David xanen ibu jawen bake Absalónen mebinun ika inikiaki, na janchadan
15
Jerusalén anu Davidin juni bake betsa Absalón jiwekunkaini ibubis shinan chakai kein xanen ibuxanun, iwanan, jawen caballo tadanti pepa inun caballo kushipabu bitan 50 detenamenikabu katukin jatu tsumawatan ma jatu yunukubainmis 2 penama tibi Absalón bututan jawen epa Davidin jiwe anu jawen mae kenebaunibu janu jikiti xui anu xaba tibi kexea Absalón nixun xanen ibujaida jawadakidi ichakanikatima Davidin jau jatu pewaxunun yukakatsi janu beaibu, bestibu jatu kenaxun Absalónen jatu yukapakekin: “¿Jadatu mae anua min juai?” jatu apakeaya jatun mae inun jadatuda Israelin enabu xukua anua inun jaska shinanbidankin xanen ibujaida David jadi yukai beaibu bebunkidi yuiabu 3 Absalónen ninkatan jatu yuikin: “Chanima jawada min yukakatsi ikai peki, ichakanikatimadan. Jakia xanen ibujaida min yukai tsuan mia yuixuntidu jayamaki”, 4 iwanan, jatu yuikubainmis: “Ean matu medabewakin en matu duawaya jawada yuka iki jau man eanu bexanunbun nukunabu dasibi xanen ibuxuni en matun unantinankatsis ikai man ea katutidumenkaintsa”, ikin jatu yuikubainaya 5 tsuanda yukatanun ika chaima juai jatun beya chibankin metaka atan jaibuwakin ikuxun jatu tantsu akubainmis 6 xanen ibujaida Davidin jau bika teneaibu jatu xabakabi pewaxunxanun Israelin enabu dasibi beaibu Absalónen jatu nemakin jaibuwakin jatu shinan betsamakin David jau ana shinanyamaxanunbun ibubis jakidi besti jatu shinanmakubainaya7 jatu jaska wakubaini 4 año nichintan jawen epa David anu kaxun Absalónen yuikin:
—En xanen ibuun, jaska en Jehová yubaima Hebrón anu kaxun ea atanun ixun en mia yukaii. ¿Katanpa? 8 Min dayadu eadan, Siria anu mae betsa Guesur anu jiwexun yuikin: “Jerusalén anu en ana jiwexanun Jehován ea yunua Hebrón anuxun chaxuwan bake tesenxun chiwen menukin keyukin en mia kenwain juxanaii”, akin Jehová en yubaimaki— aka
9 xanen ibujaida Davidin kemakin yuikin:
—Unanuma katanwen— aka
jakia Hebrón anu Absalón kadiama ma jatu pewamis jadi kakin 10 Israelin enabu xukuabu tibi anu jawen jancha bunikabu yunukatsi jatu yuikin:
—Trompeta chan chan akubainaibu ninkatan: “Hebrón anu ma xanen ibu bena dasibibun Absalón ma katuabuki”, akin jatu yuiakeakebauntankanwen— jatu wa buabun 11 ja dikabi 200 junibu Jerusalén anu jiweabu jawen jancha ikunwain jawen chakabu unandiama Hebrón anu jabe budiabun 12 chaxuwan bake ichapa tesenxun chiwen menuxunkin jabetan Jehová kenwantanun, iwanan, Davidin medabewanika betsa jawen kena Ahitófel jawen mae Guiló anuadan, Absalónen ja iyukatsi kena kaxun Absalónen jatu yunua jaskakubainaibun David xanen ibu mebinkatsis ikin Absalón kushipakin jabun chibanmis xaba tibi jatu ichawakubainaya
Jerusalén anua David jawaida paxanikiaki, na janchadan
13 jaska Absalónen akai unantan jancha bunika David anu kaxun yuikin:
—Israelin enabu ichapajaidatun Absalón chibanun ixun shinankanikiki, xanen ibu wakatsi ikinan— aka 14 jaska wa ninkatan jawen xanen ibu bexmasbu dasibi Jerusalén anu jabe jiwexun mekeabu Davidin jatu yunukin:
—Dasibi menan jawaida taxnidibainankanwen. Nun yane kamaken Absalón juken nun jaskatan paxatidubumaki. Jawenabu bexun nuku chakabujaida wakin nenu Jerusalén anu nukube jiweabu nupe kenu chaipawen nuku dete keyui betidubuki. Menan budinankanwen— jatu wa
15 jatun xanen ibu kemakin yuikin:
—Min nukun xanen ibujaidatun jaska min nuku shinanxuna nun mibe kaii— akabu
16 janua David taxnikainkin jawen ain betsa betsapabu inun, jawen bakebu junibu inun ainbuaibu inun, jawen xanen ibu bexmasbu inun, jawen tsumabun dayadubu jatu iyukin jawen jiwe jawendua jau jabun besti mekexunkubainunbun ja 10 jawen ain nantakea jabu dayaxunmisbu jabu besti bashibaini Jerusalén anua xanen ibujaida David paxai kainkaini 17 jabun chibainbu dasibibube David kai maewan kesukauana jawen jenea jiwe anu David jatube niti itan 18 januxun jawen xanen ibu bexmasbun David jau kexebainunbun ja dapi jatu nichintan januxun jawen yuda jabun mekemis Querete nawabu inun Pelete nawabu bebuaibun ja kachu 600 detenamenikabu Geteo nawabu David dapi mapuabu Gat anua David dayaxunun ika jabe benibu jabe mapumisbu ja kachu jatu bebun mapudiabun 19 jatu jaska waitian juni betsa Filisteo Gat anua jawen kena Itai jushian bechitan xanen ibujaida Davidin yuikin:
