Sibán David jaibuwai jabe janchanikiaki, na janchadan
16
mati mananan atimas binubaini David ana kai, Davidin jaibu Jonatánen bake Mefi-bósetin dayadu jawen kena Sibá jawen jiwe anua kainkidani uintanun ika Davidki nukui kakin asno pepa dabe ja kabekantiyaki 200 misi ewapabu saku tibiki nanekin inun, 100 uva bimi tsusin tsanpawakin kextu shadabu watan sakuki matawatan inun, 100 bimi piti jushian saku tibidi matawatan bichi bixtu uva vinodi jaki nanetan duntanbaunkin bexe pewatan bui Davidki nukua 2 dasibi uinkin xanen ibujaida Davidin Sibá yukakin:—¿Jaskakin na jaska tibi min beai?— aka
daewakin Sibán kemakin yuikin:
—Na asno dabedan, xanen ibun enabus katsaumebaintidubuki. Misi inun bimidan, bedunanbu min detenamenikabun pitidubuki. Janu tsua jiweabumanu bui jin ikin vino atidubuki— aka
3 Davidin ana yukakin:
—¿Jania, min xanen ibu Saúl ipaunitun baba Mefi-bósetdan?— aka
Sibán kemakin yuikin:
—Jaska jawen juchi Saúl xanen ibukunkaini keska Israelin enabu dasibibun xanen ibu wakin ana katutidubuwen taea shinain en tsuma Mefi-bóset Jerusalén anu bashikuyuxuki— aka
4 jawen jancha ninkatan:
—Mefi-bóset en pepawabiani ana jakidi shinanma jawen jamapai tibi Mefi-bóset jayani mebintan ikis dasibi en mia yunuai minaki— aka
David bebun danti iki beti ixun Sibán kemakin yuikin:
—Peki. Min en xanen ibu kayabiwen taexun min ea medabewaya en mia shinankubainxanaii— aka
5 janua David ana kai mae betsa jawen kena Bahurim dainbainaya juni betsa Saúlun enabu Guerán bake jawen kena Simí ja bebun taxnikidan jawenabu inun jawen tsumabu detenamenikabun David mekebiabun jancha chakabuwakin ichakin 6 David inun jawen xanen ibu bexmasbukidi mishki tunku puta puta akubainkin 7 jaki sinatajaidakin yupukin Simín David yuikin:
—Miadan, min juni puben chakabuki. Nenu juama kawe, kawe— akin 8 —Saúl xanen ibuai mebinkin min jawenabu chakabuwakubainiwen taexun Jehován mia ma kupiaki. Min xanen ibuai mebintan min bake Absalón Jehován xanen ibu waikiki. Ibubis min chakabun mia ma achia miadan, min juni betsan jimi akubainmiski, jawa pepa wamadan— akaya
9 Seruián juni bake Abisain David yuikin:
—¿Jaskakin ja juni kaman mawa pisi mayai keskakin min en xanen ibu mia yupukin yuainmenkain? ¿Kaxun jawen buxka textetanpa?— aka
10 jakia xanen ibujaida Davidin kemakin yuikin:
—Seruián bakebuun, matu akamaki. Ea besti yupukin yuinun ja juni Jehován ma yunuamenkain. Jehován ma yunuadan: “¿Jaskakin min xanen ibu yupukin yuain?” akin, tsuan ja juni bextetidumaki— atan,
11 Abisai inun jawen xanen ibu bexmasbu Davidin ana jatu yuikin:
—En bake kayabitun besti ea tenanpanan ja juni Benjamínen enabu dikabitun ea yupuikiki. Nemayamakanwen, jabiaska Jehován yunuakidan. 12 Jaska ikis ea bika tenemaibun Jehován uinkin ekidi pe shinankin ea ana duawakubainxanimenkain, na yuputi jancha chakabu en ninkai keskamadan— jatu wabaini
13 David jawenabube bai tanabainaibun manan machi tantanbaini kakin David yuankin yupukubainkin mishki tunku inun mai mishpu Davidkidi Simín puta puta akubainaya 14 Simí ana shinanma David inun jawenabu bui Jene Jordán kexa anu nidi itan punu nukabaina juindukuin maniabun
Jerusalén anu Absalón jikinikiaki, na janchadan
15 Jerusalén anu Absalón jikinun ika kaya Israelin enabu ichapabu inun Ahitófel chibain buaibun 16 janua unudiadi Davidin jaibujaida Arquita nawa Husai Absalónki nukui jui kushipawen yui sai ikunkidani:
—¡Nukun xanen ibui jiwekunkainxanwen! ¡Jiwekunkainxanwen!— ikaya
17 metukin Absalón shinan chankanma Husai yukakin:
—Ea kenwankin en epa min jaibuwanidan, ¿ana shinanma min ma putamen? ¿Jaskai min jabe kama ishianmen?— aka
18 bepadankin Husain kemakin yuikin:
—En katidumaki. Jau xanen ibukunkainxanun tsuada Jehová inun Israelin enabu dasibibun ma katushinabe en bashikuyuaii. 19 ¿Ja dikabi tsua en medabewatidumen? Min en jaibun bakeki. Jaska min epa en medabewakubainima keska wadiakin unanepa janchawen en mia medabewakubainxanaii— aka jawen jancha Absalónen ninkatan
20 januxun chipu Absalónen Ahitófel yukakin:
—¿En epakidi nun jaskaxanai? ¿Jawa man ea shinanmakin yusintidumen?— aka
21 Ahitófelin kemakin Absalón yuikin:
—Jawen jiwe jawendua jau mekexununbun jawen 10 nantakea ain jawen dayadubu min epan jatu bashibainshina jabu tibi chutan keyuwe. Min jaska waya Israelin enabu dasibibun ninkakin min epa danankin min sinatamai unanxankanikiki. Ja dikabi jabun mia chibainbu dasibibu ana benimaxankanikiki— aka
22 jawen yusian chibankin Davidin jiwe jawendua mamaki tadi jiwe wakin puntexunabu Israelin enabu Jerusalén anu jiwexun uiainbun jawen epan 10 nantakea ain jawen dayadubu tibi Absalónen jatu chutankubainikiaki. 23 Jaskakunkainaitian jawada akatsi yukakubainabu Ahitófelin jatu shinanxunkin kemaya ja dukun Davidin ikunwanpauni keska wakin jawen bake Absalónen ikunjaidawadiakubainikiaki, Dios yukai keska wakubainkinan.