5 janua Davidin dintu anu Joab kaxun yuikin:

—Xanen ibuun, mia inun min juni bakebu inun, min ainbu bakebu inun, min ain betsa betsapabu inun, min esclava ain betsa betsapabu jau mawayamanunbun miki sinataibu nemaxunkin nun mia medabewaxu min jatu dakewaii. 6 Minabu xanen ibu bexmasbu inun, mia dayaxunmisbu jawa jatukidi shinanma jatu danankin mia tenankatsis ishianbu jatu bestiwen nuikin min jatu bechipaibiai jakia mia bechipaiaibu min jabu danankin dasibibu min ma jatu uinmaii, kaxa chakayamakinan. Natian nukubu nun mawanun min nuku yunuti shadaxuki, jau Absalón jiwenunan, jaska min nuiai keska shinankinan. 7 Xanen ibuun, kaindiwe. Min xanen ibu bexmasbu inun min dayadubu inun min detenamenikabu jabun mia chibanmisbu ikis dasibibu jatu benimawakin jancha pepawen jatu kenwanwen. Min jatu benimawamadan, dasibi paxai na jabia meshu medan juni bestichai mibe bashikuamaki. Jehován nuku ninkaya nadan en mia yubaii. Min jatu ana jaibuwakin benimawama min bakeishtatian taewai jawada chakabu min mekubidani mia anua kain na chakabu eskatian pikujaidai min uiaiin— akin jancha kushipawen yui keyua

8 jawen jancha ninkatan kaxa nesetan benitan kainkaini ka maewan jikiti xui beputi kexa tsauken: “Xanen ibu David mae jikiti anu ma tsauaki”, itan chanibaunaibu ninkatan David tsaua bebun dasibibun daewai beabu januxun jancha pepawen Davidin jatu ana benimawanikiaki.

Israelin enabu xukuabun Absalón chibanbiai jatun jiwe tibi anua paxaimabu 9 jabu Israelin enabu xukuabu tibi anua yudan kaian ja iki yuinamei: “Ja dukun nukuki sinatakin Filisteo nawabun nuku ichakawakubainbiaibun Davidin nuku jatu nemaxunkin jatu tenankin keyuniki. Jakia jawen juni bake Absalónwen datei nukun mai pakea Jene Jordán ukedi David paxai junekainimaki. 10 Xanen ibu wakin jawen bake Absalón nun katubiaimaken detenamekin ma nuku tenananshinabuki. Xanen ibu David jau ana juxanun ¿jawa manakin nun shinain?” iake iakeaibun

11 jaska yuikubainaibun Jene Jordán ukedi Mahanaim anuxundi ninka keyubaunaibun Davidin jiwe anuxundi jabias yuiaibu Davidin ninkatan Diosbe jawenabu janchaxunika dabe Sadoc inun Abiatar anu jawen jancha jatu bumakin Davidin jatu yuikin: “Judán enabu anibu unanepabube janchakin en jancha eska jatu ea yuixunkanwen: ‘En xanen ibui jiwemis anu en ana chintuntidumenkain, xanen ibubube ea janchaxunkanwen.’ 12 Jabu yuikin: ‘En ana jawaki teatimaki. ¿Jatian man ea iyuai? Jatixuinda en manatidumaki. Matudan, man enabu kayabiki’, akin jatu jancha bumatan 13 januxun Amasákidi jancha bumakin yuikin: ‘Min en puin bakewen taea nun jabias namiki. Joab xantukun en detenamenikabun min jatun xanen ibu ikunkainxanun en mia katui kakatsi shinaiin. Jaska en mia yubai ninkawe. En mia yubashina en mia akamaken Jehován jau ea kupijaidaxanunwen’ ”, jatu wa Sadoc inun Abiatarin jabias jancha Davidkidi jatu yuixunabu

