis dasibi jaska shadabu uin keyutan jaska wamis uinkin shinain jaxpa daka e ikunkainkin 6 ainbu xanen ibujaidatun Salomón kenwankin yuikin: “Min unanepa jancha inun jaska jawada shadabu min pewakubainmiskidi en mae pakea anuxun ea yuiabu en mikidi ninkakubainimadan, min chanimaki. 7 Jakia jaska bestima ea kayabis juxun janunkain en beduwen uinkin jaska en ninkaima keska eskatian en mia ikunwantiduki. Mikidi pepa namakis besti ea yuimabuki. Jaska en ninkakubainima min unanepa inun jamapai shadabu jayakin min ma binuaki. 8 Mia dapi ichaxun min unanepa jancha ninkai minabus inun min unanepabu inun min dayadubu shinan chankain benimakubainmisbuki. 9 Mia bechipaikin medabewakin Israelin enabu min jatu yunukubainxanun mia katuxun xanen ibujaidawaniwen taexun min mekenika Dios Jehová duawakin kenwanankanwen. Jawen nui paewen jawa kaneama min jatu yunukubainxanun Israelin enabu Jehován jatu bechipaijaidakubainmiswen taexun xanen ibujaidawakin mia katuniki”, atan10 januxun ainbun Salomón duawakin 3,970 kilo oro inun, xeni jawen iti ininipa midimajaida inun, jawen dauti jawendua betsa betsapa midimajaidadi Salomón jamen inankuinikiaki. Jati xeni ininipa ichapajaida Sabá anua nawa ainbu xanen ibujaidatun Salomón inankuini keska binumakin Israelin enabun mai pakea anu tsuan jati bexun inanma inikiaki.
11 Ja dikabi ja dukun Sabá anua nawa ainbu xanen ibujaida judiama Salomónen jaibu Tiro xanen ibujaida Hiramnen xaxu ewapabu mabu bemisbu mai pakea betsa jawen kena Ofir anua oro bexunbidanbidanmisbu inun jabiabundi ji betsa jawen kena sándalo inun mishki kadujaida ichapajaidadi Salomón anu bexuanbu 12 Jehová kenwanti jiwe inun jawen jiwe ewapa jawendua anuxun jawa teketima wakin ja jiwen kebenbaunkin jau axanunbun Salomón jatu yunukubainkin jawen mimawati arpa inun salterio mimawanikabun jau axunkubainunbun Salomónen jatu yunudianikiaki. Jaska wanibu keska ja ji sándalo ichapa ana beabuma inun, natiandi tsuan ana jati beai nun uianmadiki. 13 Januxun jawada shadabu Salomón anua bikatsis ikin Sabá anua nawa ainbu xanen ibujaidatun yuka inantan januxun ibubis Salomónen jawen inankuin jantsidi inanikiaki. Jaska wa jawen mekenikabu inun unanepa medabewamisbu inun jawen dayadubube jawen mai pakea anu jatube chintunkainikiaki.
***************