Salomón Tiro xanen ibujaida Hirambe yubakanikiaki, na janchadan
(2 Cr 2.1-18)
5
Jawen epa Davidin xantukun Israelin enabu jau jatun xanen ibujaida ikunkainxanun Salomón ma katuimabu Tiro xanen ibujaida Hiramnen tapintan jawen epa David jaibuwai bechipaikubainiwen taexun Salomón jaibuwakatsis ikin Salomónbe jau janchaxuntanunbun, iwanan, Hiramnen jawen janchaxunikabu jatu yunua 2 buxun jau jawen jancha yuixuntanunbun eska Salomónen jatu yuikin: 3 “En epaki sinataibu Jehován jatu maemamadiama nemai en epa jatube detenamekunkainmiswen taexun jawen mekenika Dios Jehová januxun kenwanti jiwe en epan axuntiduma ikunkainima min unaiin. 4 Jakia en mekenika Dios Jehován ma nuku unanuma jiwemakubainaya nukuki sinatataibu inun jamapai chakabu nun ana jayamaki. 5 Jehován en epa yuikin: ‘Min xantukun jau Israelin enabu yunui xanen ibujaidakunkainxanun min bake katukin en kushipa waiwen taexun jatun en kenwanti jiwe ea axunxanikiki’, akin en epa yubaniwen taexun en mekenika Dios Jehová januxun kenwanti jiwe templo jawendua en axunkatsis ikaii. 6 Jaskawen taexun mai pakea Líbano mati matipa anuxun jau kuxa ea mextexununbun jatu ea yunuxunwen. En dayadubun matun dayadubu jatu medabewaxankanikiki. Jaska Sidón nawabun ji senkea unanjaidakin pewamisbu enabu betsan jabiaskadi watidubumadan, min unanjaidaiwen taexun min dayadubun ea dayaxunaibun jawada min ea yukai en mia pakaxanaii”, aka Salomónen jancha buxun7 jatun xanen ibu Hiram yuiabu Salomónen jancha ninkatan shinan chankain benimakin yuikin: “Jawenabu midimabu jau yunukubainxanun Jehován Davidin juni bake unanepa ma inanwen taexun Jehová kenwanankanwen”, itan
8 jau jawen janchadi buxuntanxanunbun Salomón kenexunkin: “Min jancha min ea bemashina bixun en uinxuki. Peki. Ja ji kuxa inun ji ciprés jau mia senkexunkubainxanunbun en jatu mia yunuxunaii. 9 Líbano mati matipa anuxun ji bestibu tibi dedatan jawen mebi mextekin keyukubainaibu xukua betsabun jawen ji jidabi chaipa xadabainkin machi butemabainkin ianenwan kexa manchintan janua ana chintunkain ji ichapa xadabidanbidankin ianenwan kexa janus manchinbidanbidankin jawa jeneama uxe ichapa jabias dayakubainaibun, xukua betsabun keku tibi watan ianenwan pasu bukin surkidi bukubainkin janu min ea yunuxanai anu keti atan ji keku pekatan jene anua nexebainbainkin maspu wakubainkin jeneama uxe ichapa jabias dayakubainaibun janua min dayadubun Jerusalén anu bukubainxankanikiki. Jati min bechipaiai min ea yunuaiti nun jenexanaii.
Jamen minadan, jaska en jiwe ewapa jawendua anu ebe dayaibu inun enabu en jiwe anu ebe jiweabu jau pikubainxanunbun jawada piti min jaya en mia yukai ea inankubainxanwen”, aka jawen jancha kenexunkin keyua Salomón anu jau butanunbun xanen ibu Hiramnen jatu yunua buxun Salomón inanbu
10 jawen jancha Salomónen bechipaikin jati ji Salomón jayakatsi ikin Hiram yukaima inankubainaya 11 Hiramnen jiwe ewapa jawendua anu jiweabun jau ja pikubainunbun año tibi 4,400,000 litro xekiwan trigo inun 4,400 litro olivo xeni pepa Salomónen Hiram inankubainaya 12 jaska Jehován Salomón yubaimaxun jawen unanepa shinan xabakabi ma inainmawen taea jawen unanuma jiwekainkin Salomón Hirambe yubakanikiaki.
13 Jabiatiandi juni kushipabu midima Líbano anu jau jabu dayaxunkubainxanunbun Israelin enabu mae tibi anua jawen xanen ibu bexmasbun jau jatu katukubauntanunbun Salomónen jatu yunua Israelin enabun mae tibi anu uinkubaunkin bestibu tibi katukubaunkin 30,000 dayadu tsuma wakin jatu ichawabun 14 januxun xanen ibujaidatun jawen dayakapa xanen ibu Adoniram katutan Líbano anu yununikiaki. Januxun jabu dayatantanxanaibu jatu paxkakin 10,000 junibu xukuabu dabe inun besti watan uxe bestichai nichin jau dayaxanunbun xukuabu tibi jawa jatu pakama piti besti inankin año tibi jatu yunukubainaya jatu jaska wakubaina jabu dukun xukuabu buabu Líbano nawabube ji dayai uxe bestichai dayai menetanaibun jatun jiwe anu bua jadi uxe dabe dayaibun janua ja kachu xukua betsadi bui jikia jabudi dayaibun jabu dukun xukuabu jatun jiwe anu beabun ana uxe bestichai dayai meneaibu ana ja kachu xukuabu bui jikia dayadiaibun ja kachu xukuabu jatun jiwe anu bea dayaibun ana uxe bestichai dayai meneaibun jabu dukun butanima ana dayai bui jikiabu ja xukua dabe inun besti jaska wakubainaibu jawenabus tsua nuitapabumaken 15 Salomónen jawen mai pakea anua jawen dayadubu jatu dayamakubaini mati matipa anuxun 80,000 mishki ewapa pewaibu inun 70,000 ji chaipa inun mishki ewapa xadabainaibu inun 16 3,300 xanen ibu bexmasbun jabun dayadubu yunukubainmisbu jati tana keyuama 17 Dios kenwanti jiwe jemaintin anu jaki tsamabaunti jau axununbun mishki ewapa datsai daya kadujaidakin 6 dexun wakin jabiatiubus mishki midima jau bixuntanunbun xanen ibujaida Salomónen jatu yunua 18 mae betsa Guebal Jerusalén dapi jiweabun januxun ji inun mishki pewakubainmisbu anu Salomón jabun ji inun mishki dayakin pewaxunikabu inun Hiramnen ji dayakin pewai unanepajaidabun jatun mae Guebal anua bei Jerusalén dapi jiwea 7 año Israelin enabube dayakin Jehová kenwanti jiwe jau axununbun jaska wati waima chibankin jawen mishki tibi tanakin pewakubainkin bitan bitankin inun bebidan bebidankin manchinxunibukiaki.