—Nukun mai pakea anu mae betsa Ramot Galaad anudan, nukunaki. Siria nawabun nuku mebinbianibu ana nukuna wakin ¿Siria nawa xanen ibujaida anua jawakin nun ana jatu mebianmamen?— jatu watan

4-5 januxun Josafat Ahabin beiskin yukakin:

—Galaad anu nukun mae betsa Ramot ana jatu mebin nun jatube detenamei kayadan, nuku medabewai ¿min nukube katidumamen?— aka

Josafatin kemakin yuikin:

—Ea inun en detenamenikabu inun en caballowen katsaumebainmisbun mia inun minabu nun matu medabewatiduki. Jakia ja dukun Jehován jaskada shinain nuku yuitidumenkain, yukananwen— aka

6 jawen Diosun jancha yuixunikabu 400ti Israelin enabu xanen ibujaida Ahabin jatu kenakin ichawaxun yukakin:

—¿Galaad anu nukun mae betsa Ramot jatu mebin katanpa? ¿En daki kayamati?— jatu wa

jabun kemakin yuikin:

—Xanen ibu Diosun mia inainwen taea detenamekin Siria nawabu putakin jatu nichinditanwen— akeakeabu

7 jakia Josafatin Ahab ana yukakin:

—¿Jehován jancha yuixunika betsa nenu ana jayamamen, jadi nun yukadiatidukidan?— aka

8 Israelin enabu xanen ibujaida Ahabin kemakin yuikin:

—Betsa jayaki. Imlán bake Micaíasin Jehován jancha nuku yuitiduki. Jakia jancha pepa eki chaniama jancha chakabus besti ea yuikubainmiswen taea en ja bechipaismaki— aka

Josafatin nemakin yuikin:

—Jadi janchakin yuiyamawe— aka

9 januxun jawaida xanen ibujaida Ahabin jawen yununika kushipa bexmas betsa kena ma jua yunukin:

—Imlán juni bake Micaías jau jawaidakidanun nuku yuixuntanwen— aka kaya

10 janua jabu ikidan, Samaria jikiti xui anu jikikain jemaintin xaba tudu anu ja xanen ibu dabe jaya detenamei kati tadi sawea xanen ibujaidatun tsauti dabe anu tsauabun janua jatu bebun Ahabin Diosun jancha yuixunikabu dasibibu nishi paewen paean keskatan jatu jancha pepawen yuikubainaibun 11 jabianuadi mane kushipa ja due wati dami wakin ina awa bene maxun chaipa keska waimaxun Quenaanán juni bake Sedequíasin tsumaxun jancha kushipajaidawen Ahab yuikin:

—Eska Jehován mia ma yuikiki. Na maxun dabewen ina awa bene sinatai keskakin jatu tu akin chachi chachi akin Siria nawabu xutu xutu akin jatu tenankin keyuditanwen— akaya

12 dasibi Diosun jancha yuixunikabun jabiaskasdi janchawen yuidiakin xanen ibujaida Ahab yuikin:

—Ja mae Jehován mia yunuikiki. Jaskaken Galaad anu nukun mae betsa Ramot anu kaxun Siria nawabube detenamekin jatu maemaditanwen— akeakeaibun

13 jancha bunikatun kenatanun ika kaxun Micaías yuikin:

—Diosun jancha yuixunikabun kemakin jancha pepas nukun xanen ibujaida dasibibun ma yuiabuki. Jaskaken en mia ea akaii, dasibibube janchakin en xanen ibujaida jabun yuixu keska wakin miandi jancha pepawen bebunkidi xabakabi yuiyuwe— aka

14 jawen jancha ninkabiakin Micaíasin kemakin yuikin:

—Jehová jiweawen taexun jaska Jehován jaska shinain ea yuia besti en jatu yui kaii— abaini

15 jabe ka xanen ibujaida bebun ni tushiaya Ahabin yukakin:

—Micaíasiin, Galaad anu nukun mae betsa Ramot jatu mebinun ika ¿Siria nawabube jatube detenametanpa? ¿En daki kayamati?— aka

jawen jancha ninkaxuinsmawen taexun Micaíasin yuikin:

—Jehován mia ibuwamaxanaiwen taea detenamekin Siria nawabu putamakin jatu nichinditanwen— aka

16 jakia xanen ibujaida Ahabin kemakin yuikin:

—En miki chanibia min ea yui pewaismaki. Jehován jancha jawada mia yuiai besti ea yuiwe, natian Jehován kena kushipawen chanima jancha besti ea yuikinan, en ninkakatsis ikaidan— aka

17 januxun Micaíasin yuikin:

18 xanen ibujaida Ahabin Josafat yuikin:

—¡Uinwen! Jaskakididan, ¿en mia yuiama ixumen? Jancha pepa ea yuismadan, jancha chakabu besti ja junin ea yuimiski— aka

19-22 xanen ibujaida Ahabki dateama Micaíasin yuikin:

