—Man detenamei kayadan, en matube kaii— jatu wa

3 jakia jabun kemakin:

—Jaskamaki. Xanen ibuun, nukube kayamawe. Nuku deteaibun nun paxaimenkain. Nuku namakis tenankanimenkain. Absalón inun jawenabun nuku detenun ika juama jakia mia besti tenankin yamawakatsis ikanikiki. Jaskaken mia min nukun xanen ibu nun mia mekei yaushijaidaii, nuku 10,000 keskadan. Jaskawen taea min nukun xanen ibudan, na jabia mae mishki kenebaunibu anu min niti ika pejaidaki. Na jabianuxun betsabu min jatu yunutiduki, jau nuku medabewai bununbunan— akabu

4 jatun jancha pe ninkatan xanen ibujaida Davidin jatu kemakin:

—Jawada pe man shinankin man ea yunubaina en matu axuntiduki— jatu watan jawaida jikiti xui anua kaintan David xabakan nixun jatu uianyan detenamenikabu xukua tibi 1,000 paxkaxu 100 tibi jatun xanen ibuya maewan Mahanaim anua kainbainbainaibun

5 Joab inun Abisai inun Itai jabu tibi kaindiabainaibu Davidin jatu yuikin:

—Man ewen nuaiwen taexun en bake Absalón achitan ea pe mekexuntankanwen— jatu wapakeaya jaska Absalónkidi Davidin jatu yunuai dasibibun ninkabainbainaibun 6 Absalón Israelin enabu xanen ibuxunaya jawen detenamenikabube detenamenun ika main bui

Efraín paxku napanpa anu ni xukua tsukus anu Davidin enabu inun Absalónen enabu nukukunantan detenamei taei 7-8 Davidin enabun jatu maemakin detekin midima tenankubaini mai pakea jidabi anua jatu detekubainkin machatu chaipawen mawaida xabakanxun jatu tenantidubumabia paxai bui ni xukua tsukus anu jiki idui yumainbu midimajaida jatu tenanbu jabias xabaki 20,000 junibu mawanibukiaki.

9 Detenameaibu napuman Absalón mulo katsaumea kainkainaya achitanun ika Davidin enabu jachun kushibainkin chibanbainabu muloki katsaua Absalón paxai kushikaini ji ewapa punyan tinian tebebakainkin Absalónen bu chaipa ji punyan tuaxki ustankin yabukin mestenwan dunuken mulo besti ja mais kushikainaya 10 Joabin detenamenika betsan Absalón dunua uinbaini kaxun Joab yuikin:

—Absalón ji punyanki jawen buwen yabukutan dunua jukin en uinbidanaii— aka

11 kemakin Joabin jawaida yuikin:

—¿Uinbiakin jawakin jabianua tenankin min main pakeama ixumen? Min jaska wabidanaya benimakin 10 plata pei jexe ewapa inun chinexeketi bena jawendua en mia inankeanaii— aka

12 jakia ja junin Joab kemakin yuikin:

—1,000 plata pei jexe min ea inanbia nukun xanen ibun bake en jawa jaki sinatakin ichakawantidumaki. Jawen bake Absalón mekenun ixun nukun xanen ibujaida Davidin mia inun Abisai inun Itai matu yunuai dasibitun nun ninkabidanaki. 13 Jaska min ea yunuai keska en abidanxudan, en jamen akeanxuki. Jakia dasibi yuka imiswen taexun nukun xanen ibu nun padantidumaki. Tapintan jawen bake en tenananken jau ea kupinun jatu yunuaya mian min ea jawa nemaxuntidumaki— aka

14 Joabin kemakin yuikin:

—Jatixuinda jamen en mibe janchatidumaki— abain Absalón dunua anu kaxun jashi dabe inun besti buxun jawen juinti anu ja dabe inun bestiwen chachi chachi aka mawai xankan ikaya 15 janua 10 junibu jabun Joab medabewaibu kainbidan Absalón kexebaunxun namekin chachi chachi akabu mawaya 16 jatun mimawati trompeta jau chan chan anunbun Joabin jatu yunua chan chan akaibu ninkatan Absalónen Israelin enabu detenamenikabu chibankin jatu detekubainaibu jenetan Joabin jatu ma kenawen taea Joab anu chintunbidanaibu 17 Absalónen yuda butexun bukin ni tsukus anu kini ewapa anu jawen yuda putatan, mishki tunku shadabu bitan bitankin jawen yuda achimakin jaki maspu wakin keyatapawabu jatun xanen ibu Absalón ma mawa unantan Israelin enabun jabun chibankubainshinabu datei jatun jiwe tibi anu junei paxai buake buakenibukiaki.

