3 Salomónen Jehová bechipaikin benimawakin jaska jawen epan Diosun yunuti Davidin kenekubaini ninkakin chibankubainkin jakia jawenabun akai keska wakin mananan kaxun Jehová kenwankin inabu nami inun jawen xeni inintiyabi chiwen menukin Salomónen jatubetan adiakubaini 4 mae Gabaón anu mati keyatapa anuxun januxuns yudan kaian ichapajaidatun bechipaikin Jehová kenwain bumisbu anu inabu nami inun xeni ininti Jehová kuaxunun ika Salomón jabianudi kadiaxun 1,000 chaxuwan jatu tesenmakubainkin chiwen chaxuwan bushinxun bestibu tibi jatu menu keyumakubainkin Salomónen Jehová benimawakubaina

5 mae Gabaón anu meshu medan Salomón uxa daka namaya Jehová juxun Salomón yuikin: “Jawada min ea yukakatsis ikai ea yukawe, en mia inanxanaidan”, aka

6 Salomónen kemakin yuikin: “Min dayadu David en epadan, min katukin taewatan duawakin min mekekubainiki. Jiwekunkainkin mia bebunxun mikidi pe shinankin pepa wakubainkin mia chibain chintuinsmawen taexun bechipaijaidakin ea jawen juni bake Israelin enabu xanen ibujaidawakin katuxun min eadi yunuimaki. 7 En mekenika Dios Jehováan, en bedunan en shinan jayadiamabiaken mian en epa Davidin xantukun min ea tsauinmaki, Israelin enabu en yunukubainxanunan. 8 Yudan kaian minabu wakin min jatu katuni midimajaida tsuan jati shinankin tana keyutiduma anu en jatu xanen ibuxuni en jatu bebuxunaii. 9 Minabu mekekin en jatu yunukubainxanun jawen jatu pe yunukubainti kushipa ea inanwen, pepa inun chakabu unanti shadawakinan. Min ea jaska wamaken ja yudan kaian midima tsuan jatu pe mekekin yunutidumaki”,

10 Salomónen jaska yuka Jehová benimakin 11 yuikin: “Jiwea chaipa min ea yukama inun, mabu inun pei ichapa min ea yukama inun, miki sinataibu jau mawaxanunbun min ea yukama jakia unankin ninkakin en pe xanen ibukin yunukubainxanun ixun shinankin xabakabi min ea yukaxuwen taexun 12 jaska min ea yukai en mia axunkubainxanaii. Jawen unanepati inun shinan xabakabiti min buxka medan en mia unanmakubainxanaii. Min idiamaken tsua jaska jayama inibu inun unudi tsuan mia binunbaun chipu jaska jayama inunbadikanikiki. 13 Ja inun, jaska min ea yukama ibiaxu mabu inun pei midima inun jawada jawenduajaida jaska uinsbuma en mia inandiakubainxanaii. Min jiweyukunkainaya xanen ibujaida betsa mia keska jayama ixanikiki. 14 Jaska shinankin en bechipaiai akubainkin en yunuti inun en nemati min chibankubainaya jaska min epa Davidin chibani keska min ikaya badi ichapa en mia jiwemayukubainxanaii”, aka

15 ninkatan teku ikidan bestenxun: “En namaiwen Jehován ea jancha waxuki”, ikin shinankubidani Jerusalén anu chintunkidani jikitan Jehová jawen xenipabube yubakani jancha aduni bau bebun nixun chaxuwan bestichai tesenxun chi tapu anuxun chaxuwan jidabi menukin jawen kuin manaundi puebainai Jehován xetei benimaya Salomónen jaska waxunkin keyutan chaxuwan midima tesenxun dashpexun jawen xeni besti bikin keyuxun xeni inintiyabi jau menukin keyuxununbun Salomónen jatu yunua akubainkin keyuxunaibun ja chaxuwan nami ichapa jau bawakin keyununbun Salomónen jatu ana yunua bawakin keyuaibun Jehová daewakin kenwankin jawen mekenikabu dasibibu jatu benimawakin pimakin Salomónen jatubetan pinikiaki.

16 Jaskaitian ainbu jininipa dabe xanen ibujaida Salomónen jau jatu medabewanun ixun uinun ika buabu jau jikinunbun Salomónen jawen mekenika yunua jatu bichiabu Salomón bebun ja dabe nixun 17 betsan dukun yuikin:

—En xanen ibuun, ¡nuku uinwen! Na en jaibu inun eadan, jabias jiwe anu nun ikaki. Jabias jiwe anu nun jiwea ea dukun juni bake en kainshinaki. 18 Xaba dabe inun besti kaya na en jaibudi juni bake kaindiashinaki. Nuku dabe jabias jiwe anu nun jiweken tsua betsa jayamaken nuku dabes nun jiweshinaki. 19 Jakia meshu betsatian jawen juni bake mamaki na ainbu dakaxun bakeishta tenantan 20 yamenapun jawen bake tenan unantan en uxa anu benikaini kaxun ea dapikea en bake june bixun, jawen bake mawa buxun ea janaxuntan en bake jiwea bibidan jubunken 21 penama bestenkauan en bake chuchu amanun, iwanan, benikauan ma en bake mawa en bechibia januxun ma penai xabajaidaken uinjaidakin ja bake en kainshina jama en bechishinaki— ikaya

22 juni bake ikuxun ja ainbu betsan jawaida yuikin:

—Jaskamaki. Min bakedan, mawashinaki. Na enadan, jiweaki— ikaya

jakia ja dukun chanixutun kemakin yuikin:

—Jaskamaki. Min bakedan, chanima mawashinaki. Ja ena min ea maenwankin bianshinadan, jiweaki— iki

xanen ibu bebunua ainbu dabe chitenamedabeaibun, 23 jaskaibu ninkatan xanen ibujaida Salomónen shinankin:

—Natun yuikin: “En bake jiweaki inun betsa ma mawashinaki”, ikanikiki. Jakia betsan yuikin: “Jaskamaki”, idabekanikiki. ¿Ja jaskadabeaibudan, jadatu chanima kayabimen?— itan 24 jawen tsumabu yunukin:

—Machatu chaipa kenujaida ea bexunkanwen— jatu wa machatu bitanxun xanen ibu inanbu 25 xanen ibun jatu yunukin:

—Ja bake jiwea namakis mextetan ja ainbu dabe jatu inankanwen— jatu wa

26 jakia nemakin jawen bake jiweawen nuijaidakin jawen ewa kayabitun xanen ibu yuikin:

—En xanen ibuun, jaskamaki. Ea ninkawe. Na bakeishta tenanma ainbu betsa inanwen— aka

jakia ainbu betsan yuikin:

—Enama inun minamaki, nun ikaidan, jau tuax anunbunwen— ikaya

27 xanen ibun jatu nemakin kemakin:

—Bakeishta jau mawayamanun ja ainbun benukatsis ikamadan, chanima jawen ewa kayabiki. Ja bakeishta tenanma ja inankanwen— jatu wa ma bakeishta inanbu

28 ja ainbu dabe ja idabeaibu jatun chakabu unanti watan Salomónen jatu pewashina Israelin enabun ninkaibun, jau Salomón unanepakin pe jatu yunukubainxanun Diosun jaska inainma jatu pewakin unankubainai dasibi Israelbun unain jawen datekin jawa chakabu jakidi yuiama ikubainibukiaki.