—Jaska min ekidi janchaiwen taexun Jehován jancha ninkawe. Jawen xanen ibujaida tsauti anu Jehová tsaua dasibi jawen mekenika nai tsumabu ja naman icha jatidi jawen tae yusiudi mapuabu inun jatidi jawen tae yusmaudi mapuabu Jehován jatu yuikin: “Galaad anu Ramot mebinun ika Siria nawabube detenamei jau tin ika mawaxanun ¿tsua man kai, Ahab padainan?” jatu wa betsan jatun shinan tibi besti yuiaibun betsandi jatun shinan betsakidi yuidiaibun jakia atimas yushin betsa Jehová bebun nixun yuikin: “Ea en katiduki”, aka Jehován kemakin: “¿Min jaskatan aki kai?” aka yushinen kemakin: “Jau chanichakanunbun kaxun xanen ibujaida Ahabin min jancha yuixunikabu tibiki jikitan en jatu chanichakamai kaii”, ikai ninkatan Jehován yuikin: “Padankin Ahab min binuxanaii. Jaska min yuiai keska axuntanwen”, aka juai en uinxuki. 23 Min Diosun jancha yuixunika tibitun kexa anua yushin chanichakamis Jehován ma jatuki mistuaki. Ja inun, min mawai kai Jehován yunudiaxuki. Ikis min uin kaii— aka

24 jatukidi janchai ninkatan sinatai Quenaanán juni bake Sedequías Micaíaski kematan tanpais akin yukakin:

—¿Mibe janchai Jehován yushin eanua jadakidi kainkainken ixumen?— aka

25 Micaíasin Sedequías kemakin yuikin:

—Jaska en matukidi yuixu detenamei mawaibun jani jaskatima jiwe medan dintu june anu min paxai idu akeakekin jadakidi Jehován yushin mia anua kainkainxu min unanxanaii— akaya

26 jaki sinatakin xanen ibujaida Ahabin jatu yunukin:

—Micaías achitan nukun mae xanen ibu Amón inun en juni bake Joás anu iyuxun 27 jatu yuikin: “Nukun xanen ibujaidatun matu yunuikiki. Bichiti jiwe medan bichitan paxai unanuma en chintundiama misi inun unpax eskadabes pimayukubainxankanwen”, akin jatu ea yuixuntankanwen— ikai ninkatan

28 Micaíasin Ahab ana yuikin:

—Jaska min unanuma chintunxanaikidi Jehován jaska ea jancha wakin yuiama ixuki— ikaya dasibi yudabu jemaintin ichai keyuabu ninkaibun

29 jaska jatu yuibiaya jatun detenamenikabu pewakin keyutan Israelin enabu xanen ibujaida Ahab inun Judán enabu xanen ibujaida Josafat Galaad anu mae betsa Ramot mebinun ika jatube bukin 30 Ahabin Josafat yuikin:

—Jau ea unanyamanunbun en xanen ibujaida tadi saweama juni betsa keskakin tadi betsa sawetan en jatube detenamei kaii. Jakia mianan, en tadi sawea kakunkainwen, jatu unantimaskawabainkinan— atan jawen xanen ibujaidatun tadi pekatan tsua jawa unanmamatan detenamenun ika jawen detenamenikabube Ahab kai 31 jakia jawen caballon tadanbainti detenamenikabu jawen bumisbu 32 xanen ibu bexmasbu Siria nawa xanen ibujaidatun jatu yunukin:

—Detenamei taebaunkinan, Israelin enabu xanen ibujaida Ahab ja dukun bechitan betsabukidi shinanma ja besti tenanun, iwanan, chibanxankanwen. Jatu ashianwen taexun 32 Josafat jawen xanen ibujaidatun tadi sawea caballon tadanbaintiki nia uintan Siria nawa xanen ibu bexmasbun shinankin yuikin: “Jadan, Israelin enabu xanen ibujaidaki. Tsakanun bukanwen”, iake iakekin binubaunkin chiban taewaibun jatu uintan paxai kushikaini datekin jui kushipawen jawen detenamenikabu Josafatin jatu kenakin: “Ea medabewai bekanwen”, jatu akeakeaya 33 jaskai nia Judán enabun xanen ibujaida uintan ja Israelin enabun xanen ibujaidamaken ja detekatsi ikama unantan chibankin jeneabu 34 jakia jabiatiandi Siria nawa detenamenika betsan pia manankidis bishkua jadakidia ja pia ti ikai unanma Ahabin mane tadi bexpanu pia ti ikin punchaxa isin tenejaidakin caballo jatun iyua yunukin:

“Ja detenameaibu anua ana jadi ea iyuama ea chintun wanwen, ma ea piawen tsakabu en isin tenejaidaidan”— aka

