3 jaska shinainbu keska Davidin jatu yunua Israelin enabun mai pakea jidabi anu chipash jawendua benakubaunkin atimas mae betsa jawen kena Sunem anu chipash betsa jawen kena Abisag bechitan xanen ibujaida David anu iwexunimabu 4 Abisag jawenduajaidatun xanen ibujaida David medabewai jabe uxabiakunkainaya Davidin jawa mekin chutamajaida ikunkainikiaki.

5 Jabiatiandi Davidin ain Haguitin jawen juni bake Adonías, iyuamabia jawen epan xantukun ea xanen ibujaidanun ika ibubis benikauan jatu yuikin: “Eadan, Israelin enabun xanen ibujaida en matu ixunxanaii”, ikunkainkin detenamenikabu caballon tadanbainti betsa betsapa jawen ibuana katukin ichawakubainkin detenamenikabu caballo katsaumemisbu katukin jabun meketi wakin 50 junibu jawena wakin katutan jiwekunkainkin 6 jaska Adoníasin akai David yuibiabu jawen bake Adonías nemakubainsma inun ja jaskaitian: “¿Min jaskanun ika ikai?” iwanan, bebunkidi unankin yukaisma inikiaki. Janua Absalón ja dukun kaini jawendua iniken ja kachu Adonías kaindiani jabiaskadi jawendua idianikiaki. 7 Jau Adonías jatun xanen ibujaidanun, iwanan, Seruián bake Joab inun jawenabu Diosbe janchaxunika Abiatarbe yubakaimawen taexun ja dabetun Adonías medabewakubainaibun 8 jakia jawenabu Diosbe janchaxunika Sadoc inun Joiadán juni bake Benaías inun, Diosun jancha yuixunika Natán inun Davidin jaibujaida medabewanika Simí inun, detenamenikabun David medabewamisbun jabu kushipabun Adonías bechipaikatsi ikabumaken

9 xaba betsatian: “En jatun xanen ibujaida ixanaii”, ikin jatu unanti wamanun, iwanan, besi itamama wakatsi jawen tsumabu yunua Roguelin unpax chacha dapi Zohélet mai pakea kexa unanti mishki ewapa anuxun chaxuwan inun ina awa inun ina awa bene yume bena jawen jubu mextemisbu xuajaidabu tesen keyuxun dashpe keyuxun jawen nami bawakin keyudiabuma Adoníasin betsabu Davidin juni bake betsabu besti inun Judán enabun xanen ibujaida David dayaxunmisbu jatubetan pi benimakatsi Adoníasin jatu kena bea ichabun 10 jakia jati jatu kenamadan, Diosun jancha yuixunika Natán inun Davidin mekemisbu xanen ibu Benaías inun, David detenamenikabun medabewamisbu inun, jawen betsa Salomón Adoníasin jabube iama iken

11 jaskaibu Natánen ninkatan Salomónen ewa Betsabé anu kaxun jabe janchakin yuikin:

—David nukun xanen ibujaida ma tsuan banabimawana ikimenkain. Ja jawen ain betsa Haguitin bake Adonías: “En matun xanen ibujaida benaki”, ikin yuikin jatu pimai benimaidan, ¿min ma ninkamen? 12 Mia inun min bake Salomón man mawayamaxanun unanepa jancha en mia tapinmai ea ninkawe. 13 Xanen ibu David anu kaxun eska yuitanwen: “En xanen ibuun, en bake Salomónen Israelin enabu yunui jau jatun xanen ibujaidaxunkunkainxanun min ebe yubakabiaimaken ¿jaskai Adonías xanen ibui taeimenkain?” akin na jabias jancha min yuiaya 14 eadi jikitan jaska min yuiai keskadi eandi jabiasdi David en mia yuixuni kaii— aka

15 jawen jancha ninkatan janu David uxamis dintu anu Betsabé kai jikia xanen ibujaida David anibujaida Sunem anua chipash Abisag medabewaya 16 Betsabé danti iki beti ika dakaken xanen ibujaida Davidin yukakin:

—¿Min jawa ea yuikatsis ikai?— aka

17 kemakin yuikin:

—En xanen ibuun, ¿mia yuipa? Mia kachu min bake Salomón Israelin enabu xanen ibui min xanen ibui tsaumis anu tsauxun jau jatu yunukubainxanun min mekenika Dios Jehován kenawen min ma ebe yubakabiaimaken 18 mia jawa banabimamabia: “En matun xanen ibujaida benaki”, ikin Adoníasin jatu yuikiaki, ikisdan. 19 Ina awa inun ina awa jubuuma xuajaidabu inun chaxuwan ichapa tesenxun dashpexun jawen nami ma pewabu jau jabetan pinunbun min juni bake betsabu inun Diosbe nukunabu janchaxunika Abiatar inun detenamenikabu xanen ibu Joab Adoníasin jatu kenaxun ma jatu pimaikiaki. Jakia min medabewanika min bake Salomón kenamaki. 20 Mia kachu tsuada Israelin enabu xanen ibujaida ikunkainxanai min katuxanai unankatsi dasibitun manakanikiki. 21 Min jawa katuama Adonías xanen ibukunkainkin min mawaken min bake Salomón inun ea tenantiduki— iki