18 Absalón mawadiama jiweyuxun jatu yunukin:

—En juni bake jayama iki kaimenkain. Jaki en kena en netain mishki keyatapa ea waxunkanwen— jatu wa mishki keyatapa nichinxunkin ja napanpa jawen kena Xanen Ibujaidatun Napanpa anu nichinxunabu janu jawen kena shinanpaketi jaki jawen kena netanikiaki. Natian ja mishki shinanmati keyatapa uinkin kenakin: “Absalón Shinanmatiki”, ikubainmisbuki.

19 Absalón ma mawaken Diosbe nukunabu janchaxunika Sadoc juni bake Ahimaasin Joab yukakin:

—Ja jaki sinatai Jehován jatu maemakin pewaxunxudan, ¿jawaida kain nukun xanen ibujaida anu kushikain yuitanpa?— aka

20 jakia Joabin kemakin yuikin:

—Ma nukun xanen ibujaidatun bake mawaxu jaki chanikin datekin min punu nukawai katidumaki. Xaba betsatian kaka betsa bui min ana chanikunkainxanaii. Ikis juni betsa kayutiduki— atan

21 dabekekaun jawen detenamenika betsa Etiopía nawa yuikin:

—Jaska min uinxu nukun xanen ibujaida jawaida kushikain yuitanwen— aka

Joab bebun ja Etiopía nawa danti ika benitan kushikainaya 22 jawen shinan betsa wakatsi ikama Ahimaasin Joab ana yuikin:

—Jabiaskabiaken ¿Etiopía nawa ichun chibain kushidiakaintanpa?— aka

jakia Joabin kemakin ana yuikin:

—¿Jaskai katanun ika min ea ikai? Ea ninkawe. Min xanen ibu banabimabia jawen manakuti min bitidumaki— aka

23 Ahimaasin kemakin:

—Jaska chanima min ea yuibia ninkamas en ja ichun kushikainaii— aka jawen shinan unankin Joabin yunukin:

—Peki. Chibain kushikaintanwen— aka

panpa anu kushikaini Ahimaasin Etiopía nawa dainbaini ja dukun bebui kaya 24 maewan jikiti xui beputi dabe namakis anu David tsauken ja jikiti xui mekenika ja mishki kenebaunibu beputi mamaki mapekekain nixun teskanxun chaijaida uinkin juni bestichai kushikidanai bechitan 25 jui kushipawen xanen ibu banabima, benimakin xanen ibujaida Davidin yuikin:

—Juni bestichai jukin kakape beikiki— aka 26 mekenikatun juni ja kachu kushikidanai uinkin ana jui kushipawen yuikin:

—Juni betsadi kushikidanikiki— aka

xanen ibujaida Davidin ana kemakin:

—Jabiatundi kakape beikiki— aka

27 jawen mekenikan ana yuikin:

—Jadi kushikidanai en uinmis en unaiin. Sadocin juni bake Ahimaaski— aka

xanen ibujaida Davidin kemakin yuikin:

—Jadan, juni pepaki. Chanima kakape beikiki— aka

28 Ahimaas chaima kematan xanen ibujaida David bebun main beutushitan beti ixun yuikin:

—Unanuma jiwewe. Min xanen ibu mia mebinkatsi ikaibu nuku jatu maemamakin keyuxuwen taexun min xanen ibun min mekenika Dios Jehová ja besti kenwananwen— aka

29 jawen jancha ninkabiakin Davidin jawaida yukakin:

—En bake Absalónan, ¿jaska pe kayamen?— aka

Ahimaasin kemakin yuikin:

—Min tsuma Joabin mia anu ea nichianyan itimaskajaidaibu en ninkabidanxuki. Jakia jaskakanxu en unanmaki— aka

30 ninkatan xanen ibujaida Davidin yunukin:

—Benikaun ukedi nixun manayuwe— aka

jaska yunua Ahimaas ikaya 31 jabiatiandi Etiopía nawa jikixun xanen ibujaida David yuikin:

—Xanen ibuun, kaka pepa en mia yuiaii. Ninkawe. Mia pepa waxunkin dasibi miki sinataibun kushipa nemakin jatu maemakin nun keyuxuki— aka

32 Etiopía nawa xanen ibujaida Davidin yukakin:

—En bake Absalónan, ¿jaska pemen?— aka

Etiopía nawan yuikin:

—Miki sinataibu inun min xanen ibu mia mebinkatsis ikaibu inun mia chakabuwanun ikaibu ja juni ixu keskai jau ikubainxanunbunwen— aka

33 jawen bake ma mawa unantan juinti metexekei nishmajaidatan mae jikiti xui mamaki dintu betsa manaundi anua kaxanun ika kai tapaitiwen inakainkin yuikin:

—¡En bake Absalóon! ¡En bake Absalóon! Min xantukun ea en mia mawaxunpanan min mia mawaxuki. ¡En bake Absalóon! ¡En bake Absalóon!— ikunkaini dintu medan jikia kaxa chakayamaya