Jaska wakubainkatsi ikin Jehová kenwanti jiwe inun jawen jemaintin anu jamapai shadabu jatu wamakin jabiatiandi jawen jiwe ewapa jawendua jatu amadiakin Salomónen jatu menemaken 2 Gabaón anua Jehová Salomónki nukuni keska ana ja kachu Salomónki nukutan 3 ana jabe janchakin yuikin: “Min ebe janchakin ea kenwain inun min ea ea akai min jancha en ninkayamaki. Ja kenwanti jiwe min ma akima anu en kena ikunkainxanaiwen taexun medibi ena wakin en ma pepa washinaki. Mekekin uin en janu ikunkainxanaii. 4 Jakia eskatian jaska min epa Davidin chakabuwakatsi ikama pe jiwekunkaini keskai ea bebunua miadi pe jiwekunkainkin en jatu yusini chibankin inun en yunuti jancha inun en nemati jancha miandi ninkai xanen ibui min jawen jiwekunkainaya 5 Israelbu minabun jatu yunui jau xanen ibukubainxanunbun bestichai katuxun en xanen ibujaida wakubainxanaii. Min epa David ean yuikin: ‘Min ma mawaken jau min xantukun Israelbun jatun xanen ibuwakin jawa jeneama minabu bestichai en katukubainxanaii’, aki en jabe yubakani shinankin ean miadi yubakin en mia ana mestenwaiin. 6 Jakia matu inun matun bakebu ichai pakubaini ea chibankin jenetan en yunuti jancha inun en nemati jancha en jatu yusini jabun chibanma yushibu betsa betsapa duawakin jatu kenwainbun 7 na mai pakea matun xenipabu en ibu wamani anua Israelin enabu betsekin akawatan en jatu putaxanaii. Ja dikabi na kenwanti jiwe en pepa washina en ana shinankin mekeama ixanaii. Ja dikabi tsuabuda jiwebaunabun Israelin enabukidi shinain kaxekubainxankanikiki. 8 Ja dikabi man ea jenexanai na kenwanti jiwe jawenduabia ibubis di iki janus maspua maniken dasibibun dainbaini e iki jaki kaxei tsuada yuka iki: ‘Na yudabu inun jatun kenwanti jiwe chakabuwakinan, ¿jaskakin Jehován jaska wanimen?’ ikaya 9 tsuanda kemakin yuikin: ‘Jatun mekenika Dios Jehován jatun xenipabu Egipto anua jatu taxnimabiabidani jawen jancha jabun danankin ana chibanma yushibu betsa betsapa duawakin kenwankubainaibuwen taexun chakabu betsa betsapa jatu anu yunukin Jehován jatu kupinikiaki’, akin yuikubainxanikiki”, iki Jehová Salomónbe janchanikiaki.