22 jabe janchai jenediamaken jawen dintu jikiti xui anu Diosun jancha yuixunikadi Natán ma jua jikikatsi ikaya 23 David mekemisbun yuiabu jau jikinun Davidin jatu yunua januxun bichiabu Betsabé kainkidanaya Natán jikia danti iki beti ixun 24 David yukakin:

—¿Mia kachu Adonías xanen ibujaidakunkainxanai min ma yunuamen? 25 Na jabiatian ina awa inun ina awa jubu mextemisbu xua inun chaxuwan ichapa tesenxun dashpexun ma bawabu min juni bake betsabu inun min detenamenikabu xanen ibubu inun nukunabu Diosbe janchaxunika Abiatar Adoníasin jatu kena butubain jabetan pikin mabex nexui benimakin jui kushipawen yuikin: “Nukun xanen ibujaida Adonías jau jiwekunkainunwen”, ikaibun 26 jakia ea inun, nukunabu Diosbe janchaxunika Sadoc inun, mia mekemisbu xanen ibu Benaías Joiadán bake inun, min bake Salomón Adoníasin nuku jabu pimakatsi kenamaki. 27 ¿Min xanen ibunan, min ma jatu yunuamen? En min dayadu ea yuiama ¿jaskakin jadatu min bake mia kachu xanen ibuxanai min ea banabimamamen?— aka

28 jawen ain Betsabé ana jau kenanunbun Davidin jatu yunua ma iweaibun Natán kainkainaya Betsabé ana jikia xanen ibujaida David bebun nia 29 Davidin jancha wakin yuikin:

—Ea chakabuwakubainkin ea datepayabu ea jatu bextexunmis Jehován ea ninkaya xabakabi en mia yuiaii. 30 Ea kachu min bake Salomón en janu xanen ibui tsaumis anu tsauxun Israelin enabu dasibi yunui xanen ibujaidakunkainxanai ikis nukun bake Salomón en mia katuxunaii. Israelin enabu mekenika Dios Jehován ea ninkaya en mibe yubakaii— akaya

31 xanen ibujaida David bebun nia ana jaki danti iki beti ixun jui kushipawen yuikin:

—¡En xanen ibujaida David jau jiwepakenunwen!— ikaya

32 januxun nukunabu Diosbe janchaxunika Sadoc inun Diosun jancha yuixunika Natán inun Joiadán bake Benaías jau benunbun Davidin jatu yunua jatu yuiabu ja dabe inun besti xanen ibu bebun ma bea mapuabun 33 jatu yuikin:

—Ea dayaxunmisbu en xanen ibububetan en bake Salomón iyukin en mula ea besti en jaki katsaumekainmis katsauntan ja paxku deti ika jawen kena Guihón anu en mulaki katsaunbainkin iyutankanwen. 34 Jadixun Israelin enabu xanen ibujaida jau jatu ixunxanun jatu unanti wamakin min nukunabu Diosbe janchaxunika Sadoc inun min Diosun jancha yuixunika Natánen jadixun xeni ininipawen maukatankanwen. Jaska watan chaxuwan maxun jatu chan chan amakin: “Xanen ibujaida Salomón jau jiwekunkainxanunwen”, akin dasibibun jui kushipawen jatu yuimakubidantankanwen. 35 Januxun Israelin enabu inun Judán enabu yunui jau xanen ibujaidakunkainxanun en ma katuawen taea iwekin en xanen ibui janu tsaumis anu tsaua en xantukun ja xanen ibujaidai ikunkainxanai en jiwe jawendua ewapa anu jabe betankanwen— jatu wa 36 Joiadán bake Benaíasin kemakin yuikin:

—¡Jabiaskaki! ¡En xanen ibujaida Davidin mekenika Dios Jehován jau jabiaskadi yunukubainunwen! 37 Jaska mia medabewakubidanmis jabiaskadi wakin Jehován jau Salomón medabewakubainunwen, xanen ibu kushipajaida wakin min imis mia binumakinan— ikaya

