—12,000 detenamenika pepabu jatu katunun ixun en shinaiin. Na jabias meshu medan David detetanun ika jatubetan en chibankatsi ikaii. 2 Ikis David inun jawenabu babua punu nuka maniabu jatu datetushikin jawaida nun jatu tenantiduki. Datei jawenabu dasibibun jenebaini paxaibun jatun xanen ibujaida David besti nun tenantiduki. 3 Juni bestichai min tenankatsis ikaii. Nun mia jaska waxunaya min epa ana jayamaken Israelin enabu en mia daewaxunxanaii, jau mia ana dananyamanunbunan. Jaskawen taea dasibibu unanuma jiwekubainxankanikiki— aka

4 Absalón inun anibu unanepa medabewanikabun ninkatan jawen yubati jancha pe bechipaiaibun 5 jakia jawen shinandi jau jatu yuiyunun Arquita nawa Husai jau kenatanunbun Absalónen jatu yunua yuitanabu 6 Absalón anu Husai jua Ahitófelin jaska jancha yubakin yuixunxu Absalónen Husai yukakin:

—Jaska Ahitófelin ma nuku yubaxudan, ¿jawen jancha chibankin nun atidumen? Nun atidumadaka. Jaskada mian min shinainmenkain, nuku yuiwe— aka

7 kemakin Husain yuikin:

—Jaska shinain pe yuibiamis ikis jaska yubakaxudan, pemaki. Entsedi mia yuinun ninkawe. 8 Min epa inun jawen detenamenikabu mentsisipa pubenjaidabuki. Yuinaka oso yuxan puben jawen bakebu bianbainabu pubenjaidakin benai keskai sinatai min epa mesejaida dakaki. Min unaiin. Ja dikabi min epa ma detenamei beyawen taea jawenabube uxama jakia tadi benanta junea uxakunkainikiki. 9 Na jabia ikis mishki tanpe medan kasmai, benanta tadi june anu ikaki. Jamen betsadan, detenamenikabu ichapama duakabi min jatu yunua min epan enabube detenamei mina jatidi mawakubainaibun jakidi banabitan: “Davidin enabun ma minabu jatu maemakin keyuabuki”, iwanan, yuikubainaibu dasibibun jabiaskas shinantidubuki. 10 Minabu puben sinatabu inu betsa león keskabia jaska ninkatan punu nukai babujaidaxankanikiki. Min epa inun jawenabu jabun chibanmisbu pubenjaidabudan, Israelin enabu dasibibun unanjaidakanikiki. 11 Ean en mia yusiainan, eska shinankin en mia yuiai ninkawe. Israelin enabu juni dasibibu norte Dan anua inun Sur Beerseba anua namakis jiweabu ianenwan kexa mashiti keska mia anu jau ichai keyuxanunbunwen. Ma min janu jatu ichawa min epan enabube detenamenun ika mian ibubis jatu yunui jatube kaxanwen. 12 Janida kawanai jaki nukutan nun detexanaii. Basnunwen basi mecha wamis keska wakin nun jatu achixanaii. Min epa inun jawenabu junibu tenan keyukin nun betsa jeneama ixanaii. 13 Jakia mae betsa mishkiwen kenebaunibu anu paxai jikiaibun Israelin enabu juni dasibibun dispi buxun jawen mishki kene tseka tseka akin keyutan dispiwen neatan xadabainbainkin paxku anu puta keyukin mishki bestichai nun jenetidumaki, jaska watan jatu dasibi tenankin keyukinan— aka

14 jaska wa ninkatan Absalón inun Israelin enabu anibu unanepabu yuinamei: “Ahitófelin nuku yusiain jancha pebia Arquita nawa Husain nuku yusiain janchawen Ahitófel binumakin pewaikiki”, inibukiaki. Absalón chakabuwamakatsi ikama Ahitófelin yusian jancha pepa Jehován jatu chibanmakin amama inikiaki.