14 jaska ninkatan Judán enabun junibu dasibibun shinan betsa watan jabiaskas shinankin jatun jancha Davidkidi yuikin: “Xanen ibu Davidan, jau dasibi jawen xanen ibu bexmasbube Jerusalén anu jau chintundikidanunwen”, ashianbu 15 jaskaken David chintunkidanun ika Jene Jordán pukei juai David ana jaibuwakin beyawakin medabewatanun ika Judán enabu junibu Guilgal anuabu i buaibun 16 Benjamínen enabu betsa Bahurim anua kaini Guerán juni bake Simín Judán enabun ibuaibun jatubetan ikin David daewatanun ika jawaida jatube butukainaya 17 jabun chibain 1,000 Benjamínen enabu junibu jabe buaibun jabiatiandi Saúlun enabun dayadu mekenika Sibá jawen 15 juni bakebu inun jawen 20 esclavo dayadubube kadiai xanen ibujaida David judiama jabu dukuntun 18 Jene Jordán pukebain xanen ibujaida Davidin enabu inun jatun mabu bexunun ika buxun mabu pewabu kemawatan jene pukematantankin jaska wakin jatu medabewaya jakidi David pe shinanyan Jene Jordán David pukenun ika kapanan Simí jatun mishki puta puta akima kai David bebun main di ika beuxun datekin 19 yuikin:

—Xanen ibuun, chakabukin en kanejaidaimaki. Jerusalén anua min kainkidanaya en min dayadubia mia chakabuwakin en mia icha icha akima ea shinanma ea jakimaxunwen, ana eki sinatati juneamadan, jaska en mia yukaidan. 20 En ibubis chakabuima en unainwen taea Josén enabu inun Israelbu dasibibun mia dananbiaimabun min nukun xanen ibujaida ean dukun mia inun ika en juxuki— akaya 21 januxun Davidin pui Seruián juni bake Abisain David yuidiakin:

—Min nukun xanen ibujaida Jehován katuni Simín yupukin mia atimapa waimawen taea ikis na jabiatian jau mawanunwen— ikaya

22 jakia Davidin kemakin yuikin:

—Seruián bakebuun, jaska ja junin kaneimadan, matunamaki. ¿Jaskakin man ea nemaxunkatsis ikai? Israelin enabu dasibi en ana jatu xanen ibuxuni kai ikis en pe shinainwen taea chanima Israelin enabu tsuabuda na xabatian ana mawatidubumaki— jatu watan

23 Simí uinkin yuikin:

—Jehován en shinan unanyan min chakabuimawen taea ikis min mawamaki, en mia yubaidan— akaya

24 janua Mefi-bóset Saúlun bababiaken jawen bake keskakidi shinanmisbu jadi jatubetan ana beyawakin itanun ika kadiai, David paxai taekainaitian Mefi-bóset Davidwen nuijaidai jatian ana jawen yuda jatu mekemama jawen tae ana chukisma inun, jawen kexni ana aisma inun, jawen tadi ana jatu patsamaisma David unanuma chintunkidanaya jawen yuda jawenduama 25 Jerusalén anua kainkidan David ma jikia yukatanun ika Mefi-bóset juxun David yukatushia:

—Mefi-bósetiin, ¿jaskai min ebe kama ikimamen, en paxai kayadan?— aka

26 jatun daewanun, iwanan, yuikin:

—En xanen ibuun, en dayadun ea padainmaki. Jaki katsaumekaini mibe kanun, iwanan, en asno anu jau ea kabekanxunun en dayadu en yunuimaki, en tae babuwen taexunan. 27 Jakia ea axuanmabia mia anu ka ekidi chanichakakin mia padantanimaki. Jaskabiaimaken min en xanen ibudan, min Diosun nai tsuma keskawen taexun jaska min pe shinain min axanaii. 28 En juchi Saúlun mia tenanpai iniwen taea en juchi Saúlun enabu min jatu tenan keyutidubia ewen nuikin min tapu anuxun ea pimakubainkatsi min ea kenatan min ea yubaniki. Jaskawen taexun jawada betsa en mia ana yukatidumaki— aka

29 ana jakidi shinanma xanen ibujaida Davidin kemakin yuikin:

—Min juchin basi bai inun yunu bai jau man paxkaxanunbun mia inun Sibá en yunubainimaki. En mikidi shinan betsa wamawen taea jamenmen nun ana janchatidumaki— aka

30 jaska wabia Mefi-bósetin ana yuikin:

—Israelin enabu dasibi ana yunukubainxanun ika min jiwe anu jawama unanuma min ana chintuainwen taea miwen besti en benimajaidaiwen taexun Sibán bai dasibi ibuwatiduki— ikaya

31-32 janua juni betsa jawen kena Barzilai Galaad anua kaini anibujaida 80 badiya basi bai inun yunu betsa betsapa bai ichapa inun dayadu midima jayawen taexun Mahanaim anu David jiweyuaya jawen uxati inun tadi inun yunu inun inabu betsa betsapa David inun jawenabus inankubainaya atimas Jerusalén anu David kaya nichintanun ika Barzilai jawen mae Roguelim anua butukidan xanen ibujaida David nichin Jene Jordán pukebain kexa betsaudia chintunkidankatsi Barzilain David yuikin:

—En ma kaii— aka 33 jawen jaibu uin jawen nuikin xanen ibujaida Davidin Barzilai yuikin:

—Jerusalén anu ebe kawe. Janu min ebe jiweaya en mia pe mekekubainxanaii— aka

34 jakia Barzilain kemakin yuikin:

—Min ea pejaida yuibia en xanen ibube Jerusalén anu en katidubia ana jatida badi en jiwetidu jayamaki, ma en mestebuwen taeadan. 35 Eadan, en ma 80 año jayaki. Piti inun nuxuti nis meama ma en janpaismaniki. Jaskawen taea nis inun paisma jadatuda en yuitidumaki. Ja dikabi junibu inun ainbuaibu kantaibu xabakabi en ana jatu ninkatidumaki. Jaska kakin min en xanen ibu en mia bika tenematidumaki. 36 Mibetan besti Jene Jordán pukebaini en kaii. ¿Jaskakin ja manakuti min ea axunkatsis ikai? Jamenmen en katiduki. 37 Ea jaska wama ea jenewe. En mae anua en mawa jau en ibubube ea maiwaxanunbun en kai, ea nemayamawe. Jakia xanen ibuun, dayadu betsa min jayaki, en juni bake Quimhamnan. Mibe kaya jaska min shinain amakin yunukubainxanwen, jau mia ninkanunan— aka

38 xanen ibujaida Davidin kemakin yuikin:

—Peki, ja ebe nichinwen. Jawada pepa shinankin min jancha min ea bumaya min bake en axunxanaii. Jawada min ea yukai en mia axunxanaii— atan

39 juni dasibi Jene Jordán pukebainaibun xanen ibujaida David pukekain jatun beyawen taexun Barzilai ikuxun tantsu atan pe nichian jawen mae anu Barzilai chintunkaini atimas jikiaya, 40 Guilgal anu xanen ibujaida Davidin Quimham iyui kai jikiken Judán enabu detenamenikabu inun Israelin enabu betsabu xukua detenamenikabu namakis jabu paxama niti ikimabu David inun ika Guilgal anudi bunibukiaki. Saúl mawaimaken Hebrón anu Judán enabu yunui David xanen ibui taeaya Israelin enabu 10 xukuabu Jerusalén nortekidi jiwebaunabu ibubis kenai: “Nun Israelin enabu kayabiki, Judán enabu nuku anua ma tadi paxkabudan, inibuwen taea 10 xukuabu norte jiwebaunabu Israelki”, akin Jerusalén dapi inun surkidi jiwebaunabu: “Judáki”, akin kenakin taewanibukiaki. 41 Guilgal anuxun xanen ibujaida David uinun ika Israel xanen ibubu inun jatun anibu unanepabu dasibi David anu buxun yukakin:

—Mia inun minabus inun jabun mia chibanmisbu jatu ikin Jene Jordán matu pukemai bukin ¿jaskakin nukunabubia nuku juntanbain: “Inun bekanwen”, ikama jatunas mia wai Judán junibun jatun mesti xanen ibuyakanimenkain, min nukun xanen ibudibiakenan?— akaibun

42 Judán junibun ninkatan Israelin junibu yuikin:

—Jamenmens man nukuki sinatatidumaki. Jabia nukunabi kayabi nukun xanen ibu nun itanshinaki. ¿Jawawen dabanan man nukuki sinatai? ¿Nun xanen ibun piti pishianmen? Jawen jawa nun bishiandaka. Nuku jawa inanmaki— akabu

43 ja ikin Israelin junibun kemakin yuikin:

—Matunabubia man jaska shinanmaken nukun xanen ibun nuku dasibi mekemiswen taea nukun dukun ikatsi nun shinan taewashinaki, 10 xukua nun matu binuabunan. Matudan, man xuku bestichaiki. ¿Jaskakin man nuku danain? David xanen ibujaidawanun, iwanan, ana iweti shinankin nuku dukuntun nun shinanshinaki, matu dukunmadan— jatu wabu

chanima shinan pewabiai ja ibukuni Israelin junibu binukin jancha kushipawen Judán junibun jatu ja a chakayamanibukiaki.