2 xaba betsatian juindukuin dakabai ma badi kai jikiaya David benikauni jawen jiwe sapa xeni manaundi anu nixun uinbaunkin ainbu jawenduajaida bachiuma nashiai 3 bechitan: “¿Tsuamenkain? Uintankanwen”, iwanan, jatu yunua buxun yukatani bexun yuikin: “Eliamnen ainbu bake Betsabéki, Hitita nawa Uríasin ainan”, akabu 4 jau ixuntanunbun jawen dayadubu Davidin jatu yunua yuitan ixuntanabu Davidin bichixun chutakin jawen juda idumawawen taea ainbu chuki nashitan janua jawen jiwe anu chintunkainima

5 ana jimi ikama janu jimi imis binukainaya ma bake bima tuya unantan jau David banabimatanun jawen tsuma yunua kaxun: “Betsabé ma tuyakiaki”, iwanan, David yuia 6 januxun ninkatan jawen detenamenika xanen ibu Joab anu jawen jancha bumakin Davidin yuikin: “Hitita nawa Urías jau juyunun ea anu nichinyuwe”, iwanan, jatu yunua, buxun jabias jancha Joab yuiabu David anu Joabin Urías yunua 7 jukidan David bebun nitushiai Urías Davidin yukakin: “Joab inun nukun detenamenikabudan, ¿jaskada kaya detenameaibu kaka bexun min ea yuiai?” aka Uríasin jaskaibu dasibi yuia 8 ninkatan januxun bepadankin jau jawen ain anu katanun Davidin yuikin: “Min jiwe anu kaxun min tae chuki petan min ainbe juindukuin uxayutanwen”, aka Davidin jiwe jawendua anua Urías kainkainaya Uríasin jiwe anu piti pepa inankuinkin xanen ibujaida Davidin jatu bumaxunbia 9 jawen jiwe anu Urías kama Davidin jiwe jikiti xui dapi xanen ibujaida David mekemisbube Urías meshu medan uxashinaya 10 jawen jiwe anu Urías kama uxashinai David yuiabu Urías jau junun Davidin kena Urías juai Davidin yukakin:

—Chaijaidakea min jua punu nukabia ¿jaskai min jiwe anu min kama ishiain?— aka

11 kemakin Uríasin yuikin:

—Ji punyan tinin wanxun xubu keska waxun Jehován jancha aduni bau tsauinmabu jabias keska anu Israelin enabu 10 xukuabu Jerusalén nortekidi jiweabu detenamenikabu inun Judán enabu detenamenikabudi pi uxakanikiki. En detenamenika xanen ibu Joab inun min xanen ibu bexmasbu jabias anudi kene anuma naxabakan uxadiakubainkanikiki. Detenameaibu keskai en jiwe anu jikixun pikin nuxukin en ain chutakin jaska dasibi betsa betsapa en atidumaki, bika tenebiakinan— aka

12 jaskabiaya Davidin ana nichinkin:

—Jaskakenan, ikis ana bashikuyuwe, meshukidi min kaya en mia nichinxanaidan— aka

Davidin jaska wa jawen jiwe anu ana kama meshukidi jabianua katankatsi Jerusalén anu Urías bashikuken 13 jabias xabatian jau jabetan piyunun itan Davidin pimakin Urías paenjaidawa janua meshu medan Urías Davidin jiwe anua kainkaina jawen jiwe anu ana kama jakia Davidin jiwe jikiti xui dapi xanen ibu mekemisbube Urías niti ika ana uxashinaya

14 penama Davidin ninkatan detenamenika xanen ibu Joab jawen jancha kenexun Joab anu Urías inan buxun 15 Joab inan bepenxun jaska Davidin keneshina june Joabin yuikin: “Jau jatube detenamenun Urías dukun jatu bebun nichinxanwen, detenamejaidai meseaibu anudan, jau ja dukun tsakakin tenanunbunan”, aka

16 jaska kenexunshina uinkin ninkatan jau jatube detenametanun ixun jawen detenamenikabu yunukin Amon nawabun maewan Joabin jatu ana kexemabaunkin janu Amon nawa mentsisipajaidabu mapuabu bebun Joabin Urías yunukin nichian 17 jatun maewan mekekin Joabin detenamenikabu detenun ika jawaida kainbidan betsa betsapa jatu detekin Davidin detenamenika xanen ibu bexmasbube jatube detenamei mawabun chipu jatu benabaunkin ja mawabu anuadi Uríasdi tenanbainabu bechidiatan

18 Amon nawabun maewan mebinun ika jatube detenamei jaskashinabu Joabin David anu jancha bumakatsi ikin 19 jatun jancha bunika Joabin yunukin yuikin: “Jaskai nun jatube detenamekunkidanshina xanen ibujaida David min dasibi banabimakin keyua 20 xanen ibu sinatajaidakin, mia yukakin: ‘Ja maewan anuabu detenun ika ¿jaskai ja dapijaida bushianbumen? Maewan mishki kenebaunibu mamakixun mishki tunku putatidubu ¿jaskai nukunabun unanma ikasi jatu dapijaida bushianbumen? 21 Mae Tebés anuxun mishki kenebaunibu mamakixun jawen deneti mishki ainbun jatu anu putakin Jerubaalin bake Abimélec tenainmabudan, ¿jabunan, shinanma ikanimenkain? ¿Jaskakin maewan mishki kenebaunibu anu dapijaida bushianbumen?’ ikaya kemakin eska waxanwen: ‘Ja dikabi min xanen ibu bexmas Hitita nawa Urías jatube tenandiashinakiaki’, akin ea yuixuntanwen”, aka

22 jatun jancha bunika kai jikixun jaska Joabin dasibi yunushina xanen ibujaida David yuikin keyua jaska Joabin yuishina keskai David sinatajaidaya

23 januxun jancha bunikatun yuikin:

—Jemaintin xabakanxun nuku detenun ika Amon nawa detenamenikabun kainbidankin jabu dukuntun nuku binutan nuku detebaunabu chishtekidi jui mae jikiti xui anu nun jatube chintunkidanaya 24 januxun mishki kenebaunibu anuxun pia kuinwen nuku tsaka tsaka akaibun min xanen ibujaidatun detenamenika xanen ibu bexmas betsa betsapabu jatu maemakin tenankin januxun ja dikabi Hitita nawa Urías jatube tenandiashinabuki— aka

25 jaska wa ninkatan jatun jancha bunika Davidin kemakin yuikin:

—Eska Joab ana yuitanwen: “Ja mawashinabuwen jaskaida jatuwen dateyamawe, detenameadan, jabiaskakidan. Jakia ana kushipajaidakain ja maewan yamawakin man detekin keyutiduki”, akin jaska Joab yuikin min jatu shinan chankanwantiduki— aka

26 janua Betsabén ma jawen bene Urías mawashina ninkatan 7 día kaxakunkaini mainshinken 27 chipu Betsabé kaxa neseshinken jau itanunbun Davidin jatu yunua ixuntanabu jawen jiwe jawendua anu Davidin maewashinxun ainwanshina bebunkidi tuyaima juni bake kainbiaken jaska Davidin Urías ichakawaimawen taea Jehová jawen benimama inikiaki.