38 janua jawenabu Diosbe janchaxunika Sadoc inun Diosun jancha yuixunika Natán inun Joiadán bake Benaías detenamenikabu Querete nawabu inun Pelete nawabun David mekemisbube buxun Davidin mula Salomón katsauntan paxku debu deti ika Guihón anu iyuxun 39 Dioski nukuti tadi jiwe puntenibu anuxun xeni ininti maxunkia bitan Israelin enabu xanen ibujaida jatu unanti wamakin Diosbe nukunabu janchaxunika Sadocin Salomón xeni ininipa maukatan chaxuwan maxun jatu chan chan amakin dasibi ja jatube buabun jui kushipawen yuikin: “¡Xanen ibujaida Salomón jau jiwekunkainxanunwen!” akubainkin 40 jadia dasibibu benima chakayamabidankin tepedewe mawakubainkin Salomón mula katsaumekainai dasibibun chibain sai sai iki shanshanki ichakayamakubainaibun mai beshakunkainaya

41 Adonías inun ja jatubetan pikin meneaibun Jerusalén anu bei sai sai iki shanshanki ikubidanaibu jabun ana ninkaya chaxuwan maxun chan chan akubidanaibu Joabin jatubetan ninkai yuka iki:

—¿Jawamen? ¿Jaskai janchawanchakayamakanimenkain, Jerusalén anuadan?— ikaya

42 Joab jancha jenediama nukunabu Diosbe janchaxunika Abiatarin bake Jonatán Jerusalén anua kai jikiai Adoníasin uintan yuikin:

—Jikiwe, min juni mentsisipa kushipawen taea kaka pepa min nuku bexuinmenkainan— aka

43 Jonatánen kemakin Adonías yuikin:

—Jaskamaki. Xanen ibujaida David yununikatun Salomón katukin Israelin enabu nukun xanen ibujaida waxuki. 44 Diosbe nukunabu janchaxunika Sadoc inun, Diosun jancha yuixunika Natán inun, Joiadán bake Benaías inun, David mekenikabu Querete nawabu inun, Pelete nawabun jau Salomón iyukin mekebainunbun xanen ibujaida Davidin jatu yunuxuki. Xanen ibun jatu yunua jawen mulaki Salomón jaki katsauntan Guihón anu iyuabu 45 Israelin enabu xanen ibujaida jatu unanti wamakin Diosbe nukunabu janchaxunika Sadoc inun Diosun jancha yuixunika Natánen Salomón xeni ininipa maukai dasibibun uintan benima chakayamai chintunbidankanikiki, jaskawen taea Jerusalén anu jiweabu sai sai ichakayamakubidanaibu man ninkaidan. 46 Ja dikabi xanen ibujaidatun tsauti ibuwai Salomón ma inai jaki tsauxuki. 47 Jaska bestima Davidin dayadubu dasibi benimai buxun yuikin: “Diosun jau Salomón duawakubainxanunwen, xanen ibu kushipa wakin mia binumakinan”, akeakeaibun xanen ibujaida Davidin Dios kenwain jawen dakati anu beti ixun 48 jatu yuikin: “En bake kayabi xanen ibujaidai xanen ibujaidatun tsauti anu ma tsaua en beduwen en uiainwen taexun Israelin enabu mekenika Dios Jehová benimawakin duawakin jau kenwankubainxanunbunwen”, akai ninkaxun ea yuikanxuki— akin Jonatánen Adonías yuia

49 Adonías xanen ibujaidanun, iwanan, jatu ichawatan pimai jabun ninkatan jaki datei saki saki iki taei benitan bestibu tibi paxaibun 50 jatu jaska waiwen taea: “Salomónen ea detetiduki”, ika datei Adonías jadi benikaini Dioski nukuti tadi jiwe puntenibu anu ka jau Salomónen ea kupikin tenanyamanun ika jawen kenwanti chi tapu maxun keska jawen ishchankan tsuma dakaken 51 uinbain tsuada kaxun Salomón yuikin:

—Min xanen ibujaidaiwen taea miki Adonías datei jau min deteyamanun Dioski nukuti tadi jiwe anuxun jawen kenwanti chi tapu maxun keska Adoníasin tsuma dakaxun yuikin: “Jau ea tenanyamanun, ixun xanen ibujaida Salomón ebe yubakatidu en ea akaii”, itan jaska jawen jancha ea bemaxuki— aka

52 Salomónen ninkatan yuikin:

—Peki. Juni pepa keska ikunkainaya jawa chakabuma ixanikiki. Jawen yudakidi en jawa meamajaida ixanaii. Jakia jawada chakabu jakidi en bechiadan, mawaxanikiki— itan

53 Dios kenwanti chi tapu anua jau iwenunbun Salomónen jatu yunua kaxun Adonías iweabu jau jawen nuinun xanen ibujaida Salomón bebun Adonías di iki beutan beti ika daka Salomónen yunukin: “Jawa chakabuwama min jiwekunkainkatsis ikaidan, min jiwe anu unanuma kadiwe”, aka jawa yuiama benimai kainkainken