—Eska xabakabi mia miyuinun ea ninkawe. Mae betsa anua juni dabe jiweabu betsa mabuwanyan betsa mitanuma mabu eskadabesya 2 ja mabuwanyan chaxuwan inun ina awa midimajaida jayaken 3 jakia ja juni mitanuma chaxuwan yuxan pishta besti peiwen bima jaya ibubis yumewakin jawen bakebubetan ewawakin jabias kenchaki piai anua pimakin nuxuai anua amakin jawen xuchi anu datanxun uxankin yumewakubainkin ja junin jawen bake ainbu bechipaikin akawaya 4 janua xaba betsatian juni betsa chai nimis bai tanabidani juni mabuwanyan jiwe anu uinun ika jikia, jakia ja juni jaki bayua jau bawaxununbun jawen inabu anua juni mabuwanyantun jawen ina mekatsi ikama jakia ja juni mitanuman chaxuwan pishta jamen bianxun jawen dayadubu bawamatan ja juni jua mabuyanwantun pimaimakiaki— aka

5 Davidin ninkatan juni mabuwanyanki sinatajaidakin Natán yuikin:

—Diosun ninkaiwen taexun janchakin en mia yuiaii, ja junin ichakawakin chakabujaidawaimadan, jawen nuiama tenantiki. 6 Jamen ja chaxuwan pishta pakakinan, jawen kadudan, dabe inun dabeki jau inanxanunwen, ja jawa ibubis jawen nuiai uinmama ikimawen taexunan— ikaya

7 januxun Natánen yuikin:

—Ja junikidi en mia yuiaidan, jabia min miaki. Jaskawen taexun Israelin enabu mekenika Dios Jehován xabakabi mia yuikiki. Ninkawe: “Israelin enabu min xanen ibujaidakunkainxanun en mia katuniki. Bebunkidi Saúlun mia detekatsis ikaya jawen kushipa nemakin en mia mekekubainiki. 8 Min jatu mekekubainxanun min xanen ibu Saúlun jiwe jawendua inun jawen ainbuaibu en mia yunuyamaki. Ja dikabi jawenabu anua Judán enabu tadi paxkanibu ja Israelin enabu paxkabiabainibun jabu anu en mia yunudianiki, ja dabe mekei min xanen ibu ikunkainxanunan. Jaska wakin en mia yununi eskadabes min shinanyan en ana mia ichapa inankeanaii. 9 ¿Jaskakin min en jancha ea ninka pewama ikimaxun en jaska bechipaiai keska min akama danainmamen? Amón nawabu Hitita nawa Urías jatu tenanmanun, iwanan, jau Urías nichinxanun min Joab yunua Urías jatu tenanmaimaki, jatu jaska wamatan jawen ain mina wakin bikatsidan. 10 Jaska wakin ea danankin shinanma Hitita nawa Uríasin ain biankin min ainwainmawen taexun ean minabu kupikin betsa betsapawen jatube en mia bika tenemakubainxanaii. 11 Eska Jehován mia yuikiki. Minabun jau mia chakabuwanunbun en jatu yunuxanaii. Min bedubi min ainbuaibu betsa mia mebintan mia dapi juni betsa jiwea en yunua xabakan badi chaxa anuxun min ain chutaxankanikiki. 12 Jamen mia chutanameidan, june min ikimaki. Jakia ean jatu mia uinmakinan, Israelin enabu dasibibun uiainbun en jatu xabakanxun chutanamemai uinxankanikiki”— akin Natánen Jehová jancha yuixuna

13 e itan jaskaima Natán bebuxun Davidin yuikin:

—Jehová danankin chakabu betsa betsapa en akimaki— ikaya

kemakin Natánen yuikin:

—Min chakabuwaimawen taexun Jehován mia kupia min mia mawama ixanaii. 14 Jakia Jehová jabi min dakejaidawaimawen taea min juni bake Betsabé dama kainshina samama ja mia mawaxunxanikiki— atan

15 januxun ana jancha wama Natán jawen jiwe anu chintunkainken janua Uríasin ainki Davidin bake waima ma kainshina Jehován isin tenema chakayamaya 16 jawen bakewen nuijaidai jawa piamajaida samakei meshu chaitanai jinamas main tin ika dakaxun jau jawen bake xuxanun Davidin Jehová yukaxunkubainaya 17 janua anibu unanepabun David medabewamisbu buxun main daka benitan pimanun, iwanan, unanxubida yui pewabiabu jakia jatu ninkabiatan jatubetan piama ikunkainaya

18 janua 7 día binutan jawen juni bake mawaya anibu unanepabun jawen datei yuiti tenekin shinain: “Jawen bake jiweyuken nun daewakin jancha wabia nuku jawa ninkamajaida ishianki. ¿Ma bakeishta mawaken jadakidi nun yuitidumen? Ninkatan itimaskakauani ibubis ichakanikatiduki, jawen nui isin teneidan”, ika shinain dateaibun

19 janua june anibu unanepabu yuinameaibu uinxun jawen bake ma mawa shinankin jatu yukakin:

—¿Bakeishtadan, ma mawaxumen?— jatu wa

jabun kemakin yuikin:

—Jaa, ma mawaxuki— akabu

20 jaska wabu ninkatan main daka benikaini ka jawen tadi detsis pekatan nashi petan tadi bena sawetan xeni inintiwen cha ikeaketan Dioski nukuti tadi jiwe puntea anu kaxun tadi jiwe bebun jemaintin danti iki beti ixun Jehová kenwanbai chipu benikaini jawen jiwe anu kaxun jatu piti yuka bexuanbu pikin nuxukin yaniwaya

21 jatun beya chibanmawen taexun anibu unanepabun yukakin:

—Xanen ibuun, tsua jaskatimabiaken nukun beya chibanma ¿min jawai jaskai? Min bake isin tenei jiweyuken samakei min bakewen taea min kaxakunkainshinaki. Jakia ma mawaken bis bis iki kaxama benikidan min ma piaii. Nuku tapinmawe, jaskada shinain min ikimenkainan— akabu,

22 kemakin Davidin jatu yuikin:

—En bake isin tenei jiweyuken jau mawayamanun ewen Jehová nuitiduki, ixun shinain samakei en kaxakunkainshinaki. 23 Ikis ma mawaken jaska waxun en ana jiwematidumawen taea jamen en samaketidumaki. Jaska watan ana chintunwankin en jiwematidumaki. Chipu eadi mawatan en jaki nukui ka jadi eki nukuxanikiki— jatu wanikiaki.

24 Janua jawen bake debuimaken jawen ain Betsabé Davidin atimas daewaxun ana chutakubaina ana bake bima juni bake kaian Davidin kenakin: “Salomónki”, anikiaki. 25 Ja juni bake bechipaikin Diosun jancha yuixunika Natán yuimakin Jehován David unanmaimawen taexun jawen kena betsa wakin Davidin kenakin: “Jedidíaski”, adianikiaki, nukun janchawen: “Ja Jehován bechipaikiki”, akinan.