35 día jidabi detenamejaidaibun jawenabu datei jau paxayamanunbun Siria nawabu bebun jawenabu detenameaibun jakia jatun pechiudi nia jawen caballon tadanbainti anu jawen jimi shudu shudu iki Ahab nibiabai babui punu nukatan jawen tadanbainti namaki jimi mataya badi jikiaya mawai di ikaya 36-37 ma badi kaya jawen detenamenikabu jatumebi yuinamekin: “Nukun xanen ibujaida ma mawaxuki. Ana tsuan nuku yunutimaki. Inun budinankanwen”, iake iaketan Siria nawabu jenebaini buaibun,

jawen maewan Samaria anu xanen ibujaida Ahabin yuda bui jaya kaxakubainkin mai wanibukiaki. 38 Januxun Samaria dapi ian pishta tsaua anu janu ainbu jininipabu nashimisbu anu Ahabin caballon tadanbainti janu buxun jaska Jehován bebunkidi yuishina keska wakin kamanen jawen jimi taxu taxu akin keyuaibun jawen tadanbainti jimi chukakin pewanibukiaki.

39 Israelin enabu xanen ibujaidakidi miyui una medan jaska Ahabin akin yuinaka betsa ewapajaida elefante xeta juxupa chaipa ichapawen jawen jiwe ewapa jatu jawendua wamani inun mae ewapabu jatu amakubauni inun dasibi akaikidi jakidi kenenibu jayaki. 40 Ahab mawashinken jawen xantukun jawen juni bake Ocozías Israelin enabu xanen ibujaidai taenikiaki.

41-42 18 año bebunkidi Ahab Israel anu jatu xanen ibuxunaitian janua 4 año kainaitian Jerusalén anuadi Asán juni bake Josafat 35 badiya Judán enabu jatu xanen ibujaidaxuni ja xanen ibuidan, 25 año jatu yunukubainikiaki. Jawen ewan kenadan, Azubá inikiaki, Silhín bakedan.

43 Jaska jawen epa Asá pe jiwekunkaini keska Josafat pe jiwekin jaska Jehován bechipaiai keska akubaini jakia mati keyatapa betsa betsapa anuxun Jehová shinanbuma yushibu betsa kenwankin inabu nami kuaxunmisbu inun yushibu dami bebunxun kenwankin xeni ininipa kuaxundiamisbu jau yamawanunbun jawen dayadubu Josafatin jatu yunuama akubainikiaki.

44 Israelin enabu xanen ibubu inun jawen epa Asábe detenamebiapaunibun jatube unanuma jiwekatsi ikin Israelin enabu xanen ibujaida Ahabbe Josafat yubakai daenamenibukiaki. 45 Judán enabu xanen ibujaidakidi miyui una medan jaska Josafatin akubaini inun, detenamekunkaini dasibi jakidi kenenibu jayaki. 46 Jakia jawen epa Asá xanen ibuaitian ja ainbu jininipabu jatu chutakin kenwanti keska wakin jatu pei inankubainmisbu jatidi jawen epan nichin keyuama ini jabias jaya Josafatin jatu keyu nichinkin keyunun ixun jawen dayadubu Josafatin jatu yunua Judán enabun mai pakea anua jatu nichinmakin keyunikiaki. 47 Ja jatu jaska waitian Edom nawabu Judán enabun jatu maemaimawen taea Edom nawabu jawenabu xanen ibujaida jayama xanen ibu bexmas besti jayanibukiaki.

48 Ianenwan kexa anuxun jaska Tarsis anuxun xaxu wakin jaxpa chaipa wamisbu keskadi wakin Josafatin jatu amaima jawen Ofir anua oro mane binun ika buaibun niwewan kushipa bekin maewan betsa Esión-guéber anuxun ja xaxu ewapa ianenwanen dasibi tuax tuax akin keyunikiaki. 49 Chipu Israelin enabu xanen ibujaida Ahabin juni bake Ocozíasin Ofir anu Josafatin enabube xaxu ewapawen buaibun Ocozíasin jawen xaxu ewapa bunikabun jatu chibanpanan Josafatin jatu naneama inikiaki.

50 Chipu Josafat mawa Jerusalén anu bekex betsaudi jawen kena Davidin Mae anu jawen xenipabu maiwanibu anu Josafat mawa maiwadianibukiaki.

Janua jawen ibuan xantukun Josafatin juni bake Joram Judán enabu xanen ibujaidai taenikiaki.

51 Judán mai pakea anua Josafat xanen ibujaidakaini 17 año binuaya jabiatiandi Ahab mawaken jawen juni bake Ocozías jawen epan xantukun Samaria anu 2 año besti jatun xanen ibujaida inikiaki. 52 Israelin enabu Dioskidi chakabu jatu shinanmakin paxkakin Nabatin juni bake Jeroboam inun jawen epa Ahab inun jawen ewa Jezabelin chakabuwakubainibu keska jabiaskadi chakabu jatu chibankin jawada shadabu Jehován bechipaiama Ocozíasin adiakubainikiaki. 53 Israelin enabun mekenika Dios Jehová jawen epan sinatamapauni keska wakin jawen bakendi jatu chibankin yushibu Baal dami betsa betsapa duawakin kenwandiakubainikiaki.