Jawen jenekin Davidin jawen bake jancha wakin yununikiaki, na janchadan
2
David ma mawa kemaxun unankin jawen bake Salomón Davidin yunukin: 2 “Ma en mawa kemaii. Yuda dasibibu imisbu keskai nukun xenipabuki en nukui kaxanaii. 3 Eamaki mentsisipai juni kushipakunkainxanwen. Janida min kai inun jawada min akubainai jau Jehován mia medabewakubainxanun jaska Moisin keneni jawen yunuti inun jawen nemati inun dasibi jaska bechipaiai unankin jaska min mekenika Dios Jehován mia yunuai keska besti akubainxanwen. 4 Jehován bebunkidi ea yubaniwen taea man en bakebun matun shinan jidabiwen inun matun yushin jidabiwen man enabu pakubainkin jawa chakabuwama chanima ibubis mekei pe jiwekunkaini man enabu Israelin enabu xanen ibujaidai ikubainxankanaii, jawa jeneama ipakeidan, man Jehován jancha chibankubainaibudan.5 Betsadan, eska wakin en pui Seruián bake Joabin ea dake wani min unaiin. En detenamenikabu xanen ibu dabe Nerin bake Abner inun Jéterin bake Amasá janu unanuma jiweabun jatu padantan ja dabe Joabin chachi dabekin jatu tenaniki, detenamekin jawenabu tenainbuwen taexun Joabin jatu kupikinan. Jaska wakin jatu padankin xabakabi chachixun Israelin enabu dasibi Joabin ekidi jatu chakabu shinanmaniki. 6 Joabin jatu tenani chakabuken ean en jawa wamajaidawen taexun jau unanuma Joab mawayamaxanun unanepakain jau jatundi bika tenenun bika tenemakin Joab tenanxanwen, ea kupixunkinan. 7 Jamen betsadan, yuda betsabu jabun ea duawanibu ea jabudi pepa waxunkubainxanwen. Min betsa Absalón anua en paxaima Galaad mai pakea anuxun Barzilai ewen nuikin jawada nun jayama nuku inankin ea mekekubainimawen taexun Barzilain enabu duawakubainxanwen. Jerusalén anu jawen juni bakebu bai beaibu jatu itan min tapu anuxun jatubetan pikubainxanwen. 8 Janua juni betsan ea jaska wani uinwen. Benjamínen enabu betsa Bahurim anu jiweni jawen kena Gueránen juni bake Simí nenu Jerusalén anu mibe jiweaki. Absalón xanen ibuaitian paxai Mahanaim anu en kaya ea chakabujaidawakin ea yupukubainyamaki. Absalón enabu, enabun jatu maemaimaken nun ana chintunkidanaya Jene Jordán anu eki nukukin ea ikaxun ea daewakin en Simí tenanyamanun ea yuka Jehován ea ninkaya en jabe yubakayamaki. 9 Jabiaskabiaken Simín ea chakabuwayamadan, miadan, jakimayamaxanwen. Miadan, min unanepaki. Jaska min wakatsis ikai kupixanwen. Jau unanuma mawayamaxanun Simí bika tenemakin jatu tenanmaxanwen”, aka
David mawanikiaki, na janchadan
(1 Cr 29.26-30)
10 David jatun xenipabu anu ichai kai unanuma mawa Jerusalén anu janu ja dukun mishkiwen jatu kenemabaunibu anu jawen kena bena wakin: “Davidin Maeki”, anibu anu jawen yuda maiwanibukiaki. 11 Xanen ibujaidai taei Hebrón anu 7 año itan janua maei Jerusalén anu 33 año ikunkaini jabiati dasia 40 año Israelin enabu David jatun xanen ibujaidaxunkunkainikiaki. 12 Chipu David mawadiama jawen epan xantukun Salomón xanen ibui taekaini kushipakunkaini xanen ibuai tsuan mebintiduma pepa inikiaki.
***************