15 Jatu jancha wabaini kaxun jawen yusian jancha Ahitófelin Absalón inun Israelin enabu anibu unanepabu jatu yuixu inun jawen yusian jancha jatu yuidiaxu Diosbe jawenabu janchaxunika Sadoc inun Abiatar Husain jatu banabimatan 16 ana jatu yuikin:

—David inun jawenabu jadi tsua jiweabuma anu bushianbu jau jatu tenanyamanunbun janua jene puketi pe anu ana uxama Jene Jordán kexa betsaudi jau jawaida pukebaintanunbun jawaidakain David jau yuitanunbun matun juni bakebu yunukanwen— jatu wa

17 Jerusalén anuxun jau jatu uinyamanunbun Diosbe jawenabu janchaxunikabun juni bake dabe Jonatán inun Ahimaas jatu yunukin nichian mae betsa Jerusalén binubaun jawen kena En-roguel anuxun manai maniabun jawen dayadu ainbu yuia ja ainbu jawaida kaxun jatu yuia David yuinun ika jawaida ja dabe kainbainaibun 18 jakia jaskabainaibun bedunan betsan jatu uintan ja dabetun David banabimanun ika buaibun jawaida kain Absalón banabima jatu yunua chibainbun janua jabu bui mae betsa Bahurim anu jatun jaibun jiwe jemaintin anu jikitan, jabianudi unpax bimisbu kini mishki kenebaunibu anu junei jikiaibun 19 januxun jawen ainen beputi ewapawen jatu bepuxun ja mamaki xekiwan trigo xemeshina jexe badin wankin bexna tsuan jawa unanmaken 20 ja kachu jatu ichun jatu benai Absalónen dayadubu buxun ainbu yukakin:

—¿Ahimaas inun Jonatánan, jani bukanxumen?— akabu

ainbun jatu bepadankin yuikin:

—Nenu nuku dainbainkanxuki, jenekidi bukinan— jatu wa, jenekidi buxun benakubauntani jatu bechiama Jerusalén anu chintunbainaibun 21 ma buabu uintan jatu bepeanbu unpax biti kini anua Ahimaas inun Jonatán kainbaini kushibain xanen ibujaida David anu buxun yuikin:

—Ahitófelin jau matu tenain benunbun jatu yunuxukiaki. Jawaida benitan jene pukedibaintankanwen— jatu wabu 22 jatun jancha ninkatan David inun jawenabu beni keyutan jawaidabaini Jene Jordán ma puke keyubainabun ma penaken jene kexa tsua ana janu jayabumaken

23 jawen yusian jancha ninkatan axuanbumawen taea Ahitófelin unantan punu nukai juinti nishmatan jawen asnoki katsaumekaini kainkaini janua kaini anu kaxun januxun jawen jiwe inun jawen mabu inun jawen yunu bai betsa betsapa jawenabus jatu yunu keyutan jabiatiandi dispi bua jiki nexatan ibubis tenexeketan mawa jawen epa maiwanibu dapi maiwadianibukiaki.

24 Jene Jordán pukebainshina nortekidi bui maewan betsa jawen kena Mahanaim anu David jawenabube jikiaya, jawen bake Absalónen Israelin enabubetan David chibain Jene Jordán pukediabainaibun

25 Joab Davidbe kashianwen taexun jawen detenamenikabu xanen ibu bena katukatsi ikin jau jatu bebuxunun Absalónen Amasá katunikiaki. Amasán epadan, Ismaelin enabu betsa jawen kena Itrá inikiaki. Itrá Abigailbe chutanamemisdan, Abigail inun jawen betsa Seruiá Nahasun bakebu inikiaki. Seruiá Joabin ewa inikiaki.

26 Galaad mai pakea anuxun Absalón inun Israelin enabu jabe buxun jatun tadi jiwe puntebaunabun 27-29 Mahanaim anu David kai jikitushiaibun jatu bechibidankin shinankin: “Jadi tsua jiweabumanua punu nuka, bunibidani unpax manubidankanikiki”, iwanan, jatu i pewakin jatu duawakin jaki dakati inun, mai kencha inun, mai kenti inun, jatun piti xekiwan dabe trigo inun, cebada dudu inun, tsui inun, yusu ewapa inun, yusu pexemishtin lentejas inun, buna bata inun, awa chuchu katsai buspuai inun, ina awa inun chaxuwan chuchu tanki Davidbe beabun jau pinunbun jawen dayadubu jatu bumaxuni Amón nawabun mae jatun kena Rabá anua Nahasun juni bake Sobí inun, mae betsa Lodebar anua Amielin juni bake Maquir inun, Galaad mai pakea mae betsa Roguelim anua Barzilai xanen ibun ja dabe inun bestitun Mahanaim anu David jikia bechibidan duawanibukiaki.