3 Janua jawen jiwe ewapa jawendua Jerusalén anu David jikixun jawen 10 nantakea ain dayadubun jawen jiwe jau mekexununbun Davidin jatu jenebainima jiwe betsa anu jau jiwekubainxanunbun Davidin jatu maewa janua jau jabun jatu uinkin pe mekekubainxanunbun jawen detenamenikabu Davidin jatu yunuxun jatuwen nuikin piti inun tadi jatu inanbiakubainkin ana jabu chutama jawen bene ma mawani keskabu tadi jiweabu jatunabun jatu uin jatuki batidubu jiwea jabianua mawakubainibukiaki.

4 Januxun jawen detenamenika xanen ibu Amasá Davidin kenaxun yunukin:

—Judán junibu dasibi ichawakin jatu yuikubauntanwen. Xaba dabe inun besti kaya jatu ichawabidani jatu iwei juxanwen— aka

5 jatu ichawatanun ika kashian jati xaba Davidin yunushina binumai judiamawen 6 taexun Davidin Abisai yuikin:

—Absalónen nuku akima binumakin Sebán nuku chakabujaidawatiduki. Jaskawen taexun en detenamenikabu nenu en jaya jatu iyukin Sebá janun paxai junenun chibantankanwen. Nun jaska wama mae mishki kenebaunibu kushipa betsa betsapa anu jawenabube Sebá paxai jikixun jadi junexun betsa betsapawen chakabuwakin nuku bika tenematiduki— aka

7 detenamenikabu Joabin yunumis inun, Querete nawabu inun, Pelete nawabu xanen ibujaida David mekemisbu inun jabu detenamea unanjaidaibu jawen betsa Abisain jatu katutan Sebá chibanun ika Jerusalén anu xanen ibu bexmas Abisaibe kainbaini bui 8 Gabaón anu mishkipanwan daka dapi jikiabun janu Judá junibu jatu itani Amasá jatuki nukuaya, janua Joabin jawen detenameti tadi sawea jawen nanexeketiki machatu chaipa jawen usuntiki usunkin mestenwantan Amasákidi kai jawen machatu chaipa meken yusmaudi jawaida bitan tsumatan 9 padankin daewanikapaikin Amasá tantsu anun, iwanan, jawen kexni chaipa meken yusiudi tsumatan Joabin yukakin:

—Juchiin, ¿jaska min kai petanai?— aka

10 Joabin jawen machatu chaipa jayama dabanen Amasán jawa shinanma dateamaken Joabin jawaida jawen puku naxtu anu chachikin main di akin ukedi pesa

Amasá main tin ika puku xadabauni itimaskai unanxubida mawaya Joabin ana nameama jawen betsa Abisaibe kai Bicrín bake Sebá chibain buaibun 11 Joabin detenamenika betsa Amasán yuda daka dapi nixun beaibu jatu yuikin:

—Tsuanda Joab bechipaikin nukun xanen ibujaida David medabewakatsis ikin Joab chibankubainkanwen— jatu wapakeaya

12 jakia bai puchinin Amasá jimin iduma mawai dabeakeakeaya ichapa bei Amasá daka anu niti itan uiainbun janua budiabuma Joabin detenamenikan uinkin unantan Amasán yuda xadabain jamaudi bai kexa jana dakaken tadi kextupawen achimatan 13 jawen yuda ana uianma Sebá achitanun ika Joabbe bukin dainbainbainaibun

14 janua Sebá kai jatu benai Israel xukuabu tibi anu Sebán benakeakebainaya jawen epa Bicrín enabu Sebáki ichabain maewan betsa jawen kena Abel-bet-maacá mishkiwen kenebaunibu anu jabe jikiabu 15 Abel-bet-maacá anu kema anu detenamenikabu ichapa Joabin jatu iyuxun tsua paxatiduma wakin jatu kenebauntan janu mapekei inun janu butukain pia kuinwen jatu tsakati wakin mai manchinkubainkin kene mati aki kanun jenetan dasibibun mishki kenenibu bedankin main nidi anun ika yubakaibun 16 jawaida mae mishki kenebaunibu anu ainbu unanepa kainkaun nixun “¡Juu!” akin jatu yuikin:

—Ea ninkakanwen. Ewen nuikin ea ninkakanwen. Joabbe en janchakatsis ikai ea yuixunkanwen, jau nedi jununan— jatu wa

17 jatu jaska wa Joab yuiabu date duakabi Joab maewan kenebaunibu anu dapi Joab ka ainbu unanepatun yukakin:

—¿Miadan, min jabiamen, Joabdan?— aka

kemakin yuikin:

—Jaa, en Joabki— aka

ainbun ana yuikin:

—En min dayaduwen taexun en jancha ea ninkayuwe— aka

kemakin:

—En mia ninkai janchawe— aka

18 jancha wakin yuikin:

—“Na maekidi nukun xenipabun yuikinan, tsuanda ja dukun ja mae chakabuwadiamadan, Abel-bet-maacá jau yukanunbunwen”, jatu wa jaska na mae Abel anu bexun jatun chakabu yukaibu dasibi chakabu pewakin jatu keyuxunkubainikiaki. 19 Nukun maewan Israelin enabun ewa keskaki. Nenu jawama unanuma nun jiwemiski, Jehová chibain chintuanmadan. Nun jaskabiaken nukun maewan yamawanun ixun ¿min nuku jaska wai? ¿Jaskakin Jehován maewanbiaken min yamawakatsis iki ikai?— aka

20 Joabin kemakin yuikin:

—Eanan, en jaska shinanmaki. Yamawakin en bedan bedan akatsi ikamaki. 21 Jaska wakatsi en yubakamaki. Jakia Efraínen enabun mananan mati matipa anua juni bestichai jawen kena Sebádan, nukun xanen ibujaida David jau jenebainunbun jancha chakabukidankin Israelin enabu Sebán jatu yunubidanshinaki. Ja besti chibanbidan achinun ika nun jushianki. Ja ea inankanwen, man ea inanken matun maewan jenebainkin en detenamenikabu en jatu iyuaidan— aka

ainbun kemakin Joab yuikin:

—Peki. Kenebaunibu anuxun jawen buxka nun mianu udeaiin— abain

22 jawenabube ichaxun jawen unanepa janchawen jatu shinan betsa wama Sebá achixun textexun Joab anu Sebán buxka udenxunabu, bixun jawen detenamenikabu jau jenebainunbun jawen trompeta jau chan chan anunbun Joabin jatu yunua chan chan akaibu ninkatan ja maewan jenebaini juni tibi jatun jiwe anu buaibun jawen buxka David uinmanun ika Jerusalén anu Joab chintunkainikiaki.

23 Detenamenikabu Israel dasibi yunui Joab xanen ibu ikunkainaya, janua Querete nawabu inun Pelete nawabun jabun David mekemisbu jatun xanen ibudan, Joiadán juni bake Benaías inikiaki. 24 Jamen Adoramnan, jatun jatu jamen jatu dayama chakayamakin yunumis jatun xanen ibudi ikunkainikiaki. Xanen ibu David kenexunikadan, Ahiludin juni bake Josafat ikunkainikiaki. 25 Jaskakubainaibukidi jabun kaka tibi Seván jatukidi kenekubainaya janua jawenabu Diosbe jatu janchaxunikabu dabe Sadoc inun Abiatar ikubainaibun 26 ja mae Jaír anua Irá Diosbe jatu janchaxunikan David medabewakubainikiaki.