—¿Jaskai mia dikabi min nukube juai, paxaidan? Nawa betsa min dama jushian min nukunabumaki. Jaskamaki. Min chintunkaintiduki, xanen ibu benabe unanuma jiweidan. 20 Dama Jerusalén anu jiwetanun ika min jikishinaki. Jaskawen taea: “Ebe kawe”, en mia watidumaki. Janida emebi en kai en unanmawen taexun min nukube kanun, iwanan, en mia yuitidumaki. Minabu iyui min jiwe anu chintundikaintanwen. Min jaskakainaidan, peki. Min ewen nuiaya jau Jehován mia duawakin medabewakubainxanunwen— aka
21 kemakin Itain xanen ibujaida David yuikin:
—Min mekenika Dios Jehová inun min en xanen ibu matu dabe ikunwankin en matu chibainwen taexun en mia yubaii. Janida min kaya min dayadui en mibe kaii. Min jiweken en mibe jiwexanaii. Min mawaya en mibe mawadiaxanaii— aka
22 jawen jancha ninkajaidatan kemakin Davidin yuikin:
—Jaskakenan, nukube kakunkainwen— aka
jabiatiandi Itai inun jabe beshianbu Davidbe bui 23 Jerusalén anua kainbainaibun jatu dapi jiwebaunabun buaibu jatu uin jatuwen nui kaxa chakayamaibun Paxku Cedrón pukebainaibun jatu chibain xanen ibujaida David paxku pukediabaini jadi tsua jiweabuma anu David bebuxuni bai tanabainaibun 24 Paxku Cedrón pukediabuma Dios jatube yubakani jancha aduni bau Levín enabun iabainaibube Diosbe jatunabu janchaxunika dabe Sadoc inun Abiatar paxku kexa anu jatu bebun buaibun Abiatar dapi Diosun jancha aduni bau tsauanbu Davidbe bukin dainbainbainaibun 25 xanen ibujaida David kaxun Diosbe jatunabu janchaxunika Sadoc yuikin:
—Maewan Jerusalén anu Dios jatube yubakani jancha aduni bau bui chintunkainwen, Jehová ewen nuikin ea medabewa ana chintunkidan jawen jancha aduni bau inun jawen tadi jiwe jania en ana jaki nukutidumenkainan. 26 Jakia ea jawa bechipaiama jaska shinain keska jau ea amaxanunwen— iwanan, 27 —Uian. Mia inun Abiatar Jerusalén anu matun juni bake dabebe unanuma chintunbainditankanwen, mia min juni bake Ahimaasbe inun Abiatar jawen juni bake Jonatánbedan. 28 Jerusalén anuxun man Absalón manaya enabube en kainkidanshinaki. Janu tsua jiweabumanu Jene Jordán napanpa puketi pe anuxun en manayuaii, Absalónkidi jaskadada jawen kaka man ea yunuai manaidan— jatu wa
29 Levín enabu Diosun jancha aduni bau jatu iamabaini Sadoc inun Abiatar Jerusalén anu chintunbainshinxun jadixun manaibun 30 Olivos Mati anu jawenabube kai Davidin jawen bichi tae pekatan mapekei juinti nishma kaxai tadiwen mayabukua kaya janua jabe buaibudi mapekediai tadiwen mayabukudia juinti nishmadi kaxadiakubainaibun 31 Ahitófel unanepatun David medabewakubainima ana medabewama jakia natian Absalón medabewaya David yuiabu jau Ahitófelin jaska shinain Absalón amakatsi medabewakubainai jau jaska amakatsi ikai Jehován kanemaxanun Davidin Jehová dayuikin ea akaya
32 mati mamaki anu januxun Dios kenwanmisbu anu David ma mapeketanaya unudia jaki nukutanun ika jawen jaibu Arquita nawa betsa Husai jawen tadi ushnikia mai mishpuwen mapu tukua Davidki nukua 33 Davidin yuikin:
—Ebe kakin ea jawa medabewamabia min ana ea bika tenematiduki. 34 Jakia Jerusalén anu chintunkaini kaxun nashi petan tadi bena sawetan Absalón juai yuikin:
“Xanen ibuun, en min dayaduki. Jabias min epa en medabewakubainima keska wadiakin unanepa janchawen en mia medabewakubainxanaii”, akin jaska Ahitófelin shinanxunkin medabewabiamisken mian jawen shinan betsa wamakin Ahitófel ea nemaxunkin min ea medabewatiduki. 35 Diosbe nukunabu janchaxunika dabe Sadoc inun Abiatarin ea medabewadiakubainkanikiki. Xanen ibujaidatun jiwe jawendua anuxun jawada dasibi ninka keyukin matun ea yuixunkubainxankanwen. 36 Jawada Sadoc inun Abiatarin mia anua ninkatan jatun juni bake Ahimaas inun Jonatán yunuabu eanu bexun jabias jancha ea yuitidubuki— aka
37 Davidin jaibu Husain ninkatan kai Jerusalén anu jikiaya jabiatiandi Absalón xanen ibui jaki chiti ikabube